قازاقستان رەسپۋبليكاسى وقۋ-اعارتۋ مينيسترلىگىنىڭ ءبىلىم سالاسىندا ساپانى قامتاماسىز ەتۋ كوميتەتى 2024 جىلدىڭ سوڭىنا دەيىن پروفيلاكتيكالىق باقىلاۋ جۇرگىزۋ ءۇشىن 2487 ءبىلىم بەرۋ ۇيىمىن انىقتادى, دەپ حابارلايدى Egemen.kz.
وقۋ-اعارتۋ مينيسترلىگىنىڭ حابارلاۋىنشا, جاڭا وقۋ جىلىنىڭ باسىندا ءبىلىم بەرۋ سالاسىنداعى ساپانى قامتاماسىز ەتۋ جونىندەگى اۋماقتىق دەپارتامەنتتەر 422 ءبىلىم بەرۋ ۇيىمىندا باقىلاۋ-باعالاۋ ءىس-شارالارىن جۇرگىزگەن. ءىس-شارالار وقۋ ۇدەرىسىندەگى پروبلەمالاردى انىقتاۋعا, وقۋ پروتسەسىنىڭ مەملەكەتتىك جالپى ءبىلىم بەرۋ ستاندارتىنىڭ تالاپتارىنا جانە بىلىكتىلىك تالاپتارىنا سايكەستىگىن انىقتاۋعا باعىتتالعان.
«وتكەن جىلى كوميتەت پەن ونىڭ اۋماقتىق دەپارتامەنتتەرى 2624 ءبىلىم بەرۋ ۇيىمىندا ءتۇرلى تەكسەرۋلەر جۇرگىزدى, ونىڭ ىشىندە مەملەكەتتىك اتتەستاتتاۋ, پروفيلاكتيكالىق باقىلاۋ, شاعىمدار بويىنشا جوسپاردان تىس تەكسەرۋلەر جۇرگىزىلدى. تەكسەرۋ ناتيجەسىندە مۇعالىمدەردىڭ بىلىكتىلىگىن ارتتىرۋ كۋرستارىنىڭ ۋاقتىلى اياقتالماۋى, مەكتەپتەردىڭ ماتەريالدىق-تەحنيكالىق بازاسىنىڭ تالاپقا ساي قامتاماسىز ەتىلمەۋى فاكتىلەرى انىقتالدى», دەدى ءبىلىم سالاسىندا ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ.
ايتا كەتەرلىگى, مونيتورينگ جانە باعالاۋ قىزمەتى - ءبىلىم بەرۋ قىزمەتىنىڭ ساپاسىن, ءبىلىم بەرۋ ۇدەرىسىنە قاتىسۋشىلاردىڭ قۇقىقتارى مەن قاۋىپسىزدىگىن قورعاۋدى قامتاماسىز ەتەتىن شارا.