اگرارلىق سالانى قارجىلاندىرۋ شاراسى مەن اگروونەركاسىپ كەشەنى (اوك) سۋبەكتىلەرىن جەڭىلدەتىلگەن نەسيەمەن قامتۋ قولعا الىنىپ جاتىر. ول ءۇشىن بىرقاتار ناقتى جوبا جۇزەگە اسىرىلا باستادى.
ۇكىمەت قولداۋىمەن ەگىستىك جانە جيناۋ جۇمىسىنا جىلىنا 5% مولشەرلەمەمەن 580 ملرد تەڭگە بولىنەدى. ونىڭ ىشىندە 100 ملرد تەڭگەسى جەڭىلدەتىلگەن ليزينگكە باعىتتالعان. «دامۋ» قورى نەسيە سوماسىنىڭ 85%-ىن كەپىلدەندىرۋگە مۇمكىندىك بەرەدى. اۋىل شارۋاشىلىعى ۆيتسە-ءمينيسترى ەربول تاسجۇرەكوۆتىڭ ايتۋىنشا, فەرمەرلەردىڭ جەڭىلدەتىلگەن مولشەرلەمەمەن ليزينگكە تەحنيكا الۋ مۇمكىندىگىنەن باسقا, كەيىننەن ينۆەستيتسيالىق سۋبسيديالاۋ تەتىگى شەڭبەرىندە 30% وتەماقى الۋ مۇمكىندىگى بار.
«بيىل ۇكىمەت 2028 جىلعا دەيىن اۋىل شارۋاشىلىعى ونىمدەرىن وڭدەۋدى دامىتۋدىڭ كەشەندى جوسپارىن قابىلدادى. جاقىندا اۋىل شارۋاشىلىعى ونىمدەرىن وڭدەۋمەن اينالىساتىن كاسىپورىندار قاتىسا الاتىن جاڭا جەڭىلدەتىلگەن نەسيەلەندىرۋ باعدارلاماسى ىسكە قوسىلادى. ولار 5% مولشەرلەمەمەن نەسيەلەردى وتاندىق شيكىزات ساتىپ الۋ ءۇشىن پايدالانا الادى. قازىرگى ۋاقىتتا وسى ماقساتقا 30 ملرد تەڭگە ءبولۋ ماسەلەسى قاراستىرىلىپ وتىر», دەدى ە.تاسجۇرەكوۆ.
ونىڭ سوزىنشە, 2025 جىلدان باستاپ اگروونەركاسىپتىك كەشەنى سۋبەكتىسى سۋبسيديا الۋعا ءوتىنىم بەرمەي, بىردەن ارزانىراق نەسيە الۋعا مۇمكىندىك اشىلىپ, قارجى ينستيتۋتتارىن تىكەلەي سۋبسيديالاۋ باستالادى.