ەلوردا تورىندە ءوتىپ جاتقان Astana Media Week-2024 اپتالىعىنىڭ ەكىنشى كۇنىندە «مەديا مامانداردى دايارلاۋ: نە كۇتەمىز/نە الامىز» اتتى سەسسيا ءوتتى, دەپ حابارلايدى Egemen.kz.
اتالعان سەسسيانى MSc in Communications Northwestern University كوممۋنيكاتسيا بويىنشا مامانى, ABCommunications Kazakhstan اگەنتتىگىنىڭ ديرەكتورى باحىت امانجولقىزى اشتى.
سەسسيا بارىسىندا حالىقارالىق جۋرناليستيكا مەكتەپتەرىنىڭ ديرەكتورلارى, ەلىمىزدىڭ ۇزدىك جوعارى وقۋ ورىندارىنىڭ دەكاندارى مەن سالانىڭ تاجىريبەلى وكىلدەرى زاماناۋي جۋرناليستيكا قانداي ماماندارعا ءزارۋ ەكەنىن ءتۇسىندىردى.
العاش بولىپ ءسوز سويلەگەن «Qazcontent» اق باسقارما توراعاسى اينا زادابەك ءوزى باسشىلىق ەتەتىن كومپانيادا 7 اقپاراتتىق رەسۋرس بىرىگىپ جۇمىس ىستەپ جاتقانىن تىلگە تيەك ەتتى.
ء«بىز ءوزىمىزدىڭ ساپىمىزعا مامان قوسۋ الدىندا جاس جۋرناليستەردى ىرىكتەۋدەن وتكىزەمىز. ولاردىڭ جان-جاقتىلىعىنا, ساۋاتىنا, ءبىلىم دەڭگەيىنە, ادامي قۇندىلىقتارىنا مىندەتتى تۇردە نازار اۋدارامىز.
بۇگىندە شىنىمەن دە جاقسى مامان تابۋ وتە قيىن. سەبەبى ولاردىڭ تاربيەسى مەن ءبىلىمى تەك ءبىر ادامنىڭ قولىندا عانا ەمەس. جاس ماماندار مەكتەپتەن باستاپ جوعارى وقۋ ورنىندا دايارلانادى. ول جەردەگى ۇستازدار مەن پروفەسسورلاردىڭ بىلىكتىلىگى دە ماقتانارلىق دەڭگەيدە بولۋ قاجەت. دەمەك, بارلىعى ءبىر بىرىمەن بايلانىستى ەكەنىن اڭعارامىز. دەمەك, ساپالى كونتەنت ۇسىناتىن جۋرناليستەردى دايارلاۋ ىسىندە جاڭاشىلدىق پەن حالىقارالىق تاجىريبە كەرەك», دەدى سەسسيا سپيكەرى.
ال MNU ۋنيۆەرسيتەتى حالىقارالىق جۋرناليستيكا مەكتەبىنىڭ دەكانى ايگۇل جامالوۆا جاس ماماندارعا زاماناۋي ءبىلىم بەرۋ قاعيدالارىنا ءبىرشاما وزگەرىس ەنگىزىلگەنىن اتاپ ءوتتى. ونىڭ ايتۋىنشا, ەلىمىزدىڭ ەڭ ۇزدىك زاڭ ۋنيۆەرسيتەتىندە حالىقارالىق جۋرناليستيكا مەكتەبى دە اشىلىپ, ءبىلىم سالاسىنداعى ءتيىمدى ترەندتەردى ۇسىنىپ وتىر.
ء«بىزدىڭ وقۋ وردامىزدا, اسىرەسە ۋنيۆەرسيتەتتىڭ جۋرناليستيكا مەكتەبىندە ءبىلىم باعدارلاماسى تۇبەگەيلى وزگەرىپ جاتىر. ءبىزدىڭ پروفەسسورلارىمىز قازىرگى جۋرناليستيكا نارىعىنداعى كادرلار دايىنداۋدىڭ جاڭا ترەندتەرىن ەسكەرىپ, بولاشاق مامانداردىڭ ءبىلىمىن ءتيىمدى ادىستەرمەن جەتىلدىرەدى.
جالپى, مامانداردى دايارلاۋ ىسىندە تۇلەكتەردى ىرىكتەۋ كەزەڭىنە ەرەكشە نازار اۋدارۋ قاجەت دەپ ەسەپتەيمىن. سەبەبى جاس تۇلەكتەردىڭ كوپشىلىگى ۇبت تاپسىرۋ كەزىندە بارلىق پاندەردى تاپسىرماي, شىعارماشىلىق ەمتيحاننان ءوتۋ ارقىلى گرانتقا وڭاي قول جەتكىزگىسى كەلەتىنى جاسىرىن ەمەس. سوندىقتان تۇلەكتەردى دۇرىس ىرىكتەپ الۋ قاجەت. ودان بولەك, ۋنيۆەرسيتەتتەردە تەوريالىق ساباقتاردان باس تارتىپ, پراكتيكالىق ساباقتارعا كوپ كوڭىل بولگەن ءجون.
ماسەلەن, مەن دەكان رەتىندە جاس ماماننىڭ بويىندا 5 نەگىزگى قاسيەت قالىپتاسقانىن قالايمىن, ولار: بىرەگەيلىك, مەديا قاۋىمداستىققا ءسىڭۋ, سالالىق جۋرناليستيكاعا بەيىمدەلۋ, ساراپتاما جۇرگىزۋ جانە ەكستراوردينارلىققا ۇمتىلۋ. ءوزىمىزدىڭ ستۋدەنتتەرىمىزگە دە بۇل تۋرالى ۇنەمى ايتىپ جۇرەمىز», دەدى ايگۇل جامالوۆا.
ودان بولەك, سەسسيا بارىسىندا فيلوسوفيا عىلىمدارىنىڭ كانديداتى, دوتسەنت ءارى Internews مەديا ساۋاتتىلىق جونىندەگى بۇرىنعى كەڭەسشىسى گۇلنار اسانباەۆا جاساندى ينتەللەكتتەگى ساۋاتتىلىق تاقىرىبىن قوزعادى. ونىڭ ايتۋىنشا, جۋرناليستەر زامان تالابىنا ساي جاساندى ينتەللەكت ۇسىناتىن مۇمكىندىكتەردى كەڭىنەن پايدالانۋ كەرەك.
سونداي-اق سەسسيادا ارداگەر جۋرناليست قاينار ولجاي, «حالىقارالىق باعدارلامالار ورتالىعى» اق باسقارما توراعاسى ءاليا وسپانوۆا, «مەديا دامىتۋ قورى» كق باس ديرەكتورىنىڭ ورىنباسارى اسەل سەرىكباەۆا تاجىريبەلەرىن ءبولىسىپ, وتكىر پىكىرلەرىن ءبىلدىردى.