«عاسىرلار بويى مۋزىكاداعى درامالىق جاڭا يدەيالار مەن فورمالاردىڭ پايدا بولۋى تۋرالى قىزىقتى مالىمەتتەر وسى كىتاپتا دەپ ويلايمىن...». بۇل فيزيكا سالاسى بويىنشا 2004 جىلعى نوبەل سىيلىعىنىڭ لاۋرەاتى دەۆيد پوليتتسەردىڭ قازاق مۋزىكانتى راحات-بي ابدىساعيننىڭ جاقىندا عانا گەرمانيانىڭ «Springer» باسپاسىنان جارىق كورگەن «كۆانتتىق مەحانيكالار جانە اۆاند-گاردتىق مۋزىكا» اتتى سۋ جاڭا كىتابىنىڭ مۇقاباسىنا جازعان ءسوزى.
الەم عالىمدارىنىڭ وڭ باعاسىن الىپ ۇلگەرگەن اتالعان كىتاپ تۋرالى جاقسى پىكىرلەر كوپ. سونىڭ ءبىرى پروفەسسور يان ءستيۋارتتىڭ «مۋزىكا مەن فيزيكا اراسىنداعى تەرەڭ مەتافورالىق بايلانىستاردى زەرتتەۋگە ويلاندىراتىن, ىنتالاندىراتىن وتە ەرەكشە زەرتتەۋ ەڭبەگى دەر ەدىم. وقىپ شىعۋعا كەڭەس بەرەمىن» دەگەنى دە جاي پىكىر ەمەس.
راسىندا, قازىرگى زاماندا فيزيكا مەن مۋزىكا اراسىنداعى ۇندەستىكتى, ءوزارا بايلانىستى تەرەڭ ءتۇسىندىرىپ بەرەتىن ەڭبەكتەر كوپ ەمەس. قازاق مۋزىكانتىنىڭ وسى سالاداعى ىزدەنىسىن بۇكىل الەم قۋانا قابىلداپ جاتسا, بۇدان ارتىق نە بار! سىزدەرگە سۇيىنشىلەپ وتىرعان كىتاپ باتىس الەمىن تاڭعالدىرعان ۇلى مۋزىكانتتار ستوكگاۋزەن مەن كەيدج شىعارمالارىنداعى گەيزەنبەرگتىڭ بەلگىسىزدىك قاعيداتىنىڭ سيمفونيالىق جاڭعىرىعى ما دەگەن ۇلى سۇراقتارعا ەرىك بەرەسىز. قالاي دەسەك تە بۇل كىتاپ وسى ۇلكەن سۇراقتاردى قويىپ قانا قويمايدى, سونىمەن قاتار قازىرگى فيزيكا مەن زاماناۋي مۋزىكا اراسىنداعى الشاقتىقتى اشاتىن پانارالىق بايلانىستاردى زەرتتەي وتىرىپ, ءوز جاۋابىن, ناتيجەسىن ۇسىنادى. اۆتوردىڭ بىرەگەي ادىستەمەسى ماتەماتيكا مەن فيزيكا ءتىلىن مۋزىكالىق تانىمدا تۇسىندىرۋمەن بايلانىستىرا وتىرىپ, تىڭ كوزقاراسىن بىلدىرەدى.
ءتىپتى بۇل كىتاپ فيزيكا مەن مۋزىكانىڭ شەكاراسىنان اتتاپ, حح عاسىرداعى زاماناۋي فيزيكا مەن اۆانگاردتىق مۋزىكانىڭ تىعىز بايلانىسىنا ۇڭىلەدى. اۆتور سان جىلدىق زەرتتەۋلەر ارقىلى كۆانتتىق فيزيكا جانە سالىستىرمالىلىق سياقتى رەۆوليۋتسيالىق يدەيالاردىڭ ءومىردىڭ بارلىق اسپەكتىلەرىندە قالىپتاسقانىن, ءتىپتى تەرەڭدەي تۇسسەك, قازىرگى فيزيكا مەن زاماناۋي مۋزىكانىڭ قارىم-قاتىناسى تەك كەزدەيسوقتىق ەمەس, ولاردىڭ پايدا بولۋى مەن دامۋىن دا ۇندەستىرەتىن بايلانىس بولعانىن كورسەتەدى.
ءار مەملەكەتتەگى ءارتۇرلى وقىرماندار مەن تاجىريبەلى ساراپشىلارعا ارنالعان بۇل كىتاپ انىقتىق پەن ءستيلدى ساقتاۋعا تالپىنىس جاساعانىن اڭعارامىز. جاڭاشىل زەرتتەۋ جۇمىسىن زاماناۋي فيزيكا مەن مۋزىكا اراسىنداعى بايلانىستاردى زەرتتەۋمەن عانا شەكتەلمەي, سونىمەن قاتار عالىمدار, مۋزىكانتتار جانە وسى سالاعا قىزىعۋشىلىق تانىتاتىن اۋديتورياعا بىرەگەي كوپىر قىزمەتىن اتقارادى.
راحات-بي ابدىساعين – ءۇش وپەرا جانە 150-دەن استام مۋزىكالىق شىعارمانى ومىرگە اكەلگەن جاڭاشا ستيلدەگى مۋزىكانت. ونىڭ سيمفونيالىق شىعارمالارى بەرلين فيلارمونياسى, كارنەگي حولل جانە Wiener Konzerthaus سياقتى ايگىلى حالىقارالىق ورىنداردا قويىلعان. ول العاشقى ءبىلىمىن ەلىمىزدىڭ وقۋ ساحنالارىندا باستاپ, ودان ارى يتالياندىق تانىمال مۋزىكالىق وقۋ ورىندارىندا ماگيسترلىك قورعاپ, كومپوزيتسيانىڭ وزىق ادىستەرىن مەڭگەرگەن. الەمگە تانىمال كومپوزيتور تريستان مۋرايل ونىڭ كىتابىن وقىعان سوڭ «بۇل – تاڭعاجايىپ كىتاپ» دەگەن ىزگى تىلەگىن ءبىلدىرىپتى. الەمدى مويىنداتسام دەگەن ارمانى بار قازاق بالاسىنىڭ بۇل ەڭبەگىن ءبىز دە تاڭعاجايىپ كوڭىل كۇيدە قابىلدادىق.