پرەمەر-مينيستر اقتوبە وبلىسىنا جۇمىس ساپارى اياسىندا ونەركاسىپتىك بىرقاتار كاسىپورىننىڭ وندىرىستىك قۋاتىمەن تانىسىپ, ولاردىڭ مىسالىندا وتاندىق بيزنەستى قولداۋ شارالارىنىڭ تيىمدىلىگىن جانە جولداۋدا مەملەكەت باسشىسى العا قويعان مىندەتتەردىڭ جۇزەگە اسىرىلۋ بارىسىن تەكسەردى. اتاپ ايتقاندا, وڭدەۋ ونەركاسىبى, كولىك-لوگيستيكا سالاسى مەن اوك نازارعا الىندى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ۇكىمەت باسشىسى اقتوبە رەلس-ارقالىق زاۋىتىنىڭ وندىرىستىك قۋاتىمەن تانىستى. كاسىپورىن جىلىنا 430 مىڭ تونناعا دەيىن: تەمىر جول رەلستەرى مەن ءپىشىندى يلەك ونىمدەرىنىڭ كەڭ نومەنكلاتۋراسى مەن ارنايى پروفيلدەر جانە باسقا دا ونىمدەر شىعارادى. زاۋىتتا رەلستەردى تەرموبەرىكتەۋدىڭ جوعارى ساپاسىن قامتاماسىز ەتەتىن يننوۆاتسيالىق تەحنولوگيا قولدانىلادى. وندىرىلگەن ءونىم ەلىمىزدىڭ تەمىر جول قۇرىلىسىندا پايدالانىلادى, سونداي-اق تۇركيا, تمد ەلدەرى, ەستونيا, لاتۆياعا ەكسپورتتالادى.
مۇندا اقتوبە وبلىسىنداعى ونەركاسىپتىڭ دامۋى مەن ينۆەستيتسيالىق جوبالاردىڭ جۇزەگە اسىرىلۋ بارىسى باياندالدى. جالپى, بيىلعى 8 ايدا ءوڭىردىڭ ونەركاسىپ كولەمى 6,9%-عا ءوسىپ, 1,7 ترلن تەڭگەگە دەيىن; وڭدەۋ ونەركاسىبى – 15%-عا, 699,2 ملرد تەڭگەگە دەيىن ءوستى. وڭىرلىك پۋلعا بۇگىندە تكم, قۇرىلىس يندۋسترياسى, ەنەرگەتيكا, مۇناي-گاز حيمياسى سياقتى جانە باسقا دا سالالاردا قۇنى 3,9 ترلن تەڭگەنى قۇرايتىن 65 ينۆەستيتسيالىق جوبا كىرەدى. ولاردى ىسكە قوسۋ 15 مىڭنان استام ازاماتتى جۇمىسپەن قامتۋعا مۇمكىندىك بەرەدى. ولجاس بەكتەنوۆ وتاندىق كاسىپورىنداردى قولداۋ – ۇكىمەتتىڭ باسىم مىندەتى ەكەنىن اتاپ ءوتتى. قولداۋ شارالارى كورسەتىلەدى, سونىمەن بىرگە يمپورتتى الماستىرۋعا اسەر ەتەتىن ساپالى ءارى قولجەتىمدى تاۋارلار تۇرىندەگى ناتيجەلەر قاجەت.
اقتوبە فەرروقورىتپا زاۋىتىن ارالاۋ كەزىندە پرەمەر-مينيستر ءوندىرىس بارىسىمەن تانىستى. جوبالىق قۋاتى جىلىنا 740 مىڭ توننادان اساتىن زاۋىتتا قوج وڭدەۋ تسەحى, تاۋ-كەن بايىتۋ جانە باسقا دا قوسالقى نىساندار جۇمىس ىستەيدى. وندىرىلەتىن فەرروحروم, فەرروسيليتسي جانە باسقا قورىتپالار اسا بەرىك بولات وندىرۋدە, شويىندى لەگيرلەۋدە, سونداي-اق مەتاللۋرگيانىڭ باسقا دا باعىتتارىندا پايدالانىلادى. زاۋىتتا 4060 جۇمىس ورنى اشىلدى. كولەمدى ودان ءارى ۇلعايتۋ ماقساتىندا بالقىتۋ پەشتەرىنىڭ قۋاتى 300 مىڭنان 700 مىڭ تونناعا دەيىن ارتتىرىلدى.
ولجاس بەكتەنوۆ يننوۆاتسيالىق تەحنولوگيالاردى ەنگىزۋدىڭ ماڭىزدى ەكەنىن اتاپ ءوتتى, بۇل جوعارى دەڭگەيدە وڭدەلگەن ءونىمنىڭ ساپاسىن ارتتىرىپ قانا قويماي, سونىمەن قاتار ونەركاسىپتىك قاۋىپسىزدىك, ەكولوگيا ماسەلەلەرىن شەشۋگە مۇمكىندىك بەرەدى. مەملەكەت باسشىسىنىڭ تاپسىرماسى بويىنشا وتاندىق بيزنەسكە قاجەتتى قولداۋ كورسەتىلۋدە. الىپ كاسىپورىنداردىڭ ءوندىرىس كولەمىنىڭ ءوسۋى ءوز كەزەگىندە ارالاس سالالاردىڭ دامۋىنا, جاڭا جۇمىس ورىندارىن اشۋعا, ادامداردىڭ ءومىر ءسۇرۋ ساپاسىن ودان ءارى جاقسارتۋعا سەرپىن بەرەدى.
«اكۆاتوريا-اقتوبە» جشس وندىرىستىك الاڭدارىن ارالاۋ كەزىندە تكش سالاسىن ساپالى جاڭارتۋ شارالارىنا نازار اۋدارىلدى. مۇندا كارىز-سورعى ستانسالارى, اۆتوماتتاندىرىلعان جىلۋ پۋنكتتەرى, بلوك-مودۋلدىك قازاندىقتار, ەنەرگەتيكالىق رەسۋرستار مەن سۋمەن جابدىقتاۋدى ەسەپكە الۋ جۇيەلەرى جاسالادى. كاسىپورىنعا «دامۋ» كاسىپكەرلىكتى دامىتۋ قورى ارقىلى جەڭىلدىگى بار قارىز تۇرىندە مەملەكەتتىك قولداۋ كورسەتىلدى, بۇگىندە مۇندا 100-گە جۋىق مامان جۇمىس ىستەيدى. ولجاس بەكتەنوۆ نارىق سۇرانىستارىنا باسا نازار اۋدارا وتىرىپ, شىعارىلاتىن تاۋارلار جەلىسىن ودان ءارى كەڭەيتۋ قاجەتتىگىن اتاپ ءوتتى. مەملەكەت باسشىسى ءبىرىنشى كەزەكتەگى ينفراقۇرىلىمدىق ماسەلەلەردى شەشۋدى تاپسىرعان بولاتىن, وسىعان بايلانىستى مۇنداي وتاندىق كاسىپورىندار كوممۋنالدىق ينفراقۇرىلىمدى جاڭعىرتۋدىڭ 2025-2030 جىلدارعا ارنالعان باعدارلاماسىن ىسكە اسىرۋ ءۇشىن اسا ماڭىزدى.
سونداي-اق اقتوبەدە «Dina Market» جشس ساۋدا-لوگيستيكالىق ورتالىعىنا باردى. كاسىپورىنعا مەملەكەت تاراپىنان 1 ملرد تەڭگەدەن استام سوماعا كرەديت مولشەرلەمەسىن سۋبسيديالاۋ تۇرىندە قولداۋ كورسەتىلدى. 130 ادام جۇمىس ورىندارىمەن قامتاماسىز ەتىلدى. بۇل ەلىمىزدىڭ باتىسىنداعى بارلىق ينفراقۇرىلىممەن جابدىقتالعان العاشقى «ا» كلاستى ساتۋ قويماسى. نىساننىڭ تاۋارلاردى تيەۋ جانە ءتۇسىرۋ ءۇشىن پايدالانىلاتىن جەكە تەمىرجول جەلىسى بار. لوگيستيكالىق ورتالىقتىڭ قۋاتى 70 مىڭ توننا جۇكتى قۇرايدى.
سلو الاڭىن تەكسەرۋ بارىسىندا پرەمەر-مينيستر ءوسىپ كەلە جاتقان قاجەتتىلىكتى ەسكەرە وتىرىپ, ءوڭىردىڭ لوگيستيكالىق الەۋەتىن ودان ءارى دامىتۋعا نازار اۋداردى. قىتاي باعىتىنداعى اۆتوموبيل تاسىمالى جىل سايىن 2 ەسەدەن استام ءوسىم كورسەتىپ وتىرعانى, كونتەينەرلىك تاسىمالدار 2011 جىلعى 1 مىڭ جفب-دان (جيىرما فۋتتىق بالاماسى) 2023 جىلى 1 ملن جفب-عا دەيىن وسكەنى اتاپ ءوتىلدى.
«مەملەكەت باسشىسى قازاقستان حالقىنا جولداۋىندا كولىك-لوگيستيكا سالاسىن دامىتۋدىڭ ستراتەگيالىق باسىمدىعىن اتاپ ءوتتى. ءبىز ءوزىمىزدى «شىعىس – باتىس» جانە «سولتۇستىك – وڭتۇستىك» باعىتتارىنداعى اعىنداردى قامتاماسىز ەتەتىن ەۋرازيا ورتالىعىنداعى كولىك حابى رەتىندە دامىتىپ كەلەمىز. حالىقارالىق جۇك اعىندارىنا قوسىلۋ ارقىلى ءبىز ءوز اۋماعىمىزدا جۇكتەردى وڭدەۋدى قامتاماسىز ەتۋىمىز كەرەك. ول ءۇشىن ءتيىستى تەرمينالدىق قۋاتتار قۇرىلۋى ءتيىس. قولدانىستاعى ساۋدا-لوگيستيكالىق كەشەندەردى كەڭەيتۋدى جانە ىسكە قوسۋدى جانداندىرۋ قاجەت», دەپ اتاپ ءوتتى ولجاس بەكتەنوۆ.
پرەمەر-مينيستر اقتوبە وبلىسىنداعى «ايس-پليۋس» جشس-عا بارىپ, وڭىردەگى اگروونەركاسىپتىك كەشەننىڭ دامۋىمەن تانىستى. كاسىپورىننىڭ تاۋارلى-ءسۇت فەرماسى سەكىلدى وزىندىك شيكىزات بازاسى بار. جىل سايىن وڭىردە جانە ودان تىس جەرلەردە سۇرانىسقا يە 40 مىڭ توننادان استام ءسۇت ونىمدەرى شىعارىلادى. وندىرىستە 400-دەن استام ادام ەڭبەك ەتەدى.
«ايس-پليۋس» جشس باسشىسى قۋانىش يششانوۆ وزدەرىندەگى شيكىزات كولەمىن ۇلعايتۋ ءۇشىن فەرمانى 1,6 مىڭ باسقا كەڭەيتۋ جوسپارلارى تۋرالى حابارلادى. ول ءۇشىن كاسىپكەر جەڭىلدىگى بار نەسيە تۇرىندەگى مەملەكەتتىك قولداۋ شارالارىن پايدالانۋدى جوسپارلاپ وتىر.
«وتاندىق ءسۇت ونىمدەرىمەن تولىق ءوزىن-ءوزى قامتاماسىز ەتۋگە كوشۋ – پرەزيدەنتتىڭ تاپسىرماسى. ونى ىسكە اسىرۋ ءۇشىن بىزدە قاجەتتى شيكىزات, رەسۋرستار, كادرلار, تەحنولوگيالار بارلىعى بار. ۇكىمەت تاۋارلى-ءسۇت فەرمالارىن ىسكە قوسۋدى بەلسەندى قولدايدى جانە ىنتالاندىرادى. ينۆەستيتسيالىق سالىمدار, انالىق مال باسىن ساتىپ الۋ, ءسۇت ءوندىرۋ قۇنىن ارزانداتۋ, سونداي-اق جەمشوپ ساتىپ الۋ شىعىندارى سۋبسيديالانادى. مۇنداي جوبالار بىردەن ەكى نەگىزگى ماسەلەنى شەشۋى ءتيىس – ەلىمىزدى ساپالى جانە ارزان وتاندىق ونىممەن قامتاماسىز ەتۋ جانە اۋىلدىق جەرلەردىڭ تۇرعىندارى ءۇشىن جىل بويى جۇمىس ورىندارىن قۇرۋ», دەدى پرەمەر-مينيستر.