مەملەكەت باسشىسى قاسىم-جومارت توقاەۆ بەلگىسىز ادامداردىڭ ۇلتتىق ۇلان ساربازىن پويىز تامبۋرىندا ۇرعانى بەينەلەنگەن ۆيدەومەن تانىسىپ شىقتى. بۇل تۋرالى قر پرەزيدەنتىنىڭ كەڭەسشىسى - پرەزيدەنتتىڭ ءباسپاسوز حاتشىسى بەرىك ءۋالي Facebook جەلىسىندە مالىمدەدى, دەپ حابارلايدى Egemen.kz.
«مەملەكەت باسشىسى ىشكى ىستەر ءمينيسترى ەرجان سادەنوۆكە قاسكويلەردى ۇستاپ, زاڭناماعا سايكەس جاۋاپقا تارتۋ ءۇشىن شۇعىل شارالار قابىلداۋدى تاپسىردى», دەپ جازدى بەرىك ءۋالي.
ول سونداي-اق اسكەردەگى جانە باسقا دا كۇشتىك ۇيىمدارداعى زورلىق-زومبىلىقتىڭ بارلىق فاكتىسى پرەزيدەنتكە مىندەتتى تۇردە باياندالاتىنىن تىلگە تيەك ەتتى.
«مۇنداي جاعدايلار باقىلاۋعا الىنادى. قاسىم-جومارت توقاەۆ بيىلعى 2 قىركۇيەكتەگى جولداۋىندا جاس ساربازداردىڭ دەنساۋلىعى مەن ابىروي-بەدەلىنە قول سۇعۋعا جول بەرمەۋ قاجەت ەكەنىنە نازار اۋدارعان ەدى. سونىمەن قاتار بۇل ماسەلەگە اسكەري قۇرىلىمداردىڭ باسشىلارى تىكەلەي جاۋاپتى ەكەنىن ايتقان بولاتىن», دەلىنگەن جازبادا.
ايتا كەتەيىك, الەۋمەتتىك جەلىدە بەلگىسىز بىرەۋلەردىڭ اسكەري كيىمدەگى جىگىتتى ۇرىپ-سوعىپ جاتقانى تاسپالانعان بەينەماتەريال تاراعان ەدى. كوپ ۇزاماي ۇلتتىق ۇلاننىڭ «باتىس» وڭىرلىك قولباسشىلىعى بۇل وقيعاعا قاتىستى رەسمي مالىمدەمە جاسادى.
«2024 جىلعى 23 قىركۇيەكتە «باتىس» وڭىرلىك قولباسشىلىعى اسكەري پوليتسياسى قر قك 440-بابى 1-بولىگى «اسكەري قىزمەتشىلەر اراسىنداعى ءوزارا قارىم-قاتىناستاردىڭ جارعىلىق ەرەجەلەرىن بۇزۋ» بويىنشا سوتقا دەيىنگى تەرگەپ-تەكسەرۋدى باستادى», دەلىنگەن رەسمي مالىمدەمەدە.