ەگىن وراعى اياقتالۋعا جاقىن

اۋىل شارۋاشىلىعى باس­قارماسى ەگىن شارۋاشىلىعى, استىق جانە تۇقىم ينسپەكتسيا­سى ءبولىمىنىڭ باسشىسى كەڭەس قايداشەۆتىڭ ايتۋىنشا, ەگىس قۇرىلىمىن ءارتاراپتاندىرۋ ماقساتىنا سايكەس بيىل ءداندى بۇرشاقتى داقىلدار ەگىسى 2023 جىلعىدان 2,5 ەسە ۇلعايىپ, 22 مىڭ گەكتار القاپقا جاسىمىق, قۇماي, نوقات ەگىلگەن. ودان بولەك, وڭىردەگى مايلى داقىل­دار ەگىستىگىنىڭ كولەمى 102 مىڭ گەكتار بولىپتى. بۇل بىل­تىر­عىدان 109 پايىزعا كوپ. شا­رۋالار اراسىندا مال ازىعى داقىلدارىن ەگىپ, وسىرۋشىلەر دە كوبەيگەن. قازىر 196,7 مىڭ گەكتار وسىنداي القاپ بار. كارتوپ, كوكونىس-باقشا داقىل­دارى دا جەرگىلىكتى شا­رۋا­لاردىڭ ءداستۇرلى كاسىبى.

«بۇگىندە 294,9 مىڭ گەكتار ءداندى داقىل ورىلدى. ياعني بارلىق ءداندى داقىل ەگىستى­گىنىڭ 98%-ى ورىلىپ, ورتاشا ونىمدىلىك گەكتارىنا 10 تسەنتنەردەن اينالدى. 288 مىڭ توننا استىق جينالدى», دەيدى كەڭەس بايان ۇلى.

مايلى داقىلدىڭ دا 21 مىڭ گەكتارى ورىلىپ, ورتاشا ەسەپ­پەن گەكتارىنا 8,7 تسەنتنەر ءونىم الىنعان. 18,4 مىڭ توننا ءدان قامباعا ءتۇستى. بۇدان بولەك, 7 مىڭ توننا كارتوپ, 14 مىڭ توننا كوكونىس, 18,2 مىڭ توننا باقشا ءونىمى جينالعان. ەگىن ورۋ جۇمىسى جالعاسىپ جاتىر.

باسقارمادان شارۋالار جۇ­مىسىن جەڭىلدەتەتىن يگىلىك­تەر جونىندە دە سۇرادىق. بىلگەنىمىز, ايماققا «اگرارلىق نەسيە كورپوراتسياسى» اق ارقىلى «كەڭ دالا» باعدارلاماسى بويىنشا كوكتەمگى دالا جۇمىستارىن قارجىلاندىرۋعا شارۋالارعا 5%-بەن 2,4 ملرد تەڭگە ءبولىنىپ, تولىق يگەرىلگەن. «كەڭ دالا-2» باعدارلاماسى ارقىلى ەگىس جانە ەگىن ورۋ جۇمىسىن 5%-بەن قارجىلاندىرۋ ءۇشىن 12 ملرد تەڭگە تاعى بولىنگەن. ءدال وسى باعدارلاما اياسىندا شارۋالار قازىردىڭ وزىندە 2,4 ملرد تەڭگە العان.

وبلىستا ارنايى ليتسەنزياسى بار 8 استىق قابىلداۋ كا­سىپورىنى بار. ولار بايتە­رەك, ءبورلى, تەرەكتى, تاسقالا, شىڭ­­­عىر­لاۋ اۋداندارى مەن ورال قالاسىنىڭ اۋماعىندا ورنا­لاسقان. كاسىپورىندار 586 مىڭ توننا ءونىمدى قابىل­داپ, ساقتاي الادى. كەڭەس بايان­ ۇلىنىڭ ايتۋىنشا, ەلەۆاتورلار ءونىم قابىلداۋعا تولىق دايىن.

جىل سايىن ەگىن وراعى كەزىن­دە جانارماي قات بولىپ, باعا­سى اسپانداپ كەتەتىن. بىراق مەملەكەت مۇنداي جاعىمسىز قۇبىلىستىڭ الدىن الۋعا ەرتە قام جاساعان ەكەن. بيىلعى كوك­تەمگى دالا جۇمىستارىنا 8,5 مىڭ توننا ديزەل وتىنى بولىنگەن. وبلىستاعى اۋىل شارۋا­­شىلىعى قۇرىلىمدارى 5,8 مىڭ توننا ديزەل وتىنىنىڭ 1 ءليترىن 238 تەڭگەدەن ساتىپ العان.

«كۇزگى دالا جۇمىستارىنا تاعى 8,3 مىڭ توننا ديزەل وتىنى ءبولىندى. جەتكىزۋشى وپەراتور – «NEFTEK Operating» جشس. قازىر ورال قالاسىنداعى مۇناي بازالارىنان, جانار-جاعارماي قۇيۋ ستانسالارىنان 1 ليتر ديزەل وتىنى ليترىنە 250 تەڭگەدەن بەرىلىپ جاتىر», دەيدى كەڭەس قايداشەۆ.

وبلىستا 97 مىڭ گەكتار ال­قاپقا كۇزدىك ءداندى داقىل سەبۋ جوسپارلانعان. بۇعان قاجەتتى تۇقىم قورى تولىق دايىن. قازىردىڭ وزىندە 72 مىڭ گەكتار القاپتا ەگىس اياقتالدى.

سونداي-اق وڭىردە وسىمدىك شارۋاشىلىعىن سۋبسيديالاۋ باعدارلامالارىنا – 1,7 ملرد تەڭگە, تۇقىم شارۋاشىلىعىن دامىتۋعا – 284,3 ملن تەڭگە, تىڭايتقىش مەن پەستيتسيد قۇ­نىن سۋبسيديالاۋعا – 899 ملن تەڭگە, مەملەكەت باسىمدىق بەرگەن داقىلدار ءوندىرىسىن دامىتۋعا – 495 ملن تەڭگە, اۋىل شارۋاشىلىعى تاۋارلارىن وندىرۋشىلەرگە سۋ بەرۋ قىزمەتىنىڭ قۇنىن سۋبسيديالاۋ ءۇشىن – 37,1 ملن تەڭگە بولىنگەن. سونىمەن قاتار «قازاگرەكس» اق جانە «ورالجەر» جشس مەكەمەلەرى ارقىلى تۇقىمنىڭ ەگۋ ساپاسىن تەكسەرۋگە – 29 ملن تەڭگە بولىنسە, ەگىستىڭ جاۋى – ساياق شەگىرتكەلەرگە قارسى حيميالىق وڭدەۋ ءۇشىن 551 ملن تەڭگە قاراجات قاراستىرىلعان.

باتىس قازاقستان وبلىسى