تانىمال سازگەر, تەلەجۇرگىزۋشى ارمان دۇيسەنوۆ ءومىرىنىڭ سوڭعى كۇندەرى ينديرا ەلەمەستىڭ جەرتولەدەگى ستۋدياسىندا تۇرىپ جۇرگەن. وكىنىشكە قاراي, ونەر يەسىنىڭ اقتىق دەمى دە ءدال سول ءان جازۋ ستۋدياسىندا تاۋسىلعان, دەپ جازادى Egemen.kz.
«استارلى اقيقات» باعدارلاماسىندا ينديرا ەلەمەس ايتقانداي, ول ارمان دۇيسەنوۆپەن تۋعان اعالى-قارىنداستاي قارىم-قاتىناستا بولعان. سوندىقتان ءانشى سازگەردىڭ قازاسىن اۋىر قابىلداعان.
«جۇرەگى توقتاپ قالىپ, ءبىر ساتتە كەتىپ قالدى. اۋىرىپ, سىرقاتتانىپ, قينالىپ جاتقان جوق. بالالاردىڭ ايتۋىنشا, سۋ ىشكەن. «قالايسىز, ءبارى جاقسى ما؟» دەگەندە ء«يا» دەپتى. سۋ ءىشتى, جاتتى, سودان كەتىپ قالىپتى. تاڭعى ساعات 9 شاماسىندا», دەيدى ينديرا ەلەمەس.
ونەر يەسى ءتىپتى مارقۇمنىڭ جانازاسىن ءوز ۇيىنەن شىعارۋعا ارەكەتتەنگەن كورىنەدى.
«تۋعان اعامداي جاقسى كوردىم. مۇنداي نارسە ايتۋ اۋىر. سول ۋاقىتتا ارمان اعا قاتتى كۇيزەلىستە جۇرگەن. جانۇياسىن, بالا-شاعاسىن, ايەلىن قاتتى ساعىندى. ەگەر ءۇي بولماسا, جانازاسىن ءبىزدىڭ ۇيدەن شىعارايىق دەپ نيەتتەندىم, بىراق يمامدار قارسى بولدى», دەدى ول.
ارمان دۇيسەنوۆتىڭ جانازاسى الماتى ورتالىق مەشىتىندە وقىلدى.
ينديرا ەلەمەستىڭ سوزىنشە, ءومىرىنىڭ سوڭعى كۇندەرى ول بارىمەن قوشتاسقانداي بولعان.
«ارمان اعا وتباسىن, قىزىن, ۇلدارىن, اسىرەسە كىشكەنتايىن وتە قاتتى جاقسى كوردى. سويلەسىپ قالعاندا 100-ءدىڭ 90 پايىزىندا وتباسى, ايەلى جايلى ايتاتىن. ايەلى ايسۇلۋ حانىمدى قاتتى جاقسى كورەتىن. سوڭعى ساتتەردە قوشتاسقانداي دا بولدى.
«مەن وزىممەن ماقتانامىن, سەبەبى وتە جاقسى بالالاردى اسىرادىم. ۇلىم ابىلاي مەنىڭ ورنىمدى باسا الادى» دەگەن كەزدە مەن «اعا, قويىڭىزشى» دەيتىنمىن. تەك قىزىن قاتتى ۋايىمدايتىن, سەبەبى ول لوندوندا وقيتىن», دەدى ول.
سوڭعى جىلدارى ارمان دۇيسەنوۆتى تەلەارنالاردان شەتتەتىپ, ساحنادان الىستاتقانى تۋرالى دا ايتىلعان. ينديرا ەلەمەس بۇل ماسەلەگە قاتىستى دا پىكىر بىلدىرە كەتتى.
«شاقىرعاندار بولدى, ارادا نە بولعانىن قايدام, بىراق كەيىن سول كىسىلەر شاقىرماي قالدى. ارمان اعانىڭ اتىنان «ول كىسى سىرقاتتانىپ جاتىر, ەشقايدا شىقپايدى» دەپ ايتقاندار دا بار ەكەن. اعانىڭ ءوزى دە تاڭعالاتىن», دەدى ول.