پاۆلوداردا «التىن ساقا» قوسىمشا ءبىلىم ورتالىعى اشىلدى. جالپى سانى 18 مىڭ بالانى قامتۋعا ارنالعان ۇيىمدا IT-ستۋديا, روبوتتەحنيكا ۇيىرمەلەرى, شىعارماشىلىق, سپورتتىق جانە مۋزىكالىق باعىتتاعى سەكتسيالار جۇمىس ىستەيدى.
بالالارعا ارنالعان زاماناۋي ورتالىق بۇرىن-سوڭدى قوسىمشا ءبىلىم بەرۋ نىساندارى بولماعان ەكىنشى پاۆلودار شاعىن اۋدانىندا اشىلدى.
ءوڭىر باسشىسى اسايىن بايحانوۆ شاعىن اۋداننىڭ جاس تۇرعىندارىن كوپتەن كۇتكەن قۋانىشپەن قۇتتىقتادى.
– ەكىنشى پاۆلودار تۇرعىندارىمەن كەزدەسۋلەردىڭ بىرىندە ءبىز وسى شاعىن اۋداندا بالالارعا ارنالعان زاماناۋي مەكەمە اشۋعا ۋادە بەرگەن ەدىك. بۇگىن ءوز ۋادەمىزدى ورىنداپ, «التىن ساقا» اتتى جاڭا يننوۆاتسيالىق-شىعارماشىلىق ورتالىقتى اشىپ جاتقانىمىزعا قۋانىشتىمىن. بۇل جاڭا دوستار تابۋعا, ءبىلىم الۋعا جانە بوس ۋاقىتتارىڭىزدى ءتيىمدى وتكىزۋگە بولاتىن ەكىنشى ۇيلەرىڭىز بولسىن, – دەدى ايماق باسشىسى.
«التىن ساقا» يننوۆاتسيالىق ورتالىعى اتالعان اۋماقتا تۇراتىن 18 مىڭ بالاعا ارنالعان قوسىمشا ءبىلىم بەرۋدىڭ زاماناۋي فورماتى رەتىندە وقۋشىلاردىڭ قىزىعۋشىلىقتارى مەن تالانتتارىن اشۋعا ۇلكەن مۇمكىندىكتەر بەرەدى. مۇندا IT-ستۋديا, روبوتتەحنيكا ۇيىرمەلەرى, شىعارماشىلىق, سپورتتىق جانە مۋزىكالىق باعىتتاعى سەكتسيالار جۇمىس ىستەيتىن بولادى. بالالار تاماق ىشەتىن بۋفەت قاراستىرىلعان. قولونەر شەبەرحانالارىندا ۇستالىق ونەرگە جانە تىگىن تىگۋگە ۇيرەتەدى.
وسىلايشا, كەرەكۋ وڭىرىندە مەملەكەت باسشىسىنىڭ تاپسىرماسى بويىنشا ۇرپاقتىڭ ۇيلەسىمدى دامۋى ءۇشىن بارلىق جاعداي جاسالىپ وتىر. بۇعان دەيىن 800 بالاعا ارنالعان شىعارماشىلىق ورتالىعىن اشۋ ءۇشىن ەرتىس اۋدانىنداعى قاراۋسىز قالعان اكىمشىلىك عيمارات قايتا جاڭارتىلعان بولاتىن. قازان ايىندا ەكىباستۇز قالاسىندا «سامعاۋ» بالالار شىعارماشىلىعىنىڭ جاڭا ورتالىعىن اشۋ جوسپارلانىپ وتىر. سونىمەن قاتار الداعى ءۇش جىلدا ۋسپەن, شارباقتى جانە پاۆلودار اۋداندارىندا دا ونەر مەكتەپتەرىن سالۋ جوسپارعا ەنگەن.
پاۆلودار