مەملەكەت باسشىسى قاسىم-جومارت توقاەۆتىڭ پارلامەنتتىڭ كەزەكتى سەسسياسىنىڭ اشىلۋىندا «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىن جاريالادى. ماڭىزدى جيىندا پرەزيدەنت بارشا حالىق قالاۋلىلارىنا ەلمەن ەتەنە ارالاسىپ, مۇڭ-مۇقتاجدارىمەن تانىسىپ جۇرگەنى ءۇشىن ەرەكشە ريزالىعىن ءبىلدىردى.
جولداۋدىڭ ءمان-مازمۇنى – ءار ازاماتقا تەڭدەي مۇمكىندىك بەرەتىن وركەنيەتتى ادىلەتتى قازاقستاندى قۇرۋ. مىنە, بۇگىندە پرەزيدەنت باستاماسىمەن بىرقاتار جۇمىس ىسكە اسىرىلدى. اتاپ ايتساق, كەلەشەك ۇرپاقتى تاربيەلەيتىن بىلىكتى ۇستازداردىڭ جالاقىسى 2000 جىلدان بەرى ەكى ەسە ءوستى. دارىگەرلەردىڭ ايلىعى دا ايتارلىقتاي كوبەيدى. وتانداستارىمىزعا زەينەتاقى جيناعىنىڭ ءبىر بولىگىن پايدالانۋ مۇمكىندىگى بەرىلدى.
جاڭا جىلدان باستاپ بالالاردىڭ ەسەپشوتىنا قاراجات تۇسە باستادى. سونداي-اق «حالىق ۇنىنە قۇلاق اساتىن مەملەكەت» قاعيداتى ناقتى ىسكە اسىرىلىپ, جۇيەلى جالعاسىپ كەلەدى.
بۇعان قوسا «جايلى مەكتەپ» جوباسى اياسىندا 2025 جىلعا دەيىن 800 مىڭ بالانىڭ زاماناۋي مەكتەپتە وقۋىنا جاعداي جاسالادى. وسىلايشا اپاتتى جاعدايداعى جانە ءۇش اۋىسىمەن وقيتىن مەكتەپ ماسەلەسى تولىق شەشىلەدى دەپ جوسپارلانىپ وتىر. قازىر ەلىمىزدە دەنساۋلىق ساقتاۋ نىساندارى سالىنىپ جاتىر. ۇلتتىق جوبا اياسىندا 32 اۋداندىق اۋرۋحانا زامانعا ساي جاڭارىپ كەلەدى.
پرەزيدەنت 2025 جىلعا دەيىن جەرگىلىكتى جولداردىڭ كەمىندە 95 پايىزىن جاقسارتۋ جونىندە تاپسىرما بەرگەنىن جەتكىزدى. بۇعان قوسا ساربازداردىڭ قاۋىپسىزدىگىن قامتاماسىز ەتۋ جانە ولاردىڭ ءوز مىندەتتەرىن ورىنداۋى ءۇشىن جاعداي جاساۋ اسكەر باسشىلىعىنىڭ جاۋاپكەرشىلىگىندە ەكەنىن ايتتى. قاسىم-جومارت توقاەۆ قارۋلى كۇشتەردە ساربازدار ءوز وتانىنا لايىقتى قىزمەت ەتۋى ءۇشىن زاڭ مەن ءتارتىپتى قاتاڭ ساقتاۋ قاجەتتىگىنە نازار سالدى.
«جاستار اسكەرگە وتان الدىنداعى بورىشىن وتەۋگە بارادى. جاس ساربازدارىمىز ءوز مىندەتىن الاڭسىز ورىنداۋى ءۇشىن اسكەر قاتارىندا, ەڭ الدىمەن, تەمىردەي ءتارتىپ بولۋعا ءتيىس. قارۋلى كۇشتەر مەن باسقا دا كۇشتىك قۇرىلىمدار وسى تالاپتى مۇلتىكسىز ورىنداۋى قاجەت. ءار اتا-انا اسكەرگە كەتكەن بالاسىن مەملەكەتكە سەنىپ تاپسىرادى. سوندىقتان ساربازداردىڭ دەنساۋلىعى مەن قاۋىپسىزدىگىنە, ەڭ الدىمەن, ارميا باسشىلىعى جانە قۇقىق قورعاۋ مەكەمەلەرىنىڭ باسشىلارى جاۋاپتى», دەپ ناقتىلادى ق.توقاەۆ.
جالپى, مەملەكەت اسكەري قىزمەتشىلەرگە مەيلىنشە قامقورلىق جاساپ كەلەدى. ولارعا اي سايىنعى تۇرعىن ءۇي تولەمدەرى, باسپانانى جەكەشەلەندىرۋدىڭ ورنىنا اقشالاي وتەماقى تولەۋ جالعاسىپ جاتىر. اسكەري قىزمەتشىلەرگە تۇرعىن ءۇي تولەمدەرىن جۇزەگە اسىرۋ نەگىزگى الەۋمەتتىك قولداۋ بولىپ ەسەپتەلىنەدى.
الماگۇل مۋسينا,
الماتى وبلىسى قوناەۆ قالاسى 65476 اسكەري ءبولىمىنىڭ مەملەكەتتىك ءتىلدى دامىتۋ جونىندەگى مامانى