پاۆلودار وبلىسىندا تۇرعىن ۇيلەردى جىلۋعا قوسۋ جۇمىستارى ءتامامدالىپ قالدى. قازىردە اقسۋ قالاسىنداعى بارلىق تۇرعىن ءۇي جىلۋعا قوسىلعان. ال پاۆلودار مەن ەكىباستۇزداعى ءىس-شارالار ءبىر-ەكى كۇندە اياقتالۋى ءتيىس.
ءۇش قالاداعى الەۋمەتتىك نىسانداردىڭ بارلىعى بۇگىندە جىلۋمەن تولىق قامتىلعان. اقسۋ قالالار اراسىندا ەڭ العاشقى بولىپ بارلىق الەۋمەتتىك مەكەمەلەردى جانە ۇيلەردى جىلۋعا قوستى. ال پاۆلودار قالاسىنداعى 1 300 كوپپاتەرلى ءۇيدىڭ تەك 21-ىنە عانا جىلۋ كىرمەگەن.
«بۇل ۇيلەردىڭ سىرتقى جانە ىشكى جەلىلەرىندە اپاتتىق جاعدايلار انىقتالعانى سەبەپتى جىلۋ كەش بەرىلىپ جاتىر. جوندەۋ جۇمىستارى جۇرگىزىلىپ, جىلۋمەن قامتۋ مەكەمەسىنىڭ قىزمەتكەرلەرى گيدراۆليكالىق جانە تەمپەراتۋرالىق رەجىمدى رەتتەپ جاتىر. نەگىزى جىلۋ بەرۋدى 9 قىركۇيەكتە باستادىق. باستاپقى بەتتە الەۋمەتتىك نىساندار قامتىلدى», دەپ حابارلادى پاۆلودار قالاسى اكىمىنىڭ ءباسپاسوز قىزمەتى.
پاۆلودار قالاسىنىڭ اكىمى حاسار حابىلبەكوۆ جىلۋ پارامەترلەرى بىردەن قالىپتى بولمايتىنىن ەسكەرتىپ وتىر.
«تۇرعىندار پاتەرلەرىندەگى باتارەيالار بىردەن قىزبايدى. جىلۋ جەلىلەرىن تولتىرۋ ءبىرشاما ۋاقىت الادى. جەلىدەگى سۋ اينالىمى 22 مىڭ توننانى قۇرايدى. ال جىلۋ ەلەكتر ورتالىعىنداعى جەلىلىك سۋمەن تولتىرۋدىڭ ەڭ جوعارى مۇمكىندىگى – تاۋلىگىنە 800 توننا كولەمىندە. وسىعان بايلانىستى قالانى جىلۋمەن قامتۋدى تولىق ىسكە قوسۋ جانە باپتاۋ ءۇشىن بىزگە ءبىرشاما ۋاقىت قاجەت», دەدى شاھار باسشىسى.
ەكىباستۇز قالالىق تۇرعىن ءۇي ينسپەكتسياسى ءبولىمىنىڭ باسشىسى الىبەك ءبايدىلدين شاھاردا 300-دەن استام كوپقاباتتى تۇرعىن ءۇي جىلۋعا قوسىلىپ ۇلگەرگەنىن مالىمدەدى. قالادا جالپى سانى 700 تۇرعىن ءۇي جانە 6 مىڭنان استام جەر ۇيلەر ورنالاسقان. مۇنداعى جىلۋعا قوسۋ جۇمىستارى الداعى ەكى كۇندە تولىق اياقتالادى دەپ جوسپارلانىپ وتىر.
اقسۋ قالالىق ىشكى ساياسات ءبولىمىنىڭ باسشىسى اسەمگۇل راكيموۆا 16 قىركۇيەكتەن باستاپ الەۋمەتتىك نىساندارعا, 23 قىركۇيەكتەن تۇرعىن ۇيلەرگە جىلۋ جىبەرىلگەنىن ايتادى. مەتاللۋرگتەر شاھارىندا 265 تۇرعىن ءۇي مەن 44 الەۋمەتتىك نىسان بار.
بيىل ۇكىمەت پاۆلودار, ەكىباستۇز جانە اقسۋ قالالارىندا جىلۋ جەلىلەرىن سالۋعا جانە رەكونسترۋكتسيالاۋعا ارنايى رەزەرۆتەن 9 ملرد تەڭگە ءبولىندى. اتالعان قاراجات ەسەبىنەن (3,6 ملرد تەڭگە) پاۆلوداردا ۇزىندىعى 2,5 شاقىرىم بولاتىن تم-13 جىلۋ ماگيسترالى سالىندى. بۇل 41,5 مىڭ ادام تۇراتىن پاۆلوۆ – شەۆچەنكو – كاتاەۆ كوشەلەرى اۋماعىنداعى كوپپاتەرلى تۇرعىن ۇيلەردى تۇراقتى جىلۋمەن قامتاماسىز ەتۋگە مۇمكىندىك بەرەدى. ال ەكىباستۇزدا جالپى ۇزىندىعى شامامەن 4 شاقىرىم بولاتىن تم-1 جانە تم-3 جىلۋ ماگيسترالدارىنىڭ ۋچاسكەلەرى رەكونسترۋكتسيالاندى (3,6 ملرد تەڭگە). قالعان 1,8 ملرد تەڭگە اقسۋداعى №3,5 جانە 8 شاعىن اۋدانداردا ورنالاسقان, ۇزىندىعى 4,3 شاقىرىم بولاتىن ورامىشىلىك جىلۋ جەلىلەرىن قايتا جاڭارتۋعا اۋدارىلدى. سوڭعى 2 جىلدا اتالعان ۋچاسكەلەردە 40-تان استام اقاۋ تىركەلگەن. رەكونسترۋكتسيا جۇمىسى 1,5 مىڭنان استام تۇرعىندى ساپالى جىلۋمەن قامتاماسىز ەتۋگە مۇمكىندىك بەرەدى دەپ كۇتىلىپ وتىر.
پاۆلودار وبلىسى