استانا. 27 قاڭتار. كۋبا رەۆوليۋتسياسىنىڭ ليدەرى فيدەل كاسترو ءبىراز ۋاقىتقا سوزىلعان ۇنسىزدىكتەن كەيىن ءۇنىن شىعارىپ, ءبىرىنشى رەت كۋبا مەن اقش-تىڭ اراسىنداعى ديپلوماتيالىق قارىم-قاتىناستىڭ قالپىنا كەلتىرۋىنە بايلانىستى ءوزىنىڭ ويىن ءبىلدىردى. بۇل تۋرالى Lenta.Ru حابارلادى.
«مەن اقش-تىڭ ساياساتىنا سەنبەيمىن, سوندىقتان دا ولاردىڭ وكىلدەرىنە ءبىر اۋىز ءسوز دە ايتقان جوقپىن. الايدا, بۇل اسكەري جانجالدى بەيبىت جولمەن شەشۋدەن باس تارتۋدى بىلدىرمەيدى», - دەپ اتاپ ءوتتى فيدەل كاسترو ءوزىنىڭ سوزىندە.
ونىڭ ايتۋىنشا, اقش پەن لاتىن امەريكاسى ەلدەرى اراسىنداعى قارىم-قاتىناستىڭ ەشقانداي كۇش قولدانىلماي شەشىلگەن كەز كەلگەن پروبلەمالارىنىڭ رەتتەلۋى ءتيىستى حالىقارالىق نورمالار مەن پرينتسيپتەر تۇرعىسىنان قارالۋى كەرەك.
«ءبىز قاشاندا بۇكىل الەم حالىقتارىمەن, سونىڭ ىشىندە ءوز قارسىلاستارىمىزبەن اراداعى ىنتىماعىمىز بەن دوستىعىمىزدى قورعايتىن بولامىز», - دەگەندى قوستى 88 جاستاعى كۋبا رەۆوليۋتسياسىنىڭ كوسەمى.
كۋبا 12 قاڭتار كۇنى اقش-پەن جاسالعان كەلىسىم شەڭبەرىندە 53 ساياسي تۇتقىندى بوستاندىققا شىعاردى. ۆاشينگتون بۇل تاراپتاعى جۇمىستىڭ كۇشەيە بەرەتىنىن ايتىپ وتىر. بىراق رەسمي گاۆانا ەلدە ساياسي تۇتقىننىڭ جوق ەكەنىن جەتكىزدى. كۋبا بيلىگى ادەتتە مۇنداي ادامداردى «امەريكانىڭ اقشا تولەپ قويعان جالدامالىلارى» دەپ اتايدى.
اقش پەن كۋبانىڭ جارتى عاسىرعا سوزىلعان جاۋلىق قارىم-قاتىناسىنىڭ سوڭى وتكەن جىلدىڭ جەلتوقسان ايىندا اياقتالعانداي بولىپ كورىنەدى. وسى كەزدە اقش پرەزيدەنتى كۋبامەن جاقىنداسۋ باعىتىنىڭ ۇستالاتىنىن جاريالاپ جىبەردى.
ەكى ەلدىڭ اراسىنداعى تەكەتىرەس 1959 جىلى بوستاندىق ارالى رەۆوليۋتسيونەرلەر قولدارىنا كوشكەننەن كەيىن باستالدى.
مۇرات ايتقوجا.
دەرەك, سۋرەت: Lenta.Ru.