استانادا ۇلتتىق مۋزەيدىڭ 10 جىلدىعىنا ارنالعان قازاقستان مۋزەي كونگرەسى ءوتتى. جيىنعا 12 ەلدەن 100-دەن اسا زەرتتەۋشى مەن مۋزەي قىزمەتكەرى قاتىستى. اۋقىمدى ءىس-شارا اياسىندا مادەنيەت جانە اقپارات ءمينيسترى ايدا بالاەۆا لۋۆر مۋزەيىنىڭ يسلام ونەرى دەپارتامەنتىنىڭ ديرەكتورى سۋرايا نۋدجايىممەن, فرانتسيانىڭ قازاقستانداعى توتەنشە جانە وكىلەتتى ەلشىسى سيلۆان گيوگەمەن كەزدەسۋ وتكىزدى.
تاراپتار قازاقستان مەن فرانتسيا اراسىنداعى مادەني بايلانىستاردى نىعايتۋ, ىنتىماقتاستىقتى كەڭەيتۋ ماسەلەلەرىن تالقىلادى. مينيستر ەكى ەلدىڭ تاريحي-مادەني مۇراسىن زەرتتەۋ اياسىندا استانا مەن پاريج اراسىنداعى عىلىمي-زەرتتەۋ جۇمىسىنداعى ارىپتەستىكتى ودان ءارى نىعايتۋدى ۇسىنىپ, مۋزەي ءىسى سالاسىنداعى بىرلەسكەن زەرتتەۋلەردىڭ ماڭىزدىلىعىن اتاپ ءوتتى.
ا.بالاەۆا فرانتسۋز ارىپتەستەرىنە تاجىريبە الماسۋعا جانە ەكى ەلدىڭ مۋزەيلەرى اراسىنداعى ىنتىماقتاستىقتى نىعايتۋعا ىقپال ەتەتىن سيمپوزيۋمدار, كورمەلەر مەن عىلىمي كونفەرەنتسيالار, ترەنينگتەر مەن سەمينارلار ۇيىمداستىرۋدى ۇسىندى.
«بۇگىنگى كەزدەسۋىمىز وتە ماڭىزدى. بۇل ءبىزدىڭ گيمە مۋزەيى سياقتى لۋۆرمەن دە تىعىز ىنتىماقتاستىقتا بولىپ, جۇمىس ىستەۋىمىزگە ىقپال ەتەدى دەپ ويلايمىن. مينيستر رەتىندە مەن عىلىمي ىنتىماقتاستىققا مۇددەلىمىن. بىرلەسكەن كۇش-جىگەرىمىز جاڭا, بۇعان دەيىن بەيمالىم بولىپ كەلگەن تاريحي دەرەكتەر مەن جادىگەرلەردى اشۋعا مۇمكىندىك بەرەتىنىنە سەنىمدىمىن. باسىم باعىت عىلىمي زەرتتەۋلەر بولۋى كەرەك. بۇل ەكى ەل ءۇشىن دە ۇلكەن مۇمكىندىكتەر اشادى. قازاق مادەنيەتى حالىقارالىق عىلىمي قاۋىمداستىقتىڭ نازارىنا ىلىككەن بىرەگەي جادىگەرلەرگە باي. دەگەنمەن ءالى اشىلماعان قىرلارى دا جەتەرلىك», دەگەن مينيستر لۋۆر ماماندارىن قازاقستانعا شاقىردى.
ءوز كەزەگىندە س.نۋدجايىم ەكى ەل ىنتىماقتاستىعىن كەڭەيتۋگە مۇددەلىلىك تانىتىپ, لۋۆردىڭ مادەني مۇرانى رەستاۆراتسيالاۋ جانە زەرتتەۋ سالاسىندا بىرلەسكەن زەرتتەۋلەر جۇرگىزۋگە مۇددەلى بولاتىنىن اتاپ ءوتتى.
«عىلىمي ىنتىماقتاستىقتى دامىتۋ ءبىز ءۇشىن دە وتە قىزىقتى. بۇل باعىتتا ارىپتەستىك ورناتۋعا دايىنبىز. بىرلەسكەن زەرتتەۋلەر قازاقستاننىڭ مادەنيەتى تۋرالى ءبىلىمىمىزدى كەڭەيتىپ, ەكى تاراپ ءۇشىن دە ماڭىزدى جاڭالىقتار اشۋعا مۇمكىندىك بەرەدى», دەدى لۋۆر مۇراجايىنىڭ يسلام ونەرى دەپارتامەنتىنىڭ ديرەكتورى.
كەزدەسۋدە فرانتسيانىڭ قازاقستانداعى توتەنشە جانە وكىلەتتى ەلشىسى س.گيوگە ەكى ەل ءۇشىن عىلىمي ىنتىماقتاستىقتىڭ بولاشاعى زور سالا ەكەنىن اتاپ ءوتتى. سونداي-اق فرانتسيا ەلشىلىگىنىڭ وسى جوبالاردى جۇزەگە اسىرۋعا كومەكتەسۋگە, عىلىم, مادەنيەت سالالارىنداعى ارىپتەستىكتى دامىتۋعا دايىن ەكەنىن ايتتى.
سونداي-اق جيىن بارىسىندا قازاقستان مەن فرانتسيا اراسىنداعى مادەني جانە عىلىمي بايلانىستاردى نىعايتۋعا نەگىز بولاتىن ىنتىماقتاستىق جونىندەگى باعدارلاما مەن قۇجاتتى تۇبەگەيلى ازىرلەۋ تۋرالى شەشىم قابىلداندى.