مەملەكەت باسشىسى نۇرسۇلتان نازارباەۆ «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەكتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا ب.بايبەك مەملەكەت باسشىسى – پارتيا ءتوراعاسىنا پارتيا قىزمەتىن جەتىلدىرۋ جانە قايتا قالىپتاۋ جۇمىستارىنىڭ ناتيجەسى تۋرالى باياندادى.
قازاقستان پرەزيدەنتى پارتيا ساياسي كەڭەسىنىڭ كەڭەيتىلگەن وتىرىسىندا اۋقىمدى «نۇرلى جول» باعدارلاماسى قابىلدانعانىن, ول الەمدىك ەكونوميكاداعى داعدارىستىق قۇبىلىستارعا قارسى ءىس-قيمىل جاساۋعا باعىتتالعانىن اتاپ ءوتتى.
– بۇل باعدارلاما پارتيانىڭ قولداۋى اياسىندا جۇزەگە اسىرىلاتىن بولادى, ويتكەنى, ونىڭ بەدەلى بار, بۇكىل ەلىمىز بويىنشا كوپتەگەن ادامدار پارتيا ساپىندا تۇر. «نۇرلى جولدى» قابىلداۋ – ەلدىڭ بولاشاق دامۋى مەن حالىقتىڭ يگىلىگى ءۇشىن زور ءمانى بار ماڭىزدى شارا. وسىعان بايلانىستى پارتيا باستاۋىش ۇيىمدارعا سۇيەنە وتىرىپ, حالىققا ءتۇسىندىرۋ جۇمىستارىنا دەن قويۋى ءتيىس, – دەدى مەملەكەت باسشىسى.
نۇرسۇلتان نازارباەۆ ينفراقۇرىلىمدى ساپالى دامىتۋ, جۇمىس ورىندارىن قۇرۋ, شاعىن جانە ورتا بيزنەسكە مەملەكەت تاراپىنان ىلكىمدى قولداۋ كورسەتۋ «نۇرلى جول» باعدارلاماسىنىڭ مىندەتتەرىنە كىرەتىنىن ايتتى.
– كاسىپكەرلەر نەسيەمەن قامتاماسىز ەتىلۋدە, بيزنەس اشۋعا جاعداي جاسالىپ, تەكسەرۋلەر سانى ازايۋدا. بارلىق كەدەرگىلەر جويىلۋدا. جالپى, كاسىپكەرلىك يندۋستريالىق-يننوۆاتسيالىق دامۋ, «نۇرلى جول» باعدارلامالارى, جول جانە باسپانا قۇرىلىسى, تۇرعىن ءۇي-كوممۋنالدىق شارۋاشىلىقتى جاڭعىرتۋلار ارقىلى ۇسىنىلاتىن مۇمكىندىكتەردى پايدالانۋى ءتيىس. ەگەر پارتيا ۇلتتىق كاسىپكەرلەر پالاتاسىمەن وسى باعىتتا تىعىز ىقپالداساتىن بولسا, قاجەتتى ناتيجەلەرگە قول جەتەدى. ەكونوميكانى دامىتۋ ارقىلى حالىقتىڭ ءال-اۋقاتىن جاقسارتۋ ءۇشىن جۇمىس ىستەۋ قاجەت, – دەدى قازاقستان پرەزيدەنتى.
توراعانىڭ ءبىرىنشى ورىنباسارى پارتيانىڭ سايلاۋالدى تۇعىرناماسىنداعى مىندەتتەمەلەرىنىڭ ءىس جۇزىندە 70 پايىزعا جۋىعى ورىندالعانىنا توقتالدى. ول مەملەكەت باسشىسىنا سىبايلاس جەمقورلىققا قارسى ءىس-قيمىل باعدارلاماسىن جۇزەگە اسىرۋ ءجونىندەگى جول كارتاسىنىڭ بەكىتىلگەنىن دە ايتتى.
ب.بايبەك, سونىمەن قاتار, «نۇرلى جول» باعدارلاماسىن ءجۇزەگە اسىرۋ ىسىنە پارتيانىڭ قاتىسۋى تۋرالى باياندادى.
– ءسىزدىڭ تاپسىرماڭىزعا سايكەس, ءماجىلىستەگى جانە ماسليحاتتارداعى پارتيا فراكتسيالارىندا «نۇرلى جول» باعدارلاماسىنىڭ ورىندالۋى مەن ۇلتتىق قور قارجىسىنىڭ پايدالانىلۋىن قاداعالايتىن 4 كوميسسيا قۇرىلدى, – دەپ حابارلادى پارتيا توراعاسىنىڭ ءبىرىنشى ورىنباسارى.
ب.بايبەك پرەزيدەنتكە پارتيا مۇشەلەرى باعدارلامانى تابىستى ورىنداۋ ءۇشىن بار كۇش-جىگەرلەرىن جۇمىلدىراتىنىن ايتتى.
كەزدەسۋ قورىتىندىسى بويىنشا مەملەكەت باسشىسى بىرقاتار ناقتى تاپسىرمالار بەردى.