ەلورداداعى اۋەزوۆ ەسكەرتكىشى

ەسكەرتكىشتى مەملەكەتتىك كەڭەسشى ەرلان قارين جانە جازۋ­شى­نىڭ تۋىسى ديار قوناەۆ اشتى.

ەرلان قارين مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى. وندا: «مۇحتار اۋەزوۆ – ۇلت رۋحانياتىندا ايرىقشا ورنى بار ۇلى جازۋشى. ول شىعارمالارىندا حالقىمىزدىڭ ءبىتىم-بولمىسى مەن تىنىس-تىرشىلىگىن شەبەر سۋرەتتەدى. قالامگەردىڭ تەڭدەسسىز تۋىندىلارىنان انا ءتىلىمىزدىڭ بايلىعى مەن ءتول وركەنيەتىمىزدىڭ تەرەڭدىگى ايقىن كورىنەدى. شىن مانىندە, جۇرتىمىزدىڭ جان دۇنيەسىن بىلگىسى كەلگەن ادام ەڭ الدىمەن اۋەزوۆتى وقۋى كەرەك. مۇحاڭ ابايدى, اباي ارقىلى قازاقتى تورتكۇل دۇنيەگە تانىتتى. ءسوز زەرگەرىنىڭ «اباي جولى» ەپوپەياسى – حالقىمىزدىڭ الەم ادەبيەتىنە قوسقان قۇندى قازىناسى. ول ابايتانۋدىڭ نەگىزىن قالادى. جازۋشىلار مەن عالىمداردىڭ تۇتاس بۋىنىن تاربيەلەپ شىعاردى. الاش ارىستارىنىڭ اماناتىن كەيىنگى بۋىنعا جەتكىزىپ, ەل مۇددەسىن قورعاۋ ءۇشىن سان رەت باسىن بايگەگە تىكتى. ءبىز ۇلتتىڭ رۋحى بيىك بولسىن دەسەك, حالقىنا ادال قىزمەت ەتكەن ۇلى تۇلعالارىمىزدى ءاردايىم ۇلىقتاي ءبىلۋىمىز قاجەت. ول – وسكەلەڭ ۇرپاقتىڭ پەرزەنتتىك پارىزى. استانا تورىندەگى مۇحتار اۋەزوۆتىڭ ەسكەرتكىشى – وسى پا­رىزعا ادالدىعىمىزدىڭ تاعى ءبىر كورىنىسى. زاڭعار جازۋشىنىڭ اسىل مۇراسى قازاقپەن بىرگە ماڭگى جاساي بەرەدى. ساۋلەت ونەرىنىڭ تۋىندىسى ەل  يگىلىگىنە اينالسىن», دەپ كورسەتىلگەن.

سونىمەن قاتار مەملەكەتتىك كەڭەسشى جازۋشىنى قالاي ۇلىقتاسا دا جاراساتىنىن ايتىپ, ونىڭ الەم ادەبيەتىنە قوسقان ۇلەسىن اتاپ ءوتتى.

بەلگىلى جازۋشى, مەملەكەتتىك سىيلىقتىڭ لاۋرەاتى تولەن ابدىك رۋحاني ءىس-شارانىڭ كەلەر ۇرپاق ءۇشىن ايرىقشا ماڭىزىن جەتكىزدى. «بۇگىنگى ورناتقان مىنا ەسكەرتكىش جاي ەسكەرتكىش ەمەس. بىزدەن كەيىن دە تالاي ۇرپاق كەلەدى ومىرگە. سوندا وسى ەسكەرتكىشتەرگە قاراپ وتىرىپ قالىپتاسادى. ولاردىڭ كوڭىلىندە, جانىندا تەك قانا ءبىر جاقسىلىقتىڭ, ىزگىلىكتىڭ عانا ءرامىزى بولىپ قالاتىنى داۋسىز», دەدى جازۋشى.

مۇسىنشىلەر ايدوس بۇركىتباەۆ پەن تيمۋر ەرمۇحامەتوۆ جاساعان ساۋلەت ونەرىنىڭ تۋىندىسى ەلورداداعى قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ الدىندا ورناتىلدى.