پارلامەنت سەناتىنىڭ دەپۋتاتتارى نۇرتورە ءجۇسىپ, نۇرلان بەكنازاروۆ, ايگۇل قاپباروۆا اەس سالۋ تاقىرىبىنا وراي قالالىق شتاب مۇشەلەرىمەن بىرگە وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنىڭ جانە ج.تاشەنوۆ ۋنيۆەرسيتەتىنىڭ جاس عالىمدارىمەن, پروفەسسور-وقىتۋشىلار قۇرامىمەن كەزدەستى.
كەزدەسۋگە قاتىسۋشىلار اتوم ەنەرگەتيكاسىن دامىتۋدىڭ كەلەشەگىن, ونىڭ ەلدىڭ ەنەرگەتيكالىق قاۋىپسىزدىگىن قامتاماسىز ەتۋدەگى ماڭىزىن تالقىلادى. سەناتورلار ەلىمىزدە اەس سالۋ اتوم يندۋسترياسى مەن جالپى ەكونوميكانى دامىتۋدا جاڭا مۇمكىندىكتەر اشاتىنىن اتاپ ءوتتى. 1000 مۆت ستانسا ءوندىرىس شىعارىندىسىن 4 ملن تونناعا قىسقارتۋعا مۇمكىندىك بەرەدى, بۇل ەكولوگيا ءۇشىن اسا ماڭىزدى. سونىمەن قاتار جاڭا جۇمىس ورىندارىن اشادى ءارى 60 جىلدان اسا ۋاقىت بويى تۇراقتى ەنەرگيامەن قامتاماسىز ەتەدى.
ن.ءجۇسىپ ەل دامۋىندا شەشۋشى ءرول اتقاراتىن جالپىۇلتتىق رەفەرەندۋم وتكىزۋدىڭ ماڭىزىنا توقتالدى.
«مەملەكەت باسشىسىنىڭ جولداۋىندا 100-گە جۋىق باستاما مەن ۇسىنىستار, تاپسىرمالار قامتىلدى. الايدا قوعامدا ۇزاق تالقىلانعان اتوم ەلەكتر ستانساسىنىڭ قۇرىلىسى بويىنشا رەفەرەندۋمنىڭ كۇنىن جاريالاۋ ماڭىزدى بولدى. رەفەرەندۋم «حالىق ۇنىنە قۇلاق اساتىن مەملەكەت» تۇجىرىمداماسىن جانە ادىلەتتى قازاقستان يدەياسىن ىسكە اسىرۋداعى ماڭىزدى قادام بولادى. ول ماسەلەنى تۇپكىلىكتى شەشۋگە مۇمكىندىك بەرەدى. سونىمەن قاتار بۇل – ءبىزدىڭ ەلىمىزدىڭ بولاشاعىن ونداعان جىلدارعا بەلگىلەۋدىڭ ناقتى مۇمكىندىگى. ارقايسىمىزدىڭ تاڭداۋىمىز بولاشاق ۇرپاق ءۇشىن ماڭىزدى», دەدى ن.ءجۇسىپ.
ءوز كەزەگىندە ن.بەكنازاروۆ ەلىمىزدىڭ ەنەرگەتيكالىق تاۋەلسىزدىگى مەن قاۋىپسىزدىگى جونىندە ءسوز قوزعادى.
«يمپورت ەسەبىنەن جابىلاتىن ەلەكتر ەنەرگياسىنىڭ تاپشىلىعى ەل الدىنا ەنەرگەتيكالىق بازانى نىعايتۋ مىندەتىن قويىپ وتىر. قازاقستاننىڭ ەنەرگەتيكالىق تاۋەلسىزدىگىن قامتاماسىز ەتۋ ءۇشىن اەس قۇرىلىسى ماڭىزدى قادامعا اينالدى. ويتكەنى ءبىز ەلەكتر ەنەرگياسىنىڭ جەتىسپەيتىن ءبىر بولىگىن شەتەلدەن الامىز. بۇل ەلدىڭ ەنەرگەتيكالىق قاۋىپسىزدىگىنە اسەر ەتەدى جانە بۇل ماسەلەنى شەشۋ ءۇشىن ناقتى شارالار قاجەت. اەس سالۋ مەن پايدالانۋ ەنەرگەتيكا سەكتورىنا عانا ەمەس, عىلىمعا, تەحنيكاعا جانە جالپى ونەركاسىپكە دە ايتارلىقتاي پايدا اكەلەدى», دەدى ن.بەكنازاروۆ.
ا.قاپباروۆا اتوم ستانساسىنىڭ قاۋىپسىزدىگى جانە ازاماتتار اراسىندا كەڭ تارالعان راديوفوبيا ماسەلەلەرىنە ەرەكشە نازار اۋداردى. ول قازاقستاندا قاۋىپسىزدىكتىڭ بارلىق تالابىنا سايكەس كەلەتىن جانە اۆاريالار قاۋپىن بارىنشا ازايتاتىن وزىق تەحنولوگيانى پايدالاناتىن جاڭا بۋىنداعى اتوم ەلەكتر ستانساسىنىڭ قۇرىلىسى قارالىپ جاتقانىن اتاپ ءوتتى. مۇنداي رەاكتورلار بەلسەندى جانە ءپاسسيۆتى قاۋىپسىزدىك جۇيەلەرىن بىرىكتىرىپ, ستانسانىڭ كەز كەلگەن اسەرگە تۇراقتىلىعىن قامتاماسىز ەتەدى. قازىرگى زامانعى ءۇشىنشى بۋىنداعى اتوم ەلەكتر ستانسالارىندا اۋىر اپاتتىڭ ىقتيمالدىعى 10 ميلليون جىلعا ءبىر اپات مۇمكىندىگى بولىپ سانالادى. ستانسانىڭ 40%-عا دەيىنگى قۇنى راديواكتيۆتى زاتتاردىڭ اعىپ كەتۋىنە جول بەرمەيتىن قاۋىپسىزدىك جۇيەسىنە جۇمسالادى.
سونداي-اق كەزدەسۋگە قاتىسۋشىلار اتوم ەنەرگەتيكاسىنا ماماندار دايارلاۋ جانە ولاردىڭ بىلىكتىلىگىن ارتتىرۋ, ەكولوگيالىق تاۋەكەلدەردىڭ الدىن الۋ شارالارى, اتوم جانە مولەكۋلالىق فيزيكا سالاسىنداعى عىلىمدى دامىتۋ ماسەلەلەرىن تالقىلادى.