فۋتزالدان وزبەكستاندا ءوتىپ جاتقان الەم چەمپيوناتىنىڭ جارتىلاي فينالىنا جولداما العان كوماندالار تولىقتاي انىقتالدى. وكىنىشكە قاراي, ولاردىڭ قاتارىندا ەل قۇراماسى جوق. وسىعان دەيىن ورەلى ويىن ورنەگى, كەرەمەت تاكتيكالىق دايارلىعى جانە تەحنيكالىق ارسەنالىمەن كوزگە تۇسكەن ريكاردو كاكانىڭ شاكىرتتەرى شيرەك فينالدىق سايىستا ارگەنتينادان ويسىراي ۇتىلدى.
وڭتۇستىك امەريكانىڭ وعلاندارى 2016 جىلى كولۋمبيادا الەم چەمپيونى اتاندى. شەشۋشى تۇستا ولار رەسەيدەن 5:4 ەسەبىمەن باسىم ءتۇستى. 2021 جىلى ليتۆادا ۇيىمداستىرىلعان الەم چەمپيوناتىندا كۇمىس مەدال يەلەندى. فينالدا 1:2 ەسەبىمەن پورتۋگالياعا ەسە جىبەردى. امەريكا كۋبوگىندە 13 رەت (3 التىن, 7 كۇمىس, 3 قولا) جەڭىس تۇعىرىنا كوتەرىلدى.
ارگەنتينالىقتارمەن قازاقستان قۇراماسى ءۇش رەت كەزدەستى. 2016 جىلى كولۋمبياداعى دۇنيەجۇزىلىك دودانىڭ توپتىق تۋرنيرىندە باسەكە تاعدىرىن الاميرو ۆاپوراكي سوققان جالعىز گول شەشتى – 1:0. كەلەسى جىلى بانگكوكتاعى «كورول كۋبوگى» جولىنداعى جارىستا جولىمىز قايتا قيىستى. بۇل جولى تەڭ تاراستىق – 0:0. بيىل 8 قىركۇيەكتە الماتىداعى بالۋان شولاق اتىنداعى سپورت سارايىندا جولداستىق كەزدەسۋ وتكىزدىك. بۇل ماتچ 3:2 ەسەبىمەن جەرلەستەرىمىزدىڭ پايداسىنا شەشىلدى.
تاشكەنتتە وتكەن باسەكەنى تاماشالاۋ ءۇشىن «حۋمو ارەناعا» 12 000 كورەرمەن جينالدى. بۇل كەشەن ءدال وسىنشا ادامدى عانا سىيدىرا الادى. ياعني بارلىق بيلەت ساتىلىپ كەتكەن. بۇعان دەيىنگى وسى جارىستاعى بىردە-ءبىر ماتچ ءدال وسىنشا جانكۇيەردى جيناماعان ەدى. سولاردىڭ بارلىعى قازاقستان قۇراماسىنا قولداۋ كورسەتتى دەپ ايتساق, ەش قاتەلەسپەيمىز. تەك ءبىر-ەكى جەردە عانا ارگەنتينانىڭ تۋى جىلت ەتكەنى بولماسا, سول كەشتە «حۋمو ارەنادا» قازاقتىڭ كوك بايراعى كوزدىڭ جاۋىن الدى.
كەزدەسۋدىڭ العاشقى مينۋتتارىندا ريكاردو كاكا الاڭعا يگيتا, اقجول ءدارىباي, لەو, داۋرەن تۇرساعۇلوۆ جانە دۋگلاستى شىعاردى. ارگەنتينادا دا بەس سەركەسىنە سەنىم ارتتى. ءبىرىنشى كەزەڭ الما-كەزەك شابۋىلمەن وتكەنىمەن, ەسەپ اشىلمادى. ۇزىلىستەن كەيىن ءبارى 180 پايىزعا وزگەردى. ەكىنشى تايم باستالعانىنا 1 مينۋت 59 سەكۋند وتكەندە ماتياس روزا ەسەپ اشتى – 1:0. ارادا بەس مينۋت وتكەننەن كەيىن شىڭعىس ەسەنامانوۆ دوپتى ارتقا بەرمەكشى بولىپ ونى يگيتادان اسىرىپ جىبەردى دە, ءوز قاقپامىزدىڭ باعاناسىنا تيگىزدى. سول كەزدە العىرلىق تانىتقان انحەل كلاۋدينو ەكىنشى گولدى سوقتى – 2:0. كوپ ۇزاماي ارنولد كناۋپ دوپتى قولمەن توقتاتىپ, تورەشى پەنالتي بەلگىلەدى. قولايلى نۇكتەدەن كەۆين ارريەتا ءمۇلت كەتكەن جوق – 3:0. سودان كەيىن-اق قازاقستان فۋتزالشىلارىنىڭ ويىنىنان بەرەكە كەتتى. ولار يگيتانى الماستىرىپ, الاڭعا تاعى ءبىر ويىنشى شىعارىپ الەك بولدى. 32 مينۋتتا سەباستيان كورسو دوپتى بوس قاقپاعا باعىتتادى – 4:0. ايتەۋىر رەتىن تاۋىپ, داۋرەن تۇرساعۇلوۆ ءبىر گولدى ءوز ەنشىسىنە جازدى – 4:1. بىراق ونىمەن ارگەنتينالىقتار توقتاپ قالعان جوق. 34-مينۋتتا لۋكاس بولو-الەماني مەرگەندىك تانىتتى – 5:1. 36 مينۋتتا ەرەجەنى ورەسكەل بۇزعانى ءۇشىن تۇرساعۇلوۆ الاڭنان قۋىلىپ, پەنالتيدى كەۆين ارريەتا ءساتتى ورىندادى – 6:1. ءسويتىپ, قازاقستان قۇراماسىنىڭ الەم چەمپيوناتىنداعى جورىعى اياقتالدى.
جارتىلاي فينالدا ارگەنتينا فرانتسيامەن كۇش سىناسادى. شيرەك فينالدا فرانتسۋزدار پاراگۆايدى (2:1) ۇتتى. سونداي-اق ەكىنشى جارتىلاي فينالدا برازيليا مەن ۋكراينا كوماندالارى وينايدى. بۇل باسەكەلەر 2, 3 قازاندا وتەدى. برازيليالىقتار ماروككودان (3:1) باسىم تۇسسە, ۋكراينالىقتار ۆەنەسۋەلانىڭ (9:4) تاس-تالقانىن شىعاردى.