اتىراۋ وبلىسىنداعى 8 جول ۋچاسكەسىن سالۋعا جانە جوندەۋگە ۇكىمەت رەزەرۆىنەن قارجى ءبولىندى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
قۇجاتتا قارعىن سۋ سالدارىنان زارداپ شەككەن جولداردى قالپىنا كەلتىرۋگە اتىراۋ وبلىسىنىڭ بيۋدجەتىنە اۋدارۋ ءۇشىن ۇكىمەتتىڭ توتەنشە رەزەرۆىنەن قر كولىك مينيسترلىگىنە شامامەن 5,9 ملرد تەڭگە ءبولۋ قاراستىرىلعان.
«اتالعان قاراجاتتىڭ 4,6 ملرد تەڭگەسى وبلىستىق ماڭىزى بار اۆتوجولداردىڭ جەتى ۋچاسكەسىن, ونىڭ ىشىندە, «يندەر – قاراباۋ – ساعىز», قاراباۋ كەنتىنە كىرمە جولدار, «سارىتوعاي – ماحامبەت», «اتىراۋ – يندەر», سونداي-اق قۇلسارى قالاسىنداعى جاياۋ جۇرگىنشىلەر جولىن قالپىنا كەلتىرۋگە باعىتتالادى. سۋ تاسقىنى سالدارىنان زارداپ شەككەن «يندەر – قاراباۋ – ميالى – ساعىز» اۆتوجولىنداعى كوپىر مەن سۋ وتكىزۋ قۇبىرلاردىڭ قۇرىلىسىنا شامامەن 1,3 ملرد تەڭگە بولىنەدى», دەلىنگەن حابارلامادا.
ايتا كەتەيىك, سۋ تاسقىنى 11 جول ۋچاسكەسىندە ەلەۋلى قيراتۋلارعا اكەلىپ, بەس ۋچاسكەدە سۋ وتكىزگىش قۇبىرلارعا زاقىم كەلتىرگەن.