كەلەشەگى كەمەل كومبينات

يندۋستريالاندىرۋ ءىس ۇستىندە

قۇرىلىس پەن يندۋستريا ۇعىم­دارى, بۇل ەكى سالانىڭ اراسى ءبىر-بىرىنەن قاشىق كەتپەيدى. ءارى ءبىرىن ءبىرى ۇنەمى تولىقتىرىپ, بايىتىپ وتىرادى. بۇگىنگى وندىرىستىك قارىم-قاتىنىستاردا قۇرىلىس يندۋسترياسى دەگەن دە ۇعىم بار. بۇل قۇرىلىسقا قاجەتتى ونىمدەر مەن ماتەريالدار ءوندىرىسى دەگەن ءسوز. ورال قالاسىندا وتكەن جىلدىڭ اياعىندا ىسكە قوسىلعان ءۇي قۇرىلىسى كومبيناتى تۋرالى اڭگىمە قوزعالعان كەزدە دە قۇرىلىس پەن يندۋستريانىڭ بىرلىگى مەن ۇندەستىگىن اينالىپ وتە المايمىز. بۇگىنگى كۇنى تەرەڭىرەك وي ءجۇ­گىر­تىپ كورسەڭىز تۇتاستاي ەلىمىز بەي­نە ءبىر الىپ قۇرىلىس پەن يندۋس­تريا الاڭىنا اينالىپ كەتكەندەي كۇي كەشەسىز. قازىرگى ۋاقىتتا بۇل ەكەۋى­­نىڭ دە قارقىنى جاقسى ەكە­نىنە ەش­كىم كۇمان كەلتىرە المايدى. ال وسى قارقىندى بۇدان ءارى تاعى دا ەكى-ءۇش ەسە كوتەرۋ ءۇشىن نە ءىس­تەگەن ءجون؟ با­تىس قاقپانىڭ ءوندىرىس­تىك قۋا­تىن­ ارتتىرۋعا ۇلەس قوسا باس­تاعان «بو­لا­شاق – ت» جشس-ىنە قاراس­تى ءۇي قۇرى­­لىسى كومبيناتى وسى ساۋال­عا جاۋاپ بەرە الاتىنداي جارقىن مىسال. بۇل بىرەگەي نىسان «بيزنەستىڭ جول كارتاسى-2020» باعدارلاماسى اياسىندا تۇرعىزىلعان. جاڭا ءوندى­رىستىك قۇرىلىم يەلەرى تۇرعىن ءۇي­لەر­مەن قاتار الەۋمەتتىك-تۇر­مىس­­تىق سالا شەڭبەرىندەگى قۇرى­لىس­­تارعا دا ءوز قولتاڭبالارىن قال­دى­رۋدى كوزدەپ وتىر. مۇنداعى قۇ­رال-جابدىق­تار مەن قوندىرعىلار گەر­مانيا مەن فينليانديادان جانە يتا­ليادان جەتكىزىلگەن. وسى ارقى­لى كوم­بيناتتىڭ بىلىكتى مامان­دارى زاماناۋي تەحنولوگيامەن جۇ­مىس ىستەۋگە قول جەتكىزە الدى. مۇن­داعى جۇمىس ۇدەرىسى تۇگەلدەي اۆتو­ماتتاندىرىلعان. مىنە, قۇرىلىس قارقىنىن كوتەرۋگە قاجەتتى تاعى ءبىر فاكتوردى ءدال وسى تۇستان كورەمىز. ءجۇز رەت ەستىگەننەن, ءبىر رەت كور­گەن ارتىق دەگەندەي, ءبىز وسى ءون­دىرىستىك ۇدەرىستى كورۋگە ىقىلا­سى­مىز بار ەكەنىن جوعارىدا اتالعان قۇرىلىس كومپانياسىنىڭ باس دي­رەكتورى ق.قوششانوۆقا ايتقان كەزىمىزدە ول بۇل ۇسىنىسىمىزدى بىردەن قابىل الدى. ءارى كوپ كەشىكپەي ءبىزدى ءوز كولىگىمەن جاڭا كومبيناتقا الىپ بارىپ كورسەتتى. اتالعان ۇدەرىستىڭ كورىنىسى كەلىستى-اق. ەڭسەسى بيىك عيماراتتىڭ جوعارى بولىگىندە ورناتىلعان قۇرىلعى, ياعني اۆتوماتتى جۇيە ارقىلى شارتتى تۇردە العاندا تومەندەگى الىپ ىدىسقا ەرىتىندى قۇيىلىپ تۇسەدى. سودان كەيىن بۇل قۇيما جازىلىپ تەگىستەلەدى. ءۇي قۇرىلىسىنا قاجەتتى تەمىر-بەتون قابىرعالاردىڭ تۇڭعىش قاڭقاسى وسىلاي جاسالادى ەكەن. ادەتتە, قۇرىلىس سالۋ كەزىندە ونىڭ قابىرعاسىن تۇرعىزۋ ۇزاق ۋاقىت الاتىنى بەلگىلى. ال قا­­­بىر­عالىق ماتەريال تەمىر-بەتون­نان تۇرعىزىلعان جاعدايدا بۇل ۋاقىت اجەپتاۋىر قىسقاراتىنىنا دا ءدال وسى ارادا ايقىن كوز جەتكىزدىك. – ءبىزدىڭ قازىرگى ءۇي قۇرىلىسى كومبيناتى ونىمىنە ۇقساس قابىر­عالىق ماتەريال بۇرىن دا كوپ قولدانىلعان. الايدا, قازىرگى قۇرى­لىس يندۋسترياسى ءونىمىنىڭ ولاردان اجەپتاۋىر ايىرماشىلىعى مەن ارتىقشىلىعى بار. ونىڭ اراسىنا جىلۋ ۇستايتىن ماتەريالدار سا­لىنعان. سونداي-اق, جازدىڭ ىستىق كۇندەرىندە تەمىر-بەتون سالقىن اۋانى دا ۇستاپ قالا الادى, – دەيدى فيرما باسشىسى قايدار جاسەن ۇلى. ەلىمىزدىڭ باتىس قاقپاسى – ورال قالاسىنىڭ باس دامۋ جوس­پارىنا سايكەس ءۇي قۇرىلىسى كومبيناتىنىڭ قىزمەتىن ءتيىمدى تۇردە پايدالانۋدىڭ وزگە تەتىكتەرى دە قاراستىرىلعان. بۇل جونىندە ءبىر ورايى كەلگەن ساتىندە باق وكىلدەرىنە باتىس قازاقستان وبلى­سىنىڭ اكىمى نۇرلان نوعاەۆ ءاڭ­گى­مەلەپ بەرگەن ەدى. مۇنىڭ جاي-جاپسارى تومەندەگىدەي. بۇگىندە وبلىس ورتالىعىندا­عى اپاتتى جاعدايداعى ۇيلەردى تو­لىقتاي جويۋ جونىندەگى ماسە­لە جەرگىلىكتى اتقارۋشى ورگان جەتەك­شىلەرىنىڭ نازارىندا تۇر. مىسا­لى, قازىرگى كەزدە ورال قالاسىندا وسىنداي ساناتتاعى وتىز ءۇش ءۇي بار. مۇندا 350 ادام تۇرادى. سول تۇرعىنداردىڭ ءۇي جاعدايلارىن جاقسارتۋ ءۇشىن جەرگىلىكتى مەملە­كەتتىك ورگاندار «سۆ پليۋس» جانە «بولاشاق-ت» قۇرىلىس كومپانيالارىمەن كەلىسىم جاساۋدى ۇيعارعان. ەگەر بۇل ءىس ويداعىداي شەشىلسە, اتالعان فيرمالار اپاتتى ۇيدەگى تۇرعىندارعا ارناپ ءوز قاراجاتى ەسەبىنەن باسپانا تۇرعىزباق. ءوز كەزەگىندە اكىمدىك ينستيتۋت وكىل­دەرىنە تۇرعىن ءۇي قۇرىلىسى ءۇشىن ءتيىستى جەر تەلىمدەرىن ءبولىپ, ينجە­نەرلىك-كوممۋنيكاتسيالىق جۇيەلەر جونىنەن كومەك كورسەتپەك. بۇل ەكى جاققا دا پايدالى. ءسوز جوق, مۇنداي جاۋاپتى ءىستى بۇگىندە قولدانىسپەن داستۇرگە باتىل ەنە باستاعان مەملەكەتتىك جەكە مەنشىك ارىپتەستىك ارقىلى ويداعىداي جۇزەگە اسىرۋعا بولاتىنى كامىل. ءتۇيىپ ايتقاندا, جاڭا جىلدىڭ العاشقى كۇندەرىنەن باستاپ ءۇي قۇرىلىسى كومبيناتى ۇجىمى الدا تۇرعان اۋقىمدى ەڭسەرۋگە بەت بۇردى. ولاردىڭ باستى ماقساتى «قولجەتىمدى باسپانا-2020» مەم­لەكەتتىك باعدارلاماسىن جۇزەگە اسىرۋعا ۇلەس قوسۋ بولىپ وتىر. سونىمەن بىرگە, كومبينات باسشى­لىعى مەن ماماندارى كوممەرتسيا­لىق سيپاتتاعى تۇرعىن ۇيلەر قۇ­رى­لىسىن جۇرگىزۋدىڭ ۇتىمدى جولدارىن ويلاستىرۋ ۇستىندە. تەمىر قۇسايىن, «ەگەمەن قازاقستان». ورال. سۋرەتتەردە: جاڭادان اشىل­عان ءۇي قۇرىلىسى كومبيناتىنان كورىنىستەر. سۋرەتتەردى تۇسىرگەن رافحات حالەلوۆ.