اقمولالىق ديقاندار ەرلەدى

«رودينا» اگروفيرماسى» جشس وڭىر­دەگى جاۋاپتى ناۋقاندى قىسقا مەرزىمدە اياقتاپ, دارقان دالا توسىندەگى وزگە ارىپ­تەستەرىنە ۇلگى كورسەتتى. قازاقستاننىڭ ەڭبەك ەرى يۆان ساۋەر باسقاراتىن, 25 جىلدىق تاريحى بار سەرىكتەستىكتە 46 مىڭ گەكتاردان استام القاپتىڭ استىعى جينالدى. وراققا 63 اۋىل شارۋاشىلىعى تەحنيكاسى قاتىستى, ونىڭ ىشىندە زاماناۋي 35 كومباين مەن 9 تراكتور بار. گەكتار بەرەكەسى 19 تسەنت­نەردەن اينالدى. كەيبىر قۇنارلى القاپ­تارداعى استىق شىعىمى 27 تسەنتنەرگە دەيىن جەتتى.

«ەگىستىكتەردەگى ءىس-قيمىلداردىڭ ۇي­لەسىمى مەن جەدەلدىگى قويىلعان مىندەت­تەردىڭ ساپالى ورىندالۋىنا جاعداي جا­ساپ, ەگىن ورۋ ۋاقىتىن قىسقارتتى. ەگىن جيناۋ جۇمىستارىنىڭ ءساتتى اياقتا­لۋى ءوندىرىستى مەحانيكالاندىرۋدىڭ ناتي­جەسىندە مۇمكىن بولدى», دەيدى شارۋاشى­لىقتىڭ باس اگرونومى قانات ادىلبەكوۆ.

شارۋاشىلىقتا بارلىعى 43 مىڭ توننادان استام استىق باستىرىلدى, بۇل وتكەن, جىلداعى كور­سەتكىشتەن ەكى ەسە ارتىق. اگروفيرما جىل سايىن جاق­سى جۇمىس ىستەگەن ادامداردى ىنتالاندىرادى. 28 جىل ەڭبەك ءوتىلى بار كومباينشى فەدور مەركۋ­لوۆ 1 515 گەكتار القاپتى ورىپ, 3 030 توننا اس­تىق باستىرسا, 39 جىل كومباين تىزگىندەگەن يۋري گو­رودەتسكي دە 1 475 گەكتار القاپتان 2 950 توننا استىق باستىرعان.

«بيىلعى ناۋقاندا 1 535 گەكتار ال­قاپتىڭ ەگىنىن جيناپ, 3 070 توننا استىق باستىردىم. مەن مۇندا 27 جىلدان بەرى جۇ­مىس ىستەپ كەلەمىن. بيىل وراق كەزىندە اۋا رايى قولايلى بولدى», دەيدى كومباينەر الەكساندر پروحوروۆ.

القاپتاعى استىقتى قىرمانعا تاسىمالداۋدا جۇك كولىگىنىڭ جۇرگىزۋشىسى الەكساندر ميۋسيك توپ جاردى. ول ناۋقان باستالعالى 10 700 توننا استىقتى قامباعا جەتكىزگەن.

سۋبسيديالاۋ تۇرىندەگى مەملەكەتتىك قولداۋ ونىمدىلىكتىڭ جوعارى دەڭگەيىنە قول جەتكىزۋدە ەرەكشە ءرول اتقارعانىن اتاپ وتكەن ءجون. وسى ارقىلى شارۋاشىلىق جانار-جاعارماي ماتە­ريالدارىن, وسىم­دىكتەردى قورعاۋ قۇرالدارى مەن مينەرالدى تىڭايتقىشتاردى ساتىپ الۋ شىعىن­دارىن ەداۋىر تومەندەتە الدى.

ءبىر ايتا كەتەرلىگى, بيىلعى ەگىننىڭ بەرەكەسى گەكتارىنا 13 تسەنتنەردەن جو­عارى. استىق ساقتايتىن كا­سىپورىندار مەن ەلەۆاتورلاردا 148 استىق كەپ­تىرەتىن قۇرىلعى جۇمىس ىستەپ تۇر. وراق جۇمىس­تارىن جۇرگىزۋگە ارزانداتىلعان باعامەن 80,3 مىڭ توننا ديزەل وتىنى بولىنگەن. ءوڭىر ديقان­دارىنىڭ تابىسى بىلتىرعى مەجەمەن سالىس­تىر­عاندا قوماقتى. التى ملن توننادان استام استىق باستىرۋ مەجەلەنسە, قازىردىڭ وزىندە قۇت قامباعا قۇيىل­عان قىزىل ءدان بەس ملن توننادان استى.

«وبلىس ەلەۆاتورلارىنا تۇسكەن استىقتىڭ 60 پايىزدان استامى ءۇشىنشى كلاستى. بۇل جاي استىقتى نارىقتىق باعامەن ساتۋعا مۇمكىندىك بەرەدى», دەيدى وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى كەنەش ءالىمجانوۆ.

بيىل مول استىق جيناعان ىرگەلى شارۋا­شى­لىق­تار از ەمەس. ماسەلەن, بۇلاندى اۋدانىنىڭ «جۋ­راۆلەۆكا – 1» سەرىكتەستىگى ءار گەكتاردان 57 تسەنت­نەردەن ءونىم جينادى.

«كوكتەمدە 71 مىڭ گەكتار جەرگە ءداندى جانە بۇرشاق داقىلدارىن سىڭىرگەن بولاتىنبىز, – دەيدى «جۋراۆلەۆكا – 1» سەرىك­تەستىگىنىڭ باس ديرەكتورى ەرلان توقانوۆ, – گەكتار بەرەكەسى 30 تسەنتنەردەن اينالىپ جاتىر. سارالاپ قاراساق, جاق­سى ءونىم الۋعا قاجەتتى مينەرالدى تىڭايت­قىشتاردى قولدانىپ, اگروتەح­ني­ك­ا­لىق شارالاردى دەر كەزىندە جۇرگى­زۋى­مىز سەبەپشى بولىپ تۇر. بيىل جەكەلەگەن القاپتارداعى ءونىم ءتىپتى جاقسى. بابى كەلىسكەن القاپتاردان 50 تسەنتنەردەن استام ءونىم جينادىق».

ساندىقتاۋ اۋدانىنداعى «ماكسيموۆ­س­كوە» سەرىكتەستىگىندە گەكتار بەرەكەسى 40 تسەنت­نەردەن اسسا, زەرەندى اۋدانىنداعى «ديحان پليۋس» سەرىكتەستىگى ءار گەكتاردان 33 تسەنتنەردەن ءونىم جيناپ جاتىر.

اقمولا وبلىسى