كەشە مەملەكەت باسشىسى نۇرسۇلتان نازارباەۆ “حابار” اگەنتتىگىنە سۇحباتىندا قىرعىزستانداعى احۋالعا تۇسىنىكتەمە بەردى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
سۇحبات بارىسىندا پرەزيدەنت قازاقستاننىڭ قىرعىزستانداعى احۋالدىڭ جەدەل تۇراقتانۋىن جاقتايتىنىن جانە كورشى مەملەكەتكە قاجەتتى كومەك كورسەتۋگە ءازىر ەكەنىن اتاپ ءوتتى.
قازاقستان – قىرعىزستانعا تۇراقتىلىق تىلەيتىن مەملەكەت. مەن ەقىۇ-عا توراعالىق ەتۋشى مەملەكەتتىڭ باسشىسى رەتىندە گۋمانيتارلىق جانە باسقا كومەك كورسەتۋدى توپتاستىرۋ ءۇشىن ءبارىن دە ىستەۋدەمىن. قىرعىزستانعا ۇقشۇ ارناسى بويىنشا قازىردىڭ وزىندە رەسەي, قازاقستان جانە وزبەكستان كومەك كورسەتۋدە. مەن وزبەكستانعا دا قازىر بۇدان دا كەم ەمەس قيىندىقتار ءتۇسىپ وتىر دەپ سانايمىن. سوندىقتان دا ءبىز ءوز موينىنا ەڭ اۋىر سالماقتى ارتقان پرەزيدەنت يسلام كاريموۆكە دە, وزبەكستانعا دا ريزاشىلىق بىلدىرۋگە ءتيىسپىز. ءبىر كۇننىڭ ىشىندە 100 مىڭ دەرلىك ادام كەلگەن, ال ولاردىڭ ءبارىن ورنالاستىرۋ, تويىندىرۋ, شولدەرىن باسۋ جانە قاجەتتى ەم-دوممەن قامتاماسىز ەتۋ قاجەت. بۇل وزبەكستان ءۇشىن قاندايلىق قيىن ەكەنىن, وعان قانداي پروبلەمالاردى شەشۋگە تۋرا كەلگەنىن كوز الدىما كەلتىرە الامىن. ءبىز كورشىلەس مەملەكەتتەر – قازاقستان, رەسەي جانە وزبەكستان بىرلەسىپ كومەكتەسىپ, قاجەتتى ماسەلەلەردى شەشۋدەمىز. بىراق تا مەن باسقا ماسەلە تۋرالى ايتقىم كەلەدى. قىرعىزستان – كەدەي ەل, ويداعىداي مەملەكەت بولا المايدى دەيتىن پىكىر بار. مەن ولاي دەپ سانامايمىن. قىرعىزستاننىڭ جەر قويناۋى التىنعا, تەمىرگە, كۇمىسكە, مىسقا جانە باسقا رەسۋرستارعا باي. تاۋ وزەندەرىنىڭ الەۋەتى زور. تۋريزم سالاسىنىڭ مۇمكىندىكتەرى وراسان. مۇنىڭ ءبارىن كوتەرۋ كەرەك. باسقا مەملەكەتتەردىڭ بىردە-ءبىر گۋمانيتارلىق كومەگى ەشقاشان ەلدى كوتەرگەن ەمەس. ءبىرىنشى ماسەلە, مەملەكەت ەكونوميكاسىن كوتەرىپ, ادامدارعا جۇمىس بەرىپ, ءوز حالقىن تويىندىرا الا ما. مىنە, سوندا عانا ول تۇراقتى بولادى. سوندىقتان دا قىرعىزستاننىڭ ەكونوميكالىق ورلەۋ باعدارلاماسىن جاساۋ قاجەت جانە قازاقستان ونى جاساۋعا كومەك كورسەتۋگە ءازىر. مەن قىرعىزستاندا ەكونوميكانى ورلەتۋ جانە كوتەرۋدىڭ ستراتەگيالىق ساياساتى بولعانىن وتە تىلەيمىن.