حرومتاۋ قالاسىنداعى كەنشىلەر مادەنيەت ۇيىندە «Tugan Qala» فورۋمى ۇيىمداستىرىلدى. ەل كولەمىندە بالاماسى جوق بىرەگەي باستاما بيىل تۇڭعىش رەت تۇرعىنداردىڭ اۆتورلىق ستسەناريىمەن ءوتتى. شارا تۇرعىنداردىڭ وزدەرى ۇسىنعانداي, قالانىڭ تاريحي ورىندارىنا كۆەست, «Tugan Qala» باستاماسىمەن بوي كوتەرگەن نىسانداردى تەگىس قامتىپ, قاتىسۋشىلار وزدەرىن قىزىقتىرعان ترەنينگتەر مەن شەبەرلىك ساباقتارىنا قاتىسۋعا كەڭىنەن مۇمكىندىك الدى.
«Tugan Qala» فورۋمىنا مەملەكەتتىك ورگاندار, ونەركاسىپ يندۋسترياسى وكىلدەرى, قازحرومدىقتار مەن وسى شارانىڭ ۇيىمداستىرىلۋىنا اتسالىسقان باستاماشىل تۇرعىندار, فورۋمنىڭ باعدارلاماسىن ازىرلەۋگە قاتىسقان ء«دوڭ» تكبك قىزمەتكەرلەرىن قوسا العاندا, جالپى سانى 150-دەن ادام جينالدى.
– ERG-ءدىڭ «Tugan Qala» سىندى ماڭىزدى جوبالارىن قىزمەتكەرلەرىمىز بەن تۇرعىنداردىڭ قولداۋىنسىز ىسكە اسىرۋ مۇمكىن ەمەس. بۇل باستامالارعا قاتىسۋشىلار سانى جىلدان-جىلعا ارتىپ كەلەدى. ءبىز ولارمەن بىرگە ەلدى مەكەندى «ارمان قالاعا» اينالدىرۋعا ۇمتىلامىز, – دەدى ەۋرازيالىق توپ باس ديرەكتورىنىڭ پەرسونال جانە مادەنيەت جونىندەگى ورىنباسارى اقمارال نايزابەكوۆا. – حرومتاۋ تۇرعىندارى دا بۇل جوباعا بەلسەنە اتسالىسىپ جاتىر. ءتورت جىل ىشىندە الەۋمەتتىك جوبالارعا 2,2 ملرد تەڭگە جۇمسالدى. اتاپ ايتساق, بالاباقشا, مادەنيەت سارايى, حرومتاۋداعى وزگە دە الەۋمەتتىك نىسانداردىڭ قۇرىلىسىنا قولداۋ جاسايمىز.
Eurasian Resources Group (ERG) – تابيعي رەسۋرستاردى ءوندىرۋ مەن وڭدەۋ, ەنەرگەتيكا, لوگيستيكا جانە ماركەتينگ سالالارىندا تولىق بىرىكتىرىلگەن, الەمدەگى ەڭ ءىرى ارتاراپتاندىرىلعان كومپانيالاردىڭ ءبىرى. توپتىڭ قۇرىلعانىنا بيىل – 30 جىل. بۇگىندە ءتورت قۇرلىقتا ورنالاسقان ERG-ءدىڭ كاسىپورىندارى ءوز سالاسى بويىنشا ەڭ ءىرى جۇمىس بەرۋشىلەردىڭ ءبىرى.
فورۋم قوناقتارى «Tugan Qala» جوباسىنىڭ حرومتاۋداعى التى نىسانىن ارالاپ كوردى. قالاعا ارناعان تىلەكتەرىن ارنايى باننەرگە جازىپ قالدىردى. قوناقتاردىڭ ءبىر توبى ورتالىق ساياباقتان باستاپ اۋعان سوعىسى ارداگەرلەرىنە ارنالعان ەسكەرتكىشكە دەيىن اۆتوبۋسپەن سەرۋەندەپ بارىپ قايتتى.
– فورۋمعا قاتىسۋشىلار بار-جوعى 10-12 ميلليون تەڭگەگە ساپالى, تولىققاندى ينفراقۇرىلىم نىساندارىن ىسكە اسىرۋعا بولاتىنىن كورىپ, قايران قالدى, – دەيدى فورۋمدى ۇيىمداستىرۋشىلاردىڭ ءبىرى, الەۋمەتتىك تەحنولوگيالاردى دامىتۋ قاۋىمداستىعىنىڭ مەنەدجەرى گاۋھار اسىلبەك. – بۇل – «Tugan Qala» جوباسىنىڭ تيىمدىلىگىنىڭ ايقىن دالەلى. فورۋم حرومتاۋ قالاسىنىڭ دامۋىنا سەپتەسىپ, قالا تۇرعىندارىنىڭ ءومىر ءسۇرۋ ساپاسىن جاقسارتۋعا باعىتتالعان. جوبانىڭ بىرەگەيلىگى مەن قارجىلاندىرۋ كولەمى تۇرعىنداردىڭ جوبالارعا بەلسەندى قاتىسۋىنا جانە ولاردىڭ جۇزەگە اسۋىنا جول اشادى.
ودان بولەك, فورۋمعا قاتىسۋشىلارعا ارنالىپ, ەلدەگى الەۋمەتتىك كاسىپكەرلىك, قارجى, پسيحولوگيا, ساۋلەت جانە قۇرىلىس سالالارىنداعى جەتەكشى ساراپشىلاردىڭ ترەنينگتەرى مەن شەبەرلىك ساباقتارى جوسپارلانعان. مەملەكەتتىك ورگاندار جانە بيزنەسپەن بىرلەسىپ, قاۋىمداستىقتار قۇرۋ جونىندەگى شەبەرلىك ساباعى دا بار. فورۋم مەيماندارى باستامانىڭ «يدەيادان ىسكە اسقانعا دەيىنگى» بارلىق ساتىسىمەن ءجىتى تانىسا الادى.
– «Tugan Qala» باستاماسى – ەرەكشە قىزىقتى كەيس. بارلىق مونوقالانىڭ ورتاق پروبلەماسى – ينفراقۇرىلىم. ال بۇل باستاما شاعىن قادامدارمەن ۇلكەن ءىس تىندىرىپ, قالانى دامىتۋعا سەپ. ساياباق, ايالداما, مۋرال – ەلدى مەكەندەردىڭ كوركى. وسىنداعى ادامداردىڭ كوزىنە شۋاق ءۇيىرىپ, كوڭىلىن جاقسى ىستەرگە بۇرادى. ERG كومپانياسىنىڭ بۇل تاجىريبەسىنەن الارىمىز كوپ, – دەدى KAZ Minerals وكىلى ەرمەك دۇزكەنوۆ. حرومتاۋلىقتار وزدەرى جاساعان بۇيىمدار مەن بار اسپازدىق ونەرىن سالعان تاعامدار جارمەڭكەسى قالانىڭ مادەنيەتى مەن وزىندىك ەرەكشەلىگىن دارالاي ءتۇستى. مەيماندار حرومتاۋدىڭ ءدامىن تاتىپ, وزدەرىنە ۇناعان قولونەر بۇيىمدارىن ساتىپ الا الدى.
فورۋم قورىتىندىسىندا ونلاين-بايقاۋ مەن كۆەست جەڭىمپازدارى ماراپاتتالىپ, ولارعا ەستەلىك سىيلىقتار مەن ديپلومدار تابىس ەتىلدى.
«Tugan Qala» جوباسى – ERG جىل سايىن وبلىس اكىمدىكتەرىمەن ارادا جاساساتىن مەموراندۋمدار اياسىندا بولىنگەن قاراجاتتىڭ قايدا باعىتتالاتىنىن تۇرعىنداردىڭ شەشۋىنە مۇمكىندىك بەرەتىن باستاما. تۇپكى ماقسات – كاسىپورىنداردان تۇسكەن قاراجاتتىڭ قاي ينفاقۇرىلىم نىساندارىنا جۇمسالۋعا ءتيىس ەكەنىن جانە قالادا قانداي نىساندار سالىناتىنىن تۇرعىنداردىڭ وزدەرى انىقتاپ, سول ارقىلى قالانىڭ دامۋىنا تىكەلەي وزدەرىنىڭ اتسالىسۋىنا جول اشۋ.
باستاما حرومتاۋ, اقسۋ, رۋدنىي قالالارى مەن قاشار جانە وكتيابر كەنتتەرىندە ىسكە اسىرىلىپ جاتىر. بيىل ليساكوۆسك قالاسىنان دا وتىنىمدەر قابىلداندى. جالپى, «Tugan Qala» جوباسى 2019 جىلى قولعا الىندى. ونىڭ اياسىندا بۇگىنگە دەيىن 144 الەۋمەتتىك نىسان سالىنىپ, ىسكە قوسىلعان. ولاردىڭ قاتارىندا بالالار مەن سپورت الاڭدارى, ارت-نىساندار مەن ينكليۋزيۆتى جاعاجاي, شاڭعى روللەر جولى جانە ت.س.س. بار. «Tugan Qala» جوباسى اياسىنداعى باستامالاردى ىسكە اسىرۋعا ERG بۇگىنگە دەيىن جالپى سوماسى 690 ملن تەڭگەدەن استام قاراجات جۇمساعان.
اقتوبە وبلىسى,
حرومتاۋ قالاسى