رەجيسسەر اسحات كۋچينچيرەكوۆتىڭ «باۋىرىنا سالۋ» ءفيلمى وسكار كوميتەتىنىڭ «International Feature Film» اتالىمىنا ۇسىنىلدى. كوركەم تۋىندى جۋىردا عانا «تۇلپار» ۇلتتىق سىيلىعىن يەلەنگەن ەدى. ايتا كەتەيىك, اتالعان فيلم مادەنيەت جانە اقپارات مينيسترلىگى مەن ۇلتتىق كينونى قولداۋ ورتالىعىنىڭ قولداۋىمەن ءتۇسىرىلدى.
امەريكا اكادەمياسىنىڭ داۋىس بەرۋى ءۇش كەزەڭدە وتەدى. 9-13 جەلتوقسان ارالىعىندا اكادەميكتەر شورتليست جاساقتايدى, ول 17 جەلتوقساندا جاريالانادى. داۋىس بەرۋ 8-12 قاڭتار ارالىعىندا وتەدى. ونىڭ قورىتىندىسى بويىنشا 17 قاڭتاردا بارلىق ساناتتاعى نومينانتتار بەلگىلى بولادى. ال ءۇشىنشى – سوڭعى كەزەڭ 11-18 اقپان ارالىعى.
جەڭىمپازداردىڭ ەسىمى 2 ناۋرىزدا لوس-اندجەلەستە كونۆەرتتەردى اشۋ سالتاناتىندا جاريالانادى. ەگەر فيلم نومينانت رەتىندە ۇسىنىلسا, رەجيسسەر شاقىرتۋ الادى. «International Feature Film» ساناتىنداعى مۇسىنشەدە مەملەكەت پەن ءفيلمنىڭ اتاۋى, رەجيسسەردىڭ ەسىمى كورسەتىلەدى.