سەمەيدە زاماناۋي مەكتەپ اشىلدى

KAZ Minerals توبى قۇنى 9,2 ملرد تەڭگەنى قۇرايتىن عالامات جوبانى سالىستىرمالى تۇردە وتە قىسقا مەرزىمدە ىسكە قوسقان.

جاڭا ءبىلىم ورداسىندا 48 وقۋ كابينەتى بار. ونىڭ ىشىندە: 6 ينفورماتيكا, 6 مۋلتيمەديا, 6 جالپى پاندەرگە ارنالعان (حيميا, فيزيكا, بيولوگيا) كابينەتتەر, روبوتوتەحنيكا, گرافيكا مەن مودەلدەۋ بولمەلەرى, توكارلىق-سلەسارلىق شەبەرحانا, ۇستاحانا, اسپاز بولمەسى, تىگىن كابينەتى ت.ب بولىپ بولىنەدى. سونىمەن قاتار مەكتەپتە 280 ورىندىق ءماجىلىس زالى مەن 420 ورىندىق اسحانا قاراستىرىلعان.

عيمارات ىشىندە ءبىر ۇلكەن سپورت زالى مەن باستاۋىش مەكتەپ وقۋشىلارى ءۇشىن شاعىن ويىن زالى جاساقتالعان. ودان بولەك مەكتەپ اۋماعىندا فۋتبول, ۆولەيبول, باسكەتبول الاڭدارى مەن جۇگىرۋ جولاعى جانە دەمالىس پەن وقۋعا ارنالعان باسقا دا ينفراقۇرىلىمدار ورنالاسقان.

مەكتەپ قۇرىلىسىن جوبالاۋ كەزىندە جانە جۇمىس بارىسىندا بارلىق زاماناۋي تالاپتار, اتاپ ايتقاندا قيمىل-قوزعالىسى شەكتەۋلى جانداردىڭ قاجەتتىلىگى دە ەسكەرىلدى. مۇندا 4 پاندۋس, عيماراتتىڭ ءىشى مەن سىرتىندا تاكتيلدى ءجۇرۋ جولاعى جانە 2 ليفت ىسكە قوسىلعان.

«مەكتەپ 1200 ورىندىق, ال ءبىز 1425 وقۋشىنى قابىلدادىق. سول سەبەپتى ەكى اۋىسىمدىق وقىتۋ جۇيەسىن  قاراستىرىپ جاتىرمىز. مەكتەپكە دەيىنگى دايىندىقتان وتكىزەتىن ەكى توپ اشۋ دا جوسپاردا بار. وبلىس ورتالىعىنا قالا كۇنىنە ارناپ وسىنداي كەرەمەت سىي جاساعان KAZ Minerals توبىنا العىسىمىز شەكسىز. كومپانيا قۇرىلىس جۇمىسىنان بولەك, شەبەرحانالار مەن روبوتوتەحنيكا جانە ينفورماتيكا كابينەتتەرىن جاساقتاپ بەردى. وقۋ بولمەلەرىندە ينتەراكتيۆتى تاقتالار ورناتىلعان. كومپانيا مەكتەپكە ساپاسى جوعارى جيھاز ساتىپ الدى. ونىڭ بارلىعى قازاقستاندىق ءونىم», دەدى №50 IT-مەكتەپ-ليتسەيى ديرەكتورىنىڭ مىندەتىن اتقارۋشى نارتاي شولتىقوۆ.

مەكتەپتىڭ اشىلۋىمەن 100-دەن اسا جاڭا جۇمىس ورنى پايدا بولدى. تامىزدا مۇعالىمدەر ءۇشىن كونكۋرس جاريالانىپ, وعان قاتىسقان 300 شاقتى ۇمىتكەردىڭ اراسىنان  88 وقىتۋشى ىرىكتەۋدەن وتكەن ەدى. ودان بولەك باسقا مەكتەپتەردەن 40 ۇستاز اۋىسىپ كەلدى. سولاي بولا تۇرا ليتسەيگە ءالى دە ينفورماتيكا, ماتەماتيكا, فيزيكا پاندەرىنىڭ وقىتۋشىلارى جەتىسپەۋى سەبەپتى قوسىمشا كونكۋرس جاريالاناتىن بولدى.

مەكتەپ قۇرىلىسىنا وتاندىق مەردىگەر ۇيىمدار تارتىلىپ, جۇمىستىڭ باسىم بولىگىندە وتاندىق وندىرۋشىلەر شىعارعان ماتەريالدار پايدالانىلدى.

ء«بىزدىڭ كومپانيا الەۋمەتتىك باعىتتى ۇستانادى, سول سەبەپتى الەۋمەتتىك سالانى دامىتۋعا قوماقتى قارجى جۇمسايمىز. بۇل باعىتتاعى بارلىق جۇمىس جەرگىلىكتى اتقارۋشى بيلىكپەن تالقىلانىپ, ايماققا قاجەتتى جوبالار جانە ولاردىڭ تيىمدىلىگى تالدانادى. سونداي  جوبالاردىڭ ءبىرى – زاماناۋي مەكتەپ قۇرىلىسى. مۇندا جوعارى دەڭگەيدەگى ينفورماتيكا جانە روبوتوتەحنيكا كابينەتتەرى, كەڭ ءماجىلىس زالى مەن اسحانا, سپورت زالدارى مەن اشىق الاڭدار جاساقتالدى. سونىمەن قاتار شاكىرتتەردىڭ ساباقتان تىس اڭگىمەلەسىپ, شىعارماشىلىقپەن اينالىسۋىنا قولايلى نەتۆوركينگ ايماعى بار. ءبىز بۇل مەكتەپتىڭ سۇرانىسقا يە بولىپ, ۇلى ابايدىڭ وتانىندا ءبىلىم دەڭگەيىن جاڭا ساتىعا كوتەرىپ, سەمەيدىڭ ماقتانىشىنا اينالاتىنىنا سەنىمدىمىز», دەپ مالىمدەدى KAZ Minerals Demeu كورپوراتيۆتىك قورىنىڭ ديرەكتورى رۋسلان قاسەنوۆ.

مەكتەپتىڭ اشىلۋ سالتاناتىنا قاتىسقان اباي وبلىسىنىڭ اكىمى نۇرلان ۇرانحاەۆ وقۋ كابينەتتەرىن ارالاي ءجۇرىپ, زاماناۋي مەكتەپتىڭ جاڭا اشىلعان «زاريا» اۋدانىنىڭ گۇلدەنۋىنىڭ العاشقى نىشانى ەكەنىن اتاپ ءوتتى.

«بىزدە بۇرىن مۇنداي مەكتەپ بولعان ەمەس. الدا ءالى تالايى تۇرعىزىلادى, بىراق بۇل مەكتەپ - سولاردىڭ العاشقىسى. قالادا كونگرەسس-حولل, ستاديون تۇرعىزىلىپ جاتىر. ەسكى ۇيلەردىڭ ورنىنا تۇتاس جاڭا اۋدان پايدا بولادى. بىردەن ايتا كەتەيىن – تاريحي عيماراتتارعا ەشكىم تيىسپەيدى. ەرتەڭ جاڭا ۇيلەردىڭ تەرەزەسىنەن بىردەن ەرتىسكە كوزىڭ تۇسەدى, بۇل وتە كەرەمەت كورىنىس بولماق», دەيدى نۇرلان ۇرانحاەۆ.

ەكىنشى سىنىپتا وقيتىن ايبىن دۇيسەنحانوۆ اتا-اناسىنىڭ ءوزىن جاڭا وقۋ جىلىندا جاڭا مەكتەپكە اۋىستىرعانىنا قۋانىشتى. بالاقاي روبوتوتەحنيكا ءپانىنىڭ باستالعانىن اسىعا كۇتىپ ءجۇر. ول روبوتەحنيكا كابينەتىندەگى جابدىقتارمەن جۇمىس ىستەۋدى كوپتەن ارمانداعانىن  جاسىرعان جوق.

«سەمەيدەگى وقۋ ورنىنىڭ تاپشىلىعى 5000-نان اسادى. جاڭا مەكتەپتە 1415 بالا وقيدى. وڭىردە «جايلى مەكتەپ» ۇلتتىق جوباسىنىڭ اياسىندا تاعى ەكى مەكتەپ سالىنىپ جاتىر. وسىلايشا ءبىز ايماقتاعى وقۋ ورنىنىڭ جەتىسپەۋشىلىگىن ازايتامىز», دەدى سەمەي قالاسى ءبىلىم ءبولىمىنىڭ باسشىسى سەرجان بۋلاباەۆ.

جاڭا مەكتەپ جايلى اسەرىمەن بولىسكەندەردىڭ ءبىرى - ەكى وقۋشىنىڭ اناسى مادينا نامازاقوۆا.

ء«بىز دە وسىندا اۋىستىق. بۇعان دەيىن بالالارىم ەكى ءتۇرلى مەكتەپتە وقىدى. مەنى قۋانتاتىنى – ساباقتار ەكى تىلدە وقىتىلادى. ءبىر بالام قازاق سىنىبىنا, ەكىنشىسى ورىس سىنىبىنا بارادى. مەكتەپتىڭ تاعى ءبىر باسىمدىعى – اكادەميالىق بىلىمنەن بولەك, IT سالاسىن تەرەڭدەتىپ وقىتاتىندىعىندا. بۇل سالانىڭ ءبىزدىڭ ومىرىمىزدە الار ورنى ەرەكشە. سونىمەن قاتار, قاۋىپسىزدىك ماسەلەسىنە دە باسا كوڭىل بولىنگەن. عيمارات اۋماعى تولىعىمەن بەينەباقىلاۋدا.  ارنايى وتكىزۋ جۇيەسى بار. تاعى ءبىر اتاپ وتەتىنى – زاماناۋي روبوتەحنيكا مەن ينفورماتيكا كابينەتتەرى», دەيدى سەمەي تۇرعىنى مادينا نامازاقوۆا.

كومپانيا وكىلدەرى مەكتەپ قۇرىلىسىنىڭ KAZ Minerals توبىنىڭ باسەكەگە قابىلەتتى, تيىمدىلىگى جوعارى ادامي كاپيتالدى دامۋ جولىنداعى ۇزاق مەرزىمدى باسىم ماقساتتارىن جۇزەگە اسىرۋداعى جاڭا كەزەڭ ەكەنىن اتاپ ءوتتى. كومپانيا سوڭعى جىلدارى ايماقتاعى جوعارى جانە ورتا ءبىلىم بەرۋ مەكەمەلەرىمەن ارىپتەستىك ورناتۋ ارقىلى وتاندىق ءبىلىم بەرۋ سالاسىنا قولداۋ كورسەتىپ كەلەدى. جىل سايىن تالانتتى تۇلەكتەرگە گرانتتار ءبولىنىپ, كومپانيانىڭ كاسىپورىندارىندا جالاقىسى تولەنەتىن كاسىبي تاجىريبەدەن وتۋگە مۇمكىندىك بەرىلەدى جانە جەرگىلىكتى تۇرعىنداردى جاڭا كاسىپكە باۋلۋ باعدارلامالارى جۇزەگە اسىرىلۋدا. جاڭا مەكتەپتىڭ اشىلۋى ارقىلى بۇل پروتسەسس ورتا ءبىلىم بەرۋ سالاسىن دا قامتىدى دەۋگە نەگىز بار.