ەلباسى نازارباەۆ ۋنيۆەرسيتەتتىڭ العاشقى تۇلەكتەرىنە ءسات ساپار تىلەدى
كەشە نازارباەۆ ۋنيۆەرسيتەتتە مەملەكەت باسشىسى نۇرسۇلتان نازارباەۆتىڭ قاتىسۋىمەن العاشقى تۇلەكتەردىڭ وقۋ ءبىتىرۋ ءراسىمى ءوتتى. سالتاناتتى راسىمگە ستۋدەنتتەر, اتا-انالار, سونداي-اق, پروفەسسورلىق-وقىتۋشىلار قۇرامى, ءىرى ۇلتتىق كومپانيالاردىڭ باسشىلارى جانە شاقىرىلعان قوناقتار قاتىستى.
2010 جىلى قازاقستان پرەزيدەنتى ن.ءا.نازارباەۆتىڭ باستاماسىمەن قۇرىلعان نازارباەۆ ۋنيۆەرسيتەت وتاندىق ءبىلىم بەرۋدىڭ ۇزدىك ۇلگىسى بولىپ تابىلادى. العاشقى بولىپ 446 ستۋدەنت ءبىتىردى. ستۋدەنتتەر كوبىنەسە گۋمانيتارلىق جانە الەۋمەتتىك عىلىمدار مەكتەبىندە, عىلىم جانە تەحنولوگيالار مەكتەبىندە, ينجەنەريا مەكتەبىندە, جوعارى ءبىلىم بەرۋ مەكتەبىندە, جوعارى مەملەكەتتىك ساياسات مەكتەبىندە, جوعارى بيزنەس مەكتەبىندە ءبىلىم الدى. كومپيۋتەرلىك عىلىمدار, ينجەنەرلىك مەحانيكا, روبوتتى تەحنيكا جانە مەحاترونيكا, ءبىلىم بەرۋدى باسقارۋ, بيولوگيالىق عىلىمدار, ەلەكترلىك جانە ەلەكتروندىق ينجەنەريا, قۇرىلىس ينجەنەرياسى جانە تاعى باسقا ماماندىقتار ۇلكەن سۇرانىسقا يە.
استانانىڭ سول جاعالاۋىنداعى ۇلكەن داڭعىل جولدىڭ بويىندا ورنالاسقان ۋنيۆەرسيتەت الىستان مەنمۇندالايدى. سارىارقانىڭ تاڭعى سامالى ۋنيۆەرسيتەت قابىرعاسىنان العاشقى بولىپ شىعىپ, ۇلكەن ومىرگە تالپىنعان جاستارىمىزعا ءسات ساپار تىلەگەندەي بوي سەرگىتەدى. جاستار دا, وقىتۋشىلار قۇرامى دا بارىنشا كوڭىلدى.
ولار وزدەرىن قۇتتىقتاۋ ءۇشىن ارنايى كەلگەن ەلباسىن دۋ قول شاپالاقتاپ, ۇلكەن قۇرمەتپەن قارسى الدى.
– قۇرمەتتى پرەزيدەنت مىرزا! ۋنيۆەرسيتەتكە قوش كەلدىڭىز. بۇگىنگى كۇن – ءبىز ءۇشىن ەرەكشە كۇن. ءوزىڭىز نەگىزىن قالاپ, ۇنەمى قامقورشى بولىپ كەلە جاتقان جاڭا ءبىلىم ورداسىنىڭ العاشقى تۇلەكتەرى – ءسىزدىڭ تۇلەكتەرىڭىز ءبىرىنشى رەت وسى ءبىلىم ورداسىن بىتىرەيىن دەپ وتىر. سوندىقتان سولاردىڭ الدىندا اقجولتاي تىلەك ايتۋ ءۇشىن سىزگە ءسوز بەرۋدى وزىمە ۇلكەن قۇرمەت دەپ بىلەمىن, – دەدى ۋنيۆەرسيتەت پرەزيدەنتى شيەگو كاتسۋ.
مەملەكەت باسشىسى ءوز ءسوزىن وسى سالتاناتتى شاراعا قاتىسۋشىلارعا قاراتا وتىرىپ باستادى. ۋنيۆەرسيتەتتى ءبىرىنشى بولىپ بىتىرەيىن دەپ وتىرعان تۇلەكتەردى, ولاردىڭ اتا-انالارىن, قامقورشىلار كەڭەسىنىڭ مۇشەلەرىن, ۋنيۆەرسيتەت باسشىلىعىن, پروفەسسورلار مەن قىزمەتكەرلەردى اتاۋلى شارامەن قۇتتىقتادى. ۋنيۆەرسيتەتتىڭ اياعىنان تىك تۇرۋىنا قارجىلاي جانە تەحنولوگيالىق تۇرعىدان كومەك كورسەتكەن دەمەۋشىلەر مەن مەتسەناتتار قاۋىمىنا دا جەكە العىسىن ءبىلدىردى. تۇلەكتەرگە ديپلومدار تاپسىرۋ تەك بۇل ۋنيۆەرسيتەت قانا ەمەس, بۇكىل ەلىمىز ءۇشىن ماڭىزدى شارا ەكەندىگىن اتاپ كورسەتتى.
– بۇكىل قازاقستانىمىزدىڭ ومىرىنە جوعارى ءبىلىم فلاگمانى – ءبىزدىڭ تاريحىمىزداعى العاشقى الەمدىك دەڭگەيدەگى عىلىم-ءبىلىم ورتالىعىنىڭ ءبىرىنشى تۇلەكتەرى قوسىلايىن دەپ وتىر. ءبىزدىڭ ەلىمىز جاستاردىڭ جاڭا تولقىنىنا, جان-جاقتى دايىندالعان بىلىكتى ماماندارعا يە بولايىن دەپ وتىر. ءبىزدىڭ ۇلت جوسپارى نەگىزىندە مەملەكەتىمىزدى جاڭعىرتۋ باعىتىندا تەرەڭ قايتا قۇرۋلارعا كىرىسكەن قازىرگى ساتىمىزدە بۇل ءتىپتى ەرەكشە ماڭىزدى بولا تۇسەدى, – دەگەن مەملەكەت باسشىسى نازارباەۆ ۋنيۆەرسيتەتتىڭ قۇرىلۋى ارقىلى استانادا جاھاندىق ءبىلىمنىڭ قۋاتتى كوزىنىڭ پايدا بولعاندىعىن اتاپ كورسەتتى. وسىنداي ۋنيۆەرسيتەت قۇرۋ ءوزىنىڭ ۇلكەن ارمانى بولعانىن, بۇگىنگى كۇنى وسى يدەيانىڭ جۇزەگە اسقانىن كورىپ وتىرعانىن مەيىرلەنە ايتتى.
– ول ءبىزدىڭ ەكونوميكامىز بەن ءومىرىمىزدى بىلىممەن, عىلىمي جاڭالىقتارمەن, يننوۆاتسيالارمەن نارلەندىرەتىن بولادى. ول ءبىزدىڭ ادامدارىمىزدى جاقسى جاعىنا قاراي وزگەرتەدى, ولارعا ۇزدىكسىز ءبىلىم الۋدىڭ, كاسىپكەرلىك تۇرعىدان شىڭدالۋدىڭ بەلسەندىلىك پەن ءپاتريوتيزمنىڭ جاڭا داعدىلارىن ورنىقتىرادى. بۇل بۇكىل قازاقستاندى تۇراقتى جانە جاھاندىق تۇرعىدان دامىعان ەلگە اينالدىرۋ ءۇشىن, ءبىزدىڭ ءوز مەملەكەتىمىزدى نىعايتىپ, جاسامپاز ەتە ءتۇسۋىمىز ءۇشىن, ءبىزدىڭ ەلىمىزدىڭ تانىمالدىلىعى مەن بەدەلىن الەم بويىنشا ارتتىرۋ ءۇشىن جاسالىپ وتىر. سوندىقتان سىزدەرگە ومىرگە جولداما بەرە وتىرىپ, ءبىز وسىناۋ ۇلكەن ماقساتىمىزعا شەشىمدى دە باتىل تۇردە جاقىنداي تۇستىك دەپ ەسەپتەيمىن, – دەدى نۇرسۇلتان نازارباەۆ.
قازاقستان پرەزيدەنتى وسى تۇلەكتەرگە ۋنيۆەرسيتەتتىڭ تاريحي تىزىمىندە ءبىرىنشى قاتاردا تۇرۋ قۇرمەتى مەن باقىتىنىڭ بۇيىرعاندىعىنا نازار اۋدارتتى.
– ءدال مىنا سىزدەرگە جانە سىزدەردىڭ ىستەرىڭىزگە قاراپ, ۋنيۆەرسيتەتتەگى دايىندىق دەڭگەيىنە باعا بەرىلەتىن بولادى. بۇل – ەرەكشە جاۋاپكەرشىلىك. مەن سىزدەردىڭ ارقايسىلارىڭىزدان قۋاتتى ەرىك-جىگەر مەن كاسىپقويلىقتى كۇتەمىن. ارينە, سىزدەردىڭ ديپلوم الۋلارىڭىزبەن ءبىلىم الۋلارىڭىز توقتالىپ قالمايدى. ول بۇكىل ءومىر بويى جالعاساتىن بولادى. ءومىردىڭ باستى شىندىعىنا سىزدەر وقۋ بىتىرگەننەن كەيىن عانا كوز جەتكىزەتىن بولاسىزدار. وسىنىڭ سىرىن اشا ءبىلۋدى سىزدەرگە بەس جىل بويى وقىتتى. ەگەر كاسىپ پەن ەڭبەك سىزدەر ءۇشىن بۇكىل ءومىردىڭ ەڭ سۇيىكتى ىسىنە اينالمايتىن بولسا, العان ءبىلىم ۇمىتىلۋى نەمەسە تەز ەسكىرىپ قالۋى مۇمكىن. تەك ناعىز كاسىپ شەبەرلەرى عانا ءوز ءىسىن جەتىك ءبىلىپ قانا قويماي, سونىمەن قاتار, العان ءبىلىمىن ناقتى ىسكە اينالدىرا الادى. مەن ۋنيۆەرسيتەتتىڭ بارلىق تۇلەكتەرى ءدال وسىنداي كاسىپقويلار بولىپ شىعاتىنىنا سەنىممەن قارايمىن, – دەدى مەملەكەت باسشىسى.
بۇل ورايدا, نۇرسۇلتان نازارباەۆ تۇلەكتەر ءوز ءىسىنىڭ شەبەرى عانا بولىپ قويماي, قازاقستان قوعامىنىڭ ادامگەرشىلىك قۇندىلىقتارىن دا جان-جاقتى نىعايتىپ, ءوز وتانىنا قىزمەت ەتۋدىڭ بيىك ۇلگىسىن تانىتاتىنىنا, حالقىمىزدىڭ ماتەريالدىق, رۋحاني جانە مادەني قۇندىلىقتارىن ەسەلەۋ ىسىنە زور ۇلەس قوساتىنىنا ايرىقشا سەنىم ءبىلدىردى.
قازاقستان پرەزيدەنتى ەلىمىزدىڭ ءبىلىم بەرۋ سالاسىنداعى بىرقاتار جەتىستىكتەرىنە توقتالىپ ءوتتى.
– دۇنيەجۇزىلىك ەكونوميكالىق فورۋم جاريالاعان ادامي كاپيتالدى دامىتۋ يندەكسىنە سايكەس, قازاقستان ءبىر جىلدا بىردەن 8 ورىنعا كوتەرىلىپ, 37-ورىنعا شىقتى جانە ەكونوميكالىق ىنتىماقتاستىق جانە دامۋ ۇيىمىنا مۇشە پورتۋگاليا, گرەكيا, يسپانيا, چيلي, مەكسيكا, تۇركيا, سونداي-اق, مالايزيا, قىتاي, برازيليا سياقتى ەلدەردەن وزدى. ەلدىڭ ساۋاتتىلىق دەڭگەيىنىڭ رەيتينگى بويىنشا قازاقستان 33-ورىندى يەلەندى, ال ءبىلىم بەرۋ جۇيەسىنىڭ ساپاسى جونىنەن بىردەن 9 تارماققا كوتەرىلدى. بۇل تابىستارعا سىزدەردىڭ ۋنيۆەرسيتەت تە زور ۇلەس قوستى, – دەدى نۇرسۇلتان نازارباەۆ.
مەملەكەت باسشىسى ۋنيۆەرسيتەت تۇلەكتەرى مەملەكەتىمىزدىڭ جاڭا بۋىن ەليتاسىنىڭ نەگىزى ەكەنىن اتاپ ايتتى.
– ەلدى دامىتىپ, حالىقتى باقىتقا, باق-بەرەكەگە جەتكىزۋ ءىسى سىزدەرگە جۇكتەلەدى. مۇنىڭ قانشالىق قيىن ءىس ەكەنىن مەن جاقسى بىلەمىن. بۇگىنگىدەي جاھاندانۋ جاعدايىندا سىزدەرگە تۇراقتىلىق پەن دامۋ قارقىنىن ۇستاپ تۇرۋدان دا ارتىعىراق ماقساتقا ۇمتىلۋ قاجەت بولادى. سىزدەرگە «باستان اسىپ سەكىرە المايسىڭ» دەپ قانشا جەردەن نىقتاسا دا, بيىك مەجە قويۋعا تۋرا كەلەدى. ەگەر سىزدەردە قازىر بەكەم ءارى باتىل امبيتسيا بولماسا, وندا كەيىن تابىسقا جەتۋ ءۇشىن كۇش-جىگەر تابۋ قيىن بولادى, – دەدى قازاقستان پرەزيدەنتى.
نۇرسۇلتان نازارباەۆ ۋنيۆەرسيتەتتىڭ ديپلوم يەگەرلەرىن جۇمىستا قابىلەتتىلىك, تاپقىرلىق, شيراقتىق تانىتۋعا شاقىردى.
– مەن بىزدە باسقارۋشىلاردىڭ, مەملەكەتتىك قىزمەتشىلەردىڭ, بيزنەسمەندەر مەن قوعامدىق كوشباسشىلاردىڭ جاڭا شوعىرى ءوسىپ كەلە جاتقانىن كورىپ وتىرمىن. كوپ ۇزاماي قازاقستاندىق ماماندار, ەڭ الدىمەن, وسى ۋنيۆەرسيتەتتىڭ تۇلەكتەرى بۇكىل الەمگە ءوزىنىڭ جاڭاشىلدىعىن, باسەكەگە قابىلەتتىلىگىن جانە قاجەتتىلىگىن كورسەتەدى دەپ سەنەمىن. الەمنىڭ جەتەكشى ۋنيۆەرسيتەتتەرىنىڭ تاريحى – ەڭ الدىمەن ونىڭ تۇلەكتەرىنىڭ تابىسىنىڭ تاريحى. بۇل ۋنيۆەرسيتەتتە دە ونىڭ تۇلەكتەرى اتقارعان ۇلى ىستەردىڭ جاھاندىق ايشىقتى تاريحى بولاتىنىنا سەنىمدىمىن, – دەگەن مەملەكەت باسشىسى ءبىر ساتكە تۇلەكتەردىڭ نازارىن وسى ۋنيۆەرسيتەتتىڭ قارسى الدىندا سالىنىپ جاتقان «ەكسپو-2017» حالىقارالىق كورمەسىنىڭ عيماراتتارىنا اۋداردى. بۇل جەردە حالىقارالىق كورمە وتكەننەن كەيىن ول عيماراتتار قۇرىلۋى بەلگىلەنىپ وتىرعان حالىقارالىق قارجى ورتالىعى ءۇشىن قىزمەت ەتەتىندىگىن ەسكە سالىپ ءوتتى. بۇل قارجى ورتالىعى الەمدەگى ەڭ تاڭداۋلى قارجى ورتالىقتارىنىڭ قاعيداتى بويىنشا جۇمىس ىستەيتىن بولادى, دەدى پرەزيدەنت.
– مەن مۇنى وسىناۋ ءبىلىم ورداسىنىڭ قاسىنان بەكەردەن-بەكەر سالدىرىپ وتىرعانىم جوق. سىزدەردىڭ دۇرىس ءبىلىم الۋلارىڭىز ءۇشىن بارلىق قاجىر-قايراتىمىزدى جۇمساپ, جۇمىس ىستەۋدەمىز. سىزدەر ءبىزدىڭ ءىزباسارلارىمىزسىزدار. مەن سىزدەرگە سەنەمىن, – دەدى نۇرسۇلتان نازارباەۆ.
سونىمەن قاتار, ءدال قازىرگى ۋاقىتتا قازاقستاننىڭ الدىندا جاۋاپكەرشىلىگى مول ۇلكەن مىندەتتەردىڭ تۇرعانىن اتاپ كورسەتتى. قازىر ەلىمىزدە كوپتەگەن مەكتەپتەر, ەمحانالار سالىنۋدا. قولجەتىمدى تۇرعىن ءۇي سالۋ ءىسى باستالىپ كەتتى. ەلدىڭ الدىنا الەمنىڭ ەڭ دامىعان 30 ەلىنىڭ قاتارىنا قوسىلۋ سەكىلدى ماڭىزدى ماقسات قويىلعان. ەلباسى وعان دا قول جەتكىزەتىنىمىزگە سەنىم ءبىلدىردى. مىنە, وسىنداي ماقساتقا قول جەتكىزۋدە جاستارعا زور جاۋاپكەرشىلىك جۇكتەلەتىنىن تاعى ءبىر ەسكە سالدى. حالىق اۋزىندا جۇرەتىن مىنا ءبىر ءافسانانى جاستارعا قاراتا وتىرىپ ايتتى:
«ۇلكەن كىسىلەردەن قالعان ءبىر اڭگىمە بار… حالقىمىز كوپ دۇنيەنى بۇركىتپەن بايلانىستىرادى عوي. تۋىمىزدا دا بۇركىت بار. بۇركىت ۇياسىن قۇزدىڭ ەڭ شىڭىنا سالادى. بالاپاندارىنىڭ قاناتى قاتايعان كەزدە تىستەپ الىپ اسپانعا كوتەرىلىپ, جەرگە قۇلاتىپ جىبەرەدى. قاناتىنان تۇرىپ, ۇشىپ كەتكەندەرى امان قالادى, ال ۇشا الماي, جەرگە قۇلديلاپ بارا جاتقانىن ەڭ تومەنگى جاقتان ءىلىپ الىپ, ۇياسىنا اكەلىپ قويادى. بىراق, سودان كەيىن اتا بۇركىت ول بالاپانىنا قارامايدى. دەمەك, سىزدەردىڭ دە بولاشاقتارىڭىز ءوز قولدارىڭىزدا», – دەدى پرەزيدەنت.
نازارباەۆ تۇلەكتەر قايدا جۇرسە دە وتانىنىڭ ءۇمىتىن اقتاۋعا مىندەتتى ەكەنىن جەتكىزدى.
– كەيبىرىڭ شەتەلدىك ۋنيۆەرسيتەتتەرگە باراسىڭدار, باسقا بىرەۋىڭ دۇنيەجۇزىلىك كومپانيالارعا جۇمىسقا ورنالاساسىڭدار. بىراق, مەنىڭ ايتايىن دەگەنىم, سەندەر بىلىكتى مامان رەتىندە قازاقستاننىڭ وركەندەۋىنە قىزمەت ەتۋلەرىڭ كەرەك. وتاننىڭ بەرگەنىن ون ەسە قايتارۋلارىڭ كەرەك. سولاي ەمەس پە!؟ – دەدى مەملەكەت باسشىسى جاستارعا قاراتا. جاستار ەلباسىنىڭ بۇل ساۋالىنا دۋ قول شاپالاقتاۋ ارقىلى وزدەرىنىڭ ونداي ىسكە دايىن ەكەندىكتەرىن تانىتىپ, جاۋاپ قايتاردى.
قازاقستان پرەزيدەنتى بۇل كۇندەرى بۇكىل ەلىمىز بويىنشا مىڭداعان قازاقستاندىق ستۋدەنتتىڭ ديپلوم الىپ جاتقانىنا نازار اۋداردى.
– جوعارى وقۋ ورىندارىنىڭ بارلىق تۇلەكتەرىن قۇتتىقتايمىن, ولارعا ومىردەن لايىقتى ورىندارىن تابۋىن, ساتتىلىك جانە باقىت تىلەيمىن. يۋنيسەف-ءتىڭ باعالاۋى بويىنشا, جاستار دامۋىنىڭ جاھاندىق يندەكسىندە قازاقستان 27-ورىن الىپ وتىر. بۇل فرانتسيا, تۇركيا جانە شۆەتسيا سياقتى ەلدەردىڭ كورسەتكىشىنەن جوعارى. ءبىز قازىرگى اتقارىپ جاتقان ىستەرىمىزدىڭ ءبارىن سىزدەر ءۇشىن, سىزدەردىڭ بولاشاقتارىڭىز ءۇشىن جاساپ جاتىرمىز. بۇگىندە سىزدەردىڭ الدارىڭىزدان بۇكىل الەمگە جول اشىق. سىزدەر قىزىقتى كەزەڭدە ءومىر ءسۇرىپ, بولاشاققا قاراي قارىشتاپ قادام باسقان ەلمەن بىرگە ەرجەتىپ كەلەسىزدەر. وسىنىڭ بارلىعى ءبىزدىڭ قوعامداعى تاتۋلىق پەن تۇراقتىلىقتىڭ ارقاسى. سوندىقتان سىزدەردىڭ باستى ميسسيالارىڭىز – ەلدەگى بىرلىك پەن كەلىسىمدى نىعايتۋ. بارشاعا بەيبىت زامان مەن يگىلىكتى ءومىر جولىن تىلەيمىن, – دەدى نۇرسۇلتان نازارباەۆ.
ستۋدەنتتەر مەن وقىتۋشىلار ۋنيۆەرسيتەتتەگى جاسالعان جاعداي ءۇشىن مەملەكەت باسشىسىنا العىستارىن ايتىپ, كۇش-جىگەرلەرىن ەلدىڭ بۇدان ءارى دامۋ جولىنا جۇمسايتىندارىن جەتكىزدى.
ءسوزىن اياقتاي كەلە, مەملەكەت باسشىسى ۇزدىك تۇلەكتەرگە ديپلوم تابىستادى. ەلباسىنىڭ قولىنان ۇزدىك ديپلوم العاندار قاتارىندا ءاليا جاقسيەۆا, ايسۇلۋ ايتبەكوۆا, انار قاسىموۆا, ادىلەت وتەمىسوۆ, تەمىرلان سەيداحمەتوۆ, جانار شوقاەۆا, ايجان تەمىرباەۆا, التىناي دۇيسەنبەكوۆا, ۆالەنتينا ۆينوكۋروۆا جانە باسقالار بولدى.
وسى كۇنى قولدارىنا ديپلومدارىن الىپ, ەلىمىزدەگى جاڭا تۇرپاتتى ءبىلىم ورداسىن ءبىتىرىپ وتىرعان تۇلەكتەر اتىنان ءسوز العان نازارباەۆ ۋنيۆەرسيتەتتىڭ ينجەنەريا مەكتەبىنىڭ تۇلەگى ايسۇلۋ ايتبەكوۆا وزدەرىنىڭ ءومىر جولدارى ءۇشىن وسىنداي مۇمكىندىكتى ۇسىنعان مەملەكەت باسشىسىنا, ۇستازدار قاۋىمىنا, اتا-انالارىنا العىس ءبىلدىردى. ول الماتىداعى جاۋتىكوۆ اتىنداعى مەكتەپتى التىن بەلگىمەن بىتىرگەن ەكەن. «الايدا, ءدال وسىدان بەس جىل بۇرىن مەن ءوزىمنىڭ بولاشاعىمنىڭ قالاي قالىپتاساتىندىعىن بىلگەنىم جوق. ەندى ءبىراز جايتتى انىقتاعانداي بولىپ وتىرمىن. بىلتىرعى جىلى اقش-تىڭ كاليفورنيا شتاتىنداعى سانتا-باربارادا گرانتپەن وقۋ مۇمكىندىگىنە يە بولدىم. قازاقستان رەسپۋبليكاسى پرەزيدەنتىنىڭ ارنايى ستيپەندياسىن, شەۆرون كومپانياسىنىڭ ستۋدەنتتىك زەرتتەۋ گرانتىن جەڭىپ الدىم. مەنى پرينستون, ستەنفورد ۋنيۆەرسيتەتتەرى جانە باسقا دا قۇزىرلى ورىندار وقۋعا جانە قىزمەت ىستەۋگە شاقىرىپ وتىر. ءوزىم ماسساچۋسەتستەگى تەحنولوگيالىق ۋنيۆەرسيتەتتە ءبىلىمىمدى جالعاستىرامىن دەپ شەشتىم. وسىنىڭ بارلىعىنا نازارباەۆ ۋنيۆەرسيتەتتە وقۋ ارقىلى يە بولعانىمدى ەشۋاقىتتا ۇمىتپايمىن. مەن بۇل وقۋ ورنىن كوتەرىڭكى كوڭىل-كۇي, ۇلكەن رۋحپەن ءبىتىرىپ بارامىن. قۇرمەتتى نۇرسۇلتان ءابىش ۇلى, ۇستازدارىم مەن اتا-انام! سىزدەرگە ەرەكشە العىسىمدى بىلدىرەمىن. ەلىمنىڭ ماعان جاساعان جاقسىلىعىن ءجۇز ەسە ەتىپ قايتارامىن دەگەن سەنىمدەمىن», دەدى ا.ايتبەكوۆا.
ءسوز كەزەگىن العان نازارباەۆ ۋنيۆەرسيتەتتىڭ جوعارى بيزنەس مەكتەبىنىڭ تۇلەگى قازىبەك اۋباكىروۆ تە ءوز ءسوزىن ەلباسىنا, پروفەسسورلىق-وقىتۋشىلار قۇرامىنا العىس ايتۋدان باستادى. «بىزدەر باقىتتى قازاقستاننىڭ باقىتتى جاستارىمىز. بىزگە جاقسى ءبىلىم بەرۋگە جاندارىن سالىپ جۇمىس ىستەگەن ۋنيۆەرسيتەت پرەزيدەنتى شيگەو كاتسۋ مىرزا باستاعان بارلىق وقىتۋشىلارمەن قاتار, قولايلى جاعداي جاساعان اكىمشىلىك قىزمەتكەرلەرىنە دە ۇلكەن راحمەت. ءبىز سىزدەردىڭ الەمگە جىبەرىپ وتىرعان ەلشىلەرىڭىزبىز. ءبىز ۋنيۆەرسيتەت قابىرعاسىندا ءجۇرىپ, عىلىمي جۇمىستارمەن شۇعىلدانۋ مۇمكىندىگىنە يە بولدىق. جۇرەك اۋرۋلارىن ايقىنداپ ەمدەۋگە ارنالعان جاڭا تەحنولوگيالىق قۇرالدى ويلاپ تاپتىق. ەندى ول وندىرىستىك نەگىزدە شىعارىلاتىن بولادى. قۇرالدا مىندەتتى تۇردە «قازاقستاندا جاسالعان» دەگەن ءسوز تۇرادى. ءسويتىپ, نازارباەۆ ۋنيۆەرسيتەت ونىڭ قابىرعاسىندا ءجۇرىپ-اق كاسىپتىك تۇرعىدان دامۋىمىزعا جاقسى قولايلى جاعداي تۋعىزدى. سونىمەن قاتار, قاراپايىم سوزبەن ايتساق, وسى ۋنيۆەرسيتەتتى ءبىتىرىپ وتىرعان جاستار دا «قازاقستاندا جاسالعان» دەگەن برەندكە اينالاتىندىعىنا سەنىمىم زور», دەدى ق.اۋباكىروۆ.
نازارباەۆ ۋنيۆەرسيتەت قازاق ءتىلى, مادەنيەتى جانە ادەبيەتى بولىمشەسىنىڭ مەڭگەرۋشىسى پروفەسسور گۇلتاس قۇرمانباي ءوز ءسوزىن ولەڭمەن ورنەكتەدى. ونىڭ:
«مەنىڭ ەلىم ەجەلدەن-اق قاسيەتكە ءمان بەرگەن,
شىبىق ەمەس, بايتەرەك دەپ ورىن تىككەن بۇل جەردەن.
تەرەڭ تامىر, بيىك شىنار ۇلگى بولسىن جاستارعا,
قاسيەتىن ۇمىتپايىق, كيەلى عوي بۇل مەكەن.
ءبىلىم دەگەن عۇمىرىڭنىڭ جانىپ تۇرعان شىراعى,
تۋعان جەرىڭ, تۋعان ەلىڭ جەر بىتكەننىڭ جۇماعى.
الەمدى ءيىپ الدىڭا اكەپ, عىلىم-ءبىلىم ۇيرەتكەن,
سەندەرسىڭدەر ءۇمىت ارتقان ەلباسىنىڭ ۇلانى»,
– دەگەن شۋماقتارى ەسىمىزدە قالدى.
شارا ەلباسىنىڭ ۋنيۆەرسيتەت بىتىرگەن تۇلەكتەرمەن بىرگە سۋرەتكە تۇسۋىمەن اياقتالدى.
سۇڭعات ءالىپباي,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.