استانا. 15 ماۋcىم. زاڭسىز ەسىرتكى تاسىمالىنا قاتىسى بار دەگەن كۇدىكپەن قىتايدا ۇستالعان قازاقستان ازاماتى اقجارقىن تۇرلىباي ءومىر بويىنا باس بوستاندىعىنان ايىرىلدى. بۇل تۋرالى ونىڭ قورعاۋشىسى سۇڭقار نۇرماعامبەتوۆتىڭ سوزىنە سىلتەمە جاساعان tengrinews.kz حابارلادى.
«گۋانچجوۋ سوتى شىعارعان ۇكىمگە ءبىزدىڭ تاراپ كەلىسپەيدى. ءبىز اپەللياتسيالىق ينستانتسياعا شاعىمدانامىز. بۇل ىستەن اقجارقىننىڭ تاعدىرىنا الاڭداۋشىلىق بىلدىرگەننىڭ بارلىعى حاباردار بولىپ وتىرادى», – دەيدى قورعاۋشى.
سونداي-اق, ول سوتقا قازاقستان سىرتقى ىستەر مينيسترلىگىنىڭ وكىلدەرى مەن سوتتالۋشىنىڭ تۋعان-تۋىستارى قاتىسقانىن ايتتى.
ەستەرىڭىزگە سالا كەتەيىك, 20 جاستاعى اقجارقىن تۇرلىباي 2014 جىلدىڭ ناۋرىز ايىندا ەسىرتكى زاتتارىن زاڭسىز تاسىمالدادى دەگەن كۇدىكپەن ۇستالعان بولاتىن. ول گۋانچجوۋ اەروپورتىندا مالايزياعا ۇشپاق بولعان جەرىندە قولعا ءتۇستى. ءتىنتۋ كەزىندە وتانداسىمىزدىڭ جۇگىنەن ەسىرتكى زاتتارى تابىلعان.
ەلامان قوڭىر.
دەرەك: tengrinews.kz.
سۋرەت. vk.com.