تىرشىلىكتىڭ كۇرەتامىرى

جولدىڭ جايى جاقسارىپ كەلەدى

پرەزيدەنت تاپسىرماسىن مۇلتىكسىز ورىنداۋ ءۇشىن جەرگىلىكتى جەردە بىرقاتار ءىس اتقارىلىپ جاتىر. سوڭعى جىلدارى جول اپاتى جيىلەدى. ماسەلەنىڭ مانىسىنە تەرە­ڭىرەك كوز جەتكىزۋ ءۇشىن اقمولا وب­لىسىنىڭ جولاۋشىلار كولiگi جانە اۆتو­موبيل جولدارى باسقارماسى وڭىردەگى جولدىڭ جايىن ءجىتى باقىلاپ, قاۋىپ-قاتەردىڭ قاي تۇستا ەكەندىگىن ءتۇسىندىرۋ جۇمىستارىن جۇرگىزەدى. بۇل جۇمىسقا كولىك پروكۋراتۋراسى, پوليتسيا قىزمەتكەرلەرى, كولىكتى باقىلاۋ ينسپەكتسياسىنىڭ وكىلدەرى تارتىلعان. وتكەن جىلى وڭىردەگى كولىك جولدارىندا قوزعالىس ەرەجەسىن بۇزعان جولاۋشىلارعا پوليتسيا 846 ماتەريال تولتىردى. بيىلعى جىلى جول-كولىك وقيعاسىنىڭ الدىن الۋ ءۇشىن ءتارتىپ بۇزعاندارعا 144 حاتتاما تولتىرىلىپ, شارا قولدانىلدى. وسى ارادا جولاۋشى تاسىمالدايتىن جۇرگىزۋشىلەردىڭ ءتارتىپ بۇزۋداعى ۇلەس سالماعى 36 پايىزعا ءوسىپ وتىرعانىن ايتا كەتۋىمىز كەرەك.

– جول اپاتىنىڭ الدىن الۋ ءۇشىن ەڭ الدىمەن جولدىڭ جايىن جاقسارتۋ مىندەت. بيىل جەرگىلىكتى ماڭىزداعى جولدى سالۋعا جانە جوندەۋگە 71,5 ميلليارد تەڭگە قاراجات قاراستىرىلعان, – دەيدى وبلىستىق جولاۋشىلار كولiگi جانە اۆتوموبيل جولدارى باسقارماسىنىڭ باسشىسى ۆلاديمير كۋلاكوۆ, – بۇل تاراپتا 130 جوبا جۇزەگە اسىرىلماق. بولىنگەن قارجىنىڭ 20,4 ميلليارد تەڭگەسى رەسپۋبليكالىق بيۋدجەتتەن, 46,4 ميللياردى وبلىستىق بيۋدجەتتەن جانە 4,7 ميللياردى اۋداندىق بيۋدجەتتەن باعىتتالىپ وتىر.

بار جۇمىس تياناقتى جۇزەگە اسىرىل­عان كەزدە 500 شاقىرىم جول جون­دەل­مەك. قۇرىلىس-مونتاج جۇمىستارى «جەر­گىلىكتى ماڭىزداعى اۆتوموبيل جولدارى­نىڭ قۇرىلىسى جانە جوندەۋ», «استانا قالاسى ماڭىنداعى ەلدى مەكەندەردى الەۋمەتتىك-ەكونوميكالىق دامىتۋدىڭ كەشەندى باعدارلاماسى», «وڭىرلەردى دامىتۋ», «اۋىل – ەل بەسىگى»,  «ششۋچە-بۋرا­باي كۋرورتتى ايماعىن دامىتۋ» ءتا­رىزدى بىرنەشە باعدارلامالار ارقى­لى اتقارىلىپ جاتىر. وبلىستىق ماڭى­زى بار اۆتوموبيل جولدارىنىڭ قۇرى­لىسى جانە جوندەۋ باعدارلاماسى شەڭبەرىندە وسى جىلى جالپى قۇنى 20,4 ميلليارد تەڭگە بولاتىن 23 جوبا جۇزەگە اسىرىلماق. وڭىردە كۇردەلى جانە ورتاشا جول جوندەۋ بارىسىنداعى ءىرى جوبالاردى يگەرۋ جالعاسادى. ماسەلەن, «ششۋچينسك – ستەپنياك – ءۋاليحانوۆ», «استانا قالاسىنان سارىوبا ستانساسىنا دەيىنگى شىعىس جول ورامى», «باباتاي – ۆولگودونوۆكا – بەرەكە – بۇلاقساي», «نوۆىي كولۋتون – اقكول – ازات – مينسكوە», «ششۋچينسك – نيكولاەۆكا», «بۋراباي – قوتىركول», «قورعالجىن – ارىقتى –سابىندى», «جاقسى – دەرجاۆينسك», «ەسىل – سۆوبودنوە – رازدولنوە», «جولىمبەت – شورتاندى – پريگورودنوە» جانە باسقا باعىتتاردا جۇمىس ءجۇرىپ جاتىر. قالا جانە اۋدان اكىمدىكتەرىنە 116 جوبانى جۇزەگە اسىرۋعا 46,7 ميلليارد تەڭگە قاراجات بولىنگەن.

جول ساپاسىن قاداعالاۋ وتە ماڭىز­دى. بۇل تاراپتا دا ايتىلىپ جاتقان سىن-ەسكەرتپەلەر از ەمەس. پرەزيدەنت بيىلعى جولداۋىندا «وسى سالاعا جا­ۋاپتى مەكەمە اۆتوكولىكتەردىڭ تەحنيكا­لىق جاعدايىنا ءتيىستى باقىلاۋ جاساۋى قاجەت» دەگەن بولاتىن. جول بويىنداعى قۇرىلىس مونتاج جۇمىستارىنىڭ ساپالى ورىندالۋىنا قول جەتكىزۋ ءۇشىن وبلىستىق جانە اۋداندىق بيۋدجەتتەردەن جول اكتيۆتەرىنىڭ ساپاسىن قاداعالايتىن ۇلتتىق ورتالىققا 215 ميلليون تەڭگە قاراجات قاراستىرىلعان. ولار جول بويىنداعى بارلىق جۇمىستى تۇراقتى باقىلاۋ ۇستىندە.

جايلى مەكتەپتىڭ كوشەسى دە جايلى بولۋى كەرەك

وڭىردەگى «جايلى مەكتەپ» ۇلتتىق جوباسىن جۇزەگە اسىرۋ بارىسىندا 2024-2025 جىلدارى 18 مەكتەپتىڭ قۇرىلىسى جۇزەگە اسىرىلادى دەپ مەجەلەنىپ وتىر. بيىل وبلىستا بىرنەشە مەكتەپ پايدالانۋعا بەرىلدى. جايلى مەكتەپتىڭ جولى دا بۇگىنگى كۇن تالابىنا ساي بولۋى كەرەك. اقمول, قاراوتكەل, تالاپكەر ەلدى مەكەندەرىندەگى 4 مەكتەپكە بارار جول زامان تالابىنا تولىق جاۋاپ بەرەرلىك دەڭگەيدە. قاراجار, قابانباي باتىر, قوياندى ءتارىزدى ەلدى مەكەندەردەگى 5 جايلى مەكتەپتىڭ جولى قىركۇيەك ايىنىڭ سوڭىنا دەيىن تولىق اياقتالماق. كوكشەتاۋ, قوسشى قالالارى مەن ارشالى, بۋراباي, تسەلينوگراد جانە شورتاندى اۋداندارىندا جوبالاۋ-سمەتالىق قۇجاتتارىن جاساۋ باستالىپ, جول 2025 جىلى اياقتالماق.

وڭىردەگى جول جايىنا كوكتەمگى سۋ تاسقىنى كەرى اسەرىن تيگىزدى. ەرىگەن قار سۋى رەسپۋبليكالىق جانە جەرگىلىك­تى ماڭىزداعى جول بويىنىڭ 141 تۇ­سىن زاقىمدادى. جەرگىلىكتى ماڭىزداعى 40 اۆتو­موبيل جولى زارداپ شەكتى. تۇتاستاي العاندا 20 شاقىرىم جەردىڭ جولى ءب ۇلىندى. 3 كوپىر جوندەۋدى قاجەت ەتەدى. جولداردىڭ ب ۇلىنۋىنەن 38 ەلدى مەكەنمەن قاتىناس ءۇزىلىپ قالعان بولاتىن. قازىر جۇمىستى جەدەل ۇيىمداستىرۋدىڭ ارقاسىندا سۋ تاسقىنى كەزىندە قاتىناس ءۇزىلىپ قالعان ەلدى مەكەندەرگە بارار جول قالپىنا كەلتىرىلدى. ايتسە دە, 15 جول تەلىمىندە جۇمىس ءىشىنارا عانا اتقارىلدى. وسىعان بايلانىستى ۇكىمەت قورىنان 4,8 ميلليارد تەڭگە قاراجات ءبولىنىپ, استراحان, اتباسار, ەسىل, جارقايىڭ اۋداندارى مەن كوكشەتاۋ قالاسىندا 15 جوبا جۇزەگە اسىرىلىپ جاتىر.

جولاۋشىلار تاسىمالى تالاپقا ساي ما؟

جامان تۇماۋ جايلاعان قاتەرى مول ۋاقىتتا ءۇزىلىپ قالعان 130 قالاارالىق باعىتتىڭ 17-ءسى قالپىنا كەلتىرىلدى. بۇل سالا قاتەرلى اۋرۋ جايلاعان كەزدە قاتتى شىعىنعا ۇشىرادى. قالىپقا كەلتىرۋ دە وڭاي ەمەس. ايتسە دە مەملەكەت تاراپىنان كومەك كورسەتىلىپ جاتىر. قازىرگى كۇنى وبلىس ورتالىعى مەن ششۋچينسك قالاسىندا اۆتوبەكەتتەر جۇمىس ىستەيدى. ستەپنوگورسك, ەسىل, ستەپنياك قالالارىندا جولاۋشىلارعا قىزمەت كورسەتەتىن ورىندار بار. وڭىردە  جولاۋشىلاردىڭ ءجۇرىپ-تۇرۋى 106 باعىت بويىنشا ۇيىمداستىرىل­عان. ونىڭ 54-ءى قالاارالىق بولسا, 14 قالا ماڭىنداعى, 21-ءى اۋدان ىشىندەگى باعىتتار. جولاۋشىلاردىڭ تالاپ-تىلەگىنە وراي كىسى كوپ جۇرەتىن وزگە وڭىر­لەرگە دە تاسىمالداۋ ۇيىم­داستى­رىلىپ وتىر.

قىزمەت كورسەتۋشى مەكەمەلەر ءىشىنارا سۋبسيديا ارقىلى شىعىندارىن جاۋىپ وتىر. وبلىستىق ءماسليحات­تىڭ شەشىمىنە وراي ماڭىزدى باعىت­تار­عا باسىمدىق بەرىلگەن. قالاىشى­لىك باعىتتاعى جولاۋشىلاردىڭ تولەماقىسى 60 تەڭگەدەن 110 تەڭگەگە دەيىن. سوڭعى ءۇش جىل ىشىندە قوعامدىق كولىككە قۇيىلعان ينۆەستيتسيا كولەمى 3,5 ميلليارد تەڭگەنى قۇرادى. بيىل ماڭىزدى باعىتتارعا 1,9 ميلليارد تەڭگە سۋبسيديا تولەنبەك. قوعامدىق كولىكتى جاڭارتۋ جۇمىستارى دا جۇرگىزىلىپ كەلەدى. جىل باسىنان بەرى جولاۋشى تاسىمالداۋشىلار باسقارما مەن اكىمدىكتەردىڭ دەمەۋىنىڭ ارقاسىندا 24 اۆتوبۋسقا يە بولدى. بۇل جۇمىس ءالى دە جالعاسادى.

اقمولا وبلىسى