بىلتىر دۇنيەدەن وزعان كورنەكتى اقىن, مەملەكەتتىك سىيلىقتىڭ لاۋرەاتى نەسىپبەك ايت ۇلىنىڭ باس شاھارداعى تۇرعان ۇيىنە ەسكەرتكىش تاقتا قويىلدى. تاعىلىمدى ءىس-شاراعا استانا قالاسى اكىمدىگىنىڭ جاۋاپتى تۇلعالارى, ەلوردالىق زيالىلار, اقىن شىعارماشىلىعىن جاقسى كورەتىن وقىرماندار مەن تۋعان-تۋىستارى قاتىستى.
اباي داڭعىلى بويىنداعى قۇتتى شاڭىراقتا ارداقتى اقىن 2000-جىلداردىڭ باسىنان باستاپ, اقىرعى دەمى ۇزىلگەنگە دەيىن تۇرىپ, كوپتەگەن شىعارماسىن جازدى. اسىرەسە «بوستاندىق جىرىنىڭ بوزجورعاسى» اتانعان شايىردىڭ ەلورداعا كوشىپ كەلگەننەن كەيىن جاڭا تىنىسى اشىلىپ, ەل تاۋەلسىزدىگى مەن سول جولدا قۇربان بولعان باھادۇرلەر تۋرالى تەبىرەنىپ جىرلادى. سوڭعى دەمىنە دەيىن قولىنان قالامىن تاستاماعان قالامگەردىڭ ۇلتتىق قۇنارعا باي ايشىقتى ولەڭدەرىنەن باسقا, 40-قا جۋىق كەڭ تىنىستى پوەما ومىرگە كەلدى. سولاردىڭ دەنى وسى ۇيدە جازىلدى.
ءىس-شارانى جۇرگىزگەن قازاقستان جازۋشىلار وداعى استانا قالالىق فيليالىنىڭ ديرەكتورى داۋلەتكەرەي كاپ ۇلى الدىمەن قازاق ولەڭىنىڭ اسپانىندا ءۇيىر-ءۇيىر بۇلت ايداعان ايتۋلى اقىن شىعارماشىلىعىنا توقتالدى. ودان كەيىن ءسوز العان استانا قالاسى ءماسليحاتىنىڭ توراعاسى ەرلان قاناليموۆ ۇلت ادەبيەتىنىڭ قازىناسىن بايىتقان سىرشىل سۋرەتكەردىڭ رۋحانياتىمىزعا قوسقان ۇلەسى مول ەكەنىن جەتكىزدى.
«نەسىپبەك ايت ۇلى سەكىلدى تۇرپاتى بولەك تالانتتار سيرەك كەزدەسەدى. اعامىزدىڭ جازعان دۇنيەلەرى – ۇلتىمىزدىڭ عانا ەمەس, الەم ادەبيەتىنىڭ ءىنجۋ-مارجانى دەر ەدىم. پوەزيادا جىراۋلاردىڭ جولىن جالعاپ, ونەگەلى ءىز قالدىردى. سوندىقتان اقىننىڭ شۇرايلى تىلمەن شىنايى جازىلعان شىعارمالارى – جاس ۇرپاققا ماڭگىلىك قازىنا بولىپ قالا بەرەدى», دەدى ول.
ال بەلگىلى اقىن, مەملەكەتتىك سىيلىقتىڭ لاۋرەاتى عالىم جايلىباي بۇگىنگى وقيعا ەلوردانىڭ رۋحاني-مادەني الەمىندەگى مازمۇندى ءىس-شارا ەكەنىن ايتتى.
«قازاق رۋحانياتىنا تالماي ەڭبەك ەتكەن نەساعاڭ تۋرالى كوپ ايتۋعا بولادى. شىن مانىندە, ول – باقىتتى ادام. ەكى قوعامدىق فورماتسيانى كورىپ, ەكى عاسىردا عۇمىر كەشتى. ۇرپاق ءوسىردى. قازاق ولەڭىنىڭ عاجايىپ ۇلگىلەرىن جاڭارتتى. ءبىر سوزبەن ايتقاندا, نەسىپبەك ايت ۇلى – ۇلت رۋحانياتىنداعى جۇلدىزى جارىق تۇلعانىڭ ءبىرى. ونىڭ اعىل-تەگىل اق جاڭبىرداي توگىلگەن ولەڭدەرى, ء«ان دومبىرا», «سارىارقا», «داۋرەن-اي», «ارمان», «داريعا, داۋرەن» دەگەن ەل ءسۇيىپ تىڭدايتىن انگە جازعان سوزدەرى, ءجۇنىس ەمىرەدەن باستاپ, الىشەر ناۋايعا دەيىنگى اۋدارمالارى – ۇلت ادەبيەتىندە اقىن ەسىمىن ايشىقتاپ تۇرادى», دەگەن ع.جايلىباي قالامداس اعاسىنىڭ رۋحىنا ارناپ جازعان ولەڭىن وقىدى.
بۇدان كەيىن «Amanat» پارتياسى اقسۋات اۋداندىق فيليالىنىڭ توراعاسى ەرجان قۇتتىباەۆ اقىن جەرلەستەرىنىڭ سالەمىن جەتكىزسە, بالاسى نۇرات نەسىپبەك ۇلى وسى تاقتانى قويۋعا مۇرىندىق بولعان استانا قالاسى اكىمدىگى مەن جينالعان قاۋىمعا ريزاشىلىعىن ءبىلدىردى. ەسكەرتكىش تاقتانى اقىننىڭ زايىبى مانات اپاي مەن استانا قالاسى ءماسليحاتىنىڭ توراعاسى ەرلان قاناليموۆ اشتى.