ۇكىمەت ءۇيى عيماراتىندا XVII جازعى پاراليمپيادا ويىندارىنىڭ جەڭىمپازدارىنا جانە جاتتىقتىرۋشىلارعا پرەمەر-مينيستر ولجاس بەكتەنوۆ پرەزيدەنتتىڭ اتىنان جوعارى سپورتتىق جەتىستىكتەرى ءۇشىن مەملەكەتتىك ناگرادالاردى تابىستادى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ۇكىمەت باسشىسى سپورتشىلاردى جوعارى جەتىستىكتەرىمەن قۇتتىقتادى. ەسكە سالايىق, ەلىمىزدىڭ پاراليمپيادا قۇراماسى 9 مەدال جەڭىپ الىپ, تاريحي رەكورد ورناتتى, اتاپ ايتقاندا, 2 التىن, 3 كۇمىس جانە 4 قولا مەدال الدى.
«مەملەكەت باسشىسى اتاپ وتكەندەي, پاراليمپيادا سپورتشىلارىنىڭ جەڭىستەرى – قاشاندا ماقساتقا ۇمتىلۋدىڭ, تاباندىلىق پەن ءوز كۇشىنە سەنىمنىڭ ۇلگىسى. ويىندار قارساڭىنداعى كەزدەسۋىمىزدەن كەيىن بۇكىل ەل بايراقتى باسەكەدە كورسەتكەن ءاربىر ويىندارىڭىزدى تاماشالادى, سىزدەردىڭ جەتىستىكتەرىڭىز ءبىز ءۇشىن ەرەكشە ماقتانىش بولدى. جىل وتكەن سايىن ەرەكشە جانداردىڭ سپورتقا قاتىسۋى ارتىپ كەلە جاتقانى ءبىزدى قۋانتادى. بۇگىندە ەلىمىزدە ەرەكشە قاجەتتىلىكتەرى بار 56 مىڭنان استام وتانداسىمىز دەنە شىنىقتىرۋمەن جانە سپورتپەن جۇيەلى تۇردە اينالىسادى. ارقايسىلارىڭىزدىڭ كورسەتكەن ۇلگىلەرىڭىز كوپتەگەن ادامدى ءبىزدىڭ پاراليمپياداشىلار قاتارىنا قوسىلۋعا ىنتالى ەتەتىنىنە سەنىمدىمىن. ۇكىمەت سپورتشىلارعا قولايلى جاعداي جاساپ, قولداۋ كورسەتۋ جۇمىستارىن كۇشەيتىپ جاتىر», دەپ اتاپ ءوتتى پرەمەر-مينيستر.
سپورتشىلاردى پاراليمپياداعا دايىنداۋدا ماڭىزدى ءرول اتقارعان جاتتىقتىرۋشىلار مەن تالىمگەرلەرگە دە ەرەكشە العىس سوزدەر ايتىلدى.
ءوز كەزەگىندە پاراليمپيادا سپورتشىلارى جارىس كەزىندە قولداۋ كورسەتكەنى ءۇشىن قازاقستان حالقىنا العىستارىن ءبىلدىردى.
«مەن مەملەكەت باسشىسىنا جانە بۇكىل قازاقستان حالقىنا قولداۋ كورسەتكەنى ءۇشىن العىسىمدى بىلدىرگىم كەلەدى. پاريجدە وتكەن پاراليمپيادا ويىندارىندا ەلىمىزدىڭ نامىسىن قورعاۋ مەن ءۇشىن ۇلكەن ماقتانىش سەزىمىن تۋدىردى. ءبىز پاراليمپيادا ويىندارىندا جۇلدە جەڭىپ الۋ ءۇشىن كوپ ەڭبەك ەتتىك, ءبىزدىڭ باپكەرلەرىمىز جەڭىسكە جەتۋ ءۇشىن بار شەبەرلىگىن سالدى. مەن ەلىمىزدىڭ العاشقى ەكى دۇركىن پاراليمپيادا چەمپيونى بولعانىما, قازاقستاننىڭ حالىقارالىق ارەناداعى بەدەلىن نىعايتۋعا ۇلەس قوسا العانىما قۋانىشتىمىن. الدىمىزدا جاڭا جەڭىستەرگە جەتۋ جولىندا ۇلكەن جۇمىس كۇتىپ تۇر. ءبىز مۇنىمەن توقتاپ قالماي, ەلىمىزدىڭ يگىلىگى ءۇشىن ەڭبەك ەتە بەرەمىز», دەدى پارا پاۋەرليفتينگتەن ەكى دۇركىن پاراليمپيادا چەمپيونى داۆيد دەگتيارەۆ.
پرەزيدەنت جارلىعىمەن I دارەجەلى «بارىس» وردەنىمەن پارا پاۋەرليفتينگتەن ەلىمىزدەگى العاشقى ەكى دۇركىن چەمپيون دەۆيد دەگتيارەۆ, III دارەجەلى «بارىس» وردەنىمەن پاريجدەگى پاراليمپيادا ويىندارىنىڭ چەمپيونى جانە پارا دزيۋدودان العاشقى التىن يەگەرى اقمارال ناۋاتبەك ماراپاتتالدى. كۇمىس مەدال جەڭىپ العان مەرگەن ەركىن عابباسوۆ, ءجۇزۋشى نۇرداۋلەت جۇماعالي جانە دزيۋدوشى شامەي ەرعالي «پاراسات» وردەنىنىڭ يەگەرلەرى اتاندى. «قۇرمەت» وردەنىمەن قولا جۇلدەگەرلەر – داستان مۇقاشبەكوۆ, زارينا رايفوۆا, دايانا فەدوسوۆا, جۇرقامىرزا شۇكىربەكوۆتەر ماراپاتتالدى.
«بۇگىن مەملەكەت باسشىسىنىڭ جارلىعىمەن ءىىى دارەجەلى بارىس وردەنىمەن ماراپاتتالدىم, وتە قۋانىشتىمىن. ءبىز پاراليمپيادا ويىندارىندا الەمنىڭ ەڭ مىقتى سپورتشىلارىمەن كۇش سىناسىپ, وتانىمىزعا پارا دزيۋدودان تاريحي التىنمەن ورالعانىما قۋانشىشتىمىن. مەملەكەت تاراپىنان پارا سپورتشىلارعا ەرەكشە كوڭىل ءبولىنىپ جاتىر. بۇگىنگى ءبىزدىڭ جەتىستىگىمىز مۇمكىندىگى شەكتەۋلى جانداردى جىگەرلەندىردى, دەپ ويلايمىن. بولاشاقتا قازاقستان رەسپۋبليكاسىنىڭ اتىن شىعارۋعا بولاشاق چەمپيوندار ءبىزدىڭ جولىمىزدى جالعاستىراتىنىنا سەنەمىن», دەدى پارا دزيۋدودان التىن مەدال يەگەرى اقمارال ناۋاتبەك.
ۇلتتىق قۇرامانىڭ باس جاتتىقتىرۋشىلارى مەن سپورتشىلاردىڭ جەكە باپكەرلەرى دە جوعارى ماراپاتتارعا يە بولدى. 5 تالىمگەر «پاراسات» وردەنىمەن, 7 – «قۇرمەت» وردەنىمەن, 2 جاتتىقتىرۋشى پرەزيدەنتتىڭ قۇرمەت گراموتاسىمەن ماراپاتتالدى: يۋري كولەسنيكوۆ, د.دەگتيارەۆتىڭ جەكە جاتتىقتىرۋشىسى; ايدىن ءاناپين, ا.ناۋاتبەكتىڭ جەكە جاتتىقتىرۋشىسى; داۋرەن ورازوۆ, ە.شامەيدىڭ جەكە جاتتىقتىرۋشىسى; ساتتار بەيسەمباەۆ, ن.جۇماعاليدىڭ جەكە جاتتىقتىرۋشىسى; ءمۇسلىم سارسەمبەكوۆ ە.عابباسوۆتىڭ جەكە جاتتىقتىرۋشىسى; سەرگەي بەزگاچەۆ د.مۇقاشبەكوۆتىڭ جەكە جاتتىقتىرۋشىسى; قانات ساعىندىق د.فەدوسوۆانىڭ جەكە جاتتىقتىرۋشىسى; ابىلاي شۋناەۆ, پارا وق اتۋدان ۇلتتىق قۇرامانىڭ باس باپكەرى; ميحايل بۋرچالين, پارا وق اتۋدان اعا جاتتىقتىرۋشى; ارتۋر توميتسكي, پاراپاۋەرليفتينگتەن ۇلتتىق قۇراما كوماندانىڭ باس باپكەرى; جايدار سايلاۋباەۆ, پارا دزيۋدودان جاتتىقتىرۋشى; جاندوس قيانوۆ, پارا دزيۋدودان ۇلتتىق قۇراما كوماندانىڭ باس باپكەرى; ايدار كارتپاەۆ, پارا جۇزۋدەن ۇلتتىق قۇراما كوماندانىڭ باس باپكەرى; تاحير ماماشاەۆ, پارا جەڭىل اتلەتيكادان ۇلتتىق قۇراما كوماندانىڭ باس باپكەرى.
بۇگىندە قازاقستاندا 19 پاراليمپيادالىق سپورت ءتۇرى دامىپ جاتىر, ونىڭ ىشىندە بوچچا, گولبول, وتىرىپ وينايتىن ۆولەيبول, 5ح5 فۋتبول, ۇستەل تەننيسى, پارادزيۋدو جانە ت.ب. پاراليمپيادا تۇرلەرى بويىنشا ەلىمىزدىڭ ۇلتتىق قۇراماسىنىڭ قۇرامىندا بارلىعى 925 ادام بار.