الداعى 24-25 قىركۇيەك كۇندەرى الماتىدا العاش رەت «MYSTIC AYURVEDA & WELLNESS EXHIBITION» اتتى ايۋرۆەدا كورمەسى وتپەك, دەپ حابارلايدى Egemen.kz.
ايۋرۆەدا - 5000 جىلدان استام ۋاقىت بۇرىن پايدا بولعان ءداستۇرلى ۇندىلىك مەديتسينا جۇيەسى بولسا, ول كەسەلدەر ادام ساناسىنداعى تەڭگەرىمسىزدىكتەن نەمەسە كۇيزەلىستەن تۋىندايدى دەگەن ۇستانىمعا نەگىزدەلگەن. ايۋرۆەدانىڭ باستى قاعيداسى سوندا - دۇرىس تاماقتانۋ, ديەتا جانە ءومىر سالتى جانە شوپتىك پرەپاراتتاردىڭ كومەگىمەن دەنەدەگى, اقىل-وي مەن ساناداعى تەپە-تەڭدىكتى قالپىنا كەلتىرۋ ارقىلى اۋرۋلاردىڭ الدىن الۋ مەن شيپاسىن تابۋ.
سونىمەن بۇل كورمە ءۇندى ايۋرۆەداسىنىڭ, ونىڭ شوپتەرى مەن دەنساۋلىقتى ساۋىقتىرۋعا ارنالعان ونىمدەرىنىڭ قۇدىرەتىن كورسەتەدى.
دەنساۋلىق ساقتاۋ سالاسىنداعى ەرەكشە وقيعاعا وراي وتكەن ءباسپاسوز ءماسليحاتىندا وتانداستارىمىز ءۇشىن كورمەگە تىركەلۋ مەن قاتىسۋ تەگىن جۇرەتىنى ءمالىم بولدى.
ايۋرۆەدا جانە ساۋىقتىرۋ كورمەسىن قازاقستانداعى ءۇندىستاننىڭ توتەنشە جانە وكىلەتتى ەلشىسى دوكتور ت.ۆ.ناگەندرا پراساد ەرتەڭ, 24 قىركۇيەك كۇنى ساعات 9:30-دا Rixos Almaty قوناقۇيىندە رەسمي تۇردە اشادى.
كورمەدە ءۇندىستاننىڭ ايۋرۆەدالىق ءونىم وندىرۋشىلەرى شيپالىق قىزمەتتەرگە قوسا, ايۋرۆەديالىق ءدارى-دارمەكتەر مەن ءشوپ ونىمدەرىنىڭ الۋان ءتۇرىن ۇسىنعالى وتىر. وعان قوسا كورمەگە قاتىسۋشىلار ءۇندىستاننىڭ جەتەكشى ماماندارىنان, ايۋرۆەدا دارىگەرلەرى مەن وندىرۋشىلەرىنەن ارنايى ءىلىم الۋ مۇمكىندىكتەرى قاراستىرىلعان.
كورمە باعدارلاماسىنا ينتەراكتيۆتى B2B كەزدەسۋلەرى, ايۋرۆەدانى تاجىريبەدە قولدانۋدىڭ تىكەلەي كورسەتىلىمى مەن ايۋرۆەديالىق دارىگەرلەردىڭ كەڭەستەرى كىرەدى.
كورمەگە كەلۋشىلەر ايۋرۆەدانىڭ سانا, دەنە مەن رۋحتىڭ تەپە-تەڭدىگىن ساقتاۋعا قالاي كومەكتەسەتىنىن, جالپى باقۋاتتىلىققا قالاي ىقپال ەتەتىنىن, دەنساۋلىقتاعى ناقتى كىناراتتاردى قالاي شەشۋگە بولاتىنىن بىلە الادى.
ارنايى سەسسيالار ديەتا مەن تاماقتانۋ, دەتوكسيكاتسيا ادىستەرى, يوگا, مەديتاتسيا مەن ءشوپ دارىلەردى قولدانۋ سياقتى, ايۋرۆەدانىڭ ءارتۇرلى قىرلارىن قوزعايدى.
ايۋرۆەدا كورمەسىن Vipex Associates كومپانياسى Biz Network, MarketExpoGroup كومپانيالارىمەن مەن بىرلەسىپ, Ayushexcil - ءۇندىستاننىڭ ايۋرۆەدانى ناسيحاتتاۋ كەڭەسىنىڭ قولداۋىمەن ۇيىمداستىرىپ وتىر.
ورايى كەلىپ تۇرعاندا, قازىرگى تاڭدا ايۋرۆەدا سەكتورىنىڭ كەڭەيۋى جاڭا ينۆەستيتسيالىق مۇمكىندىكتەر اشىپ, وعان دۇنيە جۇزىندەگى ءىرى كاسىپكەرلەر, تەحنولوگيالىق كومپانيالار مەن مەديتسينالىق ورتالىقتار تارتىلىپ جاتقانىن اتاپ وتۋگە بولادى.
الماتى