پرەزيدەنت بيىلعى جولداۋىندا ەلىمىزدەگى جوعارى ءبىلىم بەرۋدى ينتەرناتسيونالداندىرۋدىڭ ماڭىزىن اتاپ ءوتتى. بۇل قادام ەلىمىزدىڭ ءبىلىم جۇيەسىن دامىتۋ مەن ونىڭ حالىقارالىق قوعامداستىققا كىرۋى ءۇشىن اسا ماڭىزدى ەكەنى ءسوزسىز.
ينتەرناتسيونالداندىرۋ – جوعارى ءبىلىم سالاسىنىڭ دەڭگەيىن ارتتىرىپ قانا قويماي, ەلىمىزدىڭ عىلىمي الەۋەتىن نىعايتاتىن ستراتەگيالىق باعىت. وزبەكستان سياقتى كورشىمىز دە ينتەرناتسيونالداندىرۋ ستراتەگياسىن تاڭداپ, وندا بۇگىندە 30-عا جۋىق شەتەلدىك جوعارى وقۋ ورنى جۇمىس ىستەيدى. الايدا ولاردىڭ تاجىريبەسىنە جاسالعان العاشقى تالداۋعا قاراساق, فيليالدار مەن قوس ديپلومدى باعدارلامالاردىڭ اشىلۋى ەلدىڭ جوعارى ءبىلىم جۇيەسىن جاقسارتۋعا قاجەتتى ناتيجە بەرمەيتىنىن بايقايمىز. قازاقستان بولون ۇدەرىسىنە قاتىسۋىنىڭ ناتيجەسىندە, ورتالىق ازياداعى باسقا مەملەكەتتەرگە قاراعاندا ءبىراز ارتىقشىلىققا يە. وسى ارقىلى ەۋروپالىق ستاندارتتارعا سايكەس كەلۋگە, شەتەلدىك جوعارى وقۋ ورىندارىن تارتۋ بويىنشا باستامالاردى ءتيىمدى ىسكە اسىرۋعا بولادى. ينتەرناتسيوناليزاتسيا سونىمەن قاتار اكادەميالىق موبيلدىلىكتى ارتتىرۋعا, ءبىلىم ساپاسىن جاقسارتۋعا ىقپال ەتەدى. وتاندىق ۋنيۆەرسيتەتتەر بازاسىندا شەتەلدىك جوعارى وقۋ ورىندارىنىڭ فيليالىن اشۋ جەرگىلىكتى جانە شەتەلدىك وقىتۋشىلار اراسىندا ءبىلىم مەن تاجىريبە الماسۋعا مۇمكىندىك بەرەدى. بۇل وقىتۋ دەڭگەيىن ارتتىرىپ قانا قويماي, عىلىمي داعدىلاردىڭ وسۋىنە, بىرلەسكەن عىلىمي جوبالاردىڭ كوبەيۋىنە ىقپال ەتەدى. ناتيجەسىندە, قازاقستان وزگە ەلدەردەن ستۋدەنتتەردى تارتا وتىرىپ, ورتالىق ازيانىڭ ءبىلىم بەرۋ حابىنا اينالادى.
ينتەرناتسيونالداندىرۋ ستراتەگياسىن ىسكە اسىرۋ بارىسىندا شەشىلەتىن تاعى ءبىر ماسەلە – ستۋدەنتتەردىڭ باسىم كوپشىلىگى شوعىرلانعان الماتى, استانا سياقتى ءىرى قالالاردىڭ شامادان تىس جۇكتەمەسىنىڭ بولۋى. وڭىرلىك جوعارى وقۋ ورىندارىنىڭ بازاسىندا شەتەلدىك جوعارى وقۋ ورىندارىنىڭ فيليالدارىن اشۋ, سونداي-اق باسىم ماماندىقتار بويىنشا, ونىڭ ىشىندە تەحنيكالىق جانە ينجەنەرلىك ماماندىقتار بويىنشا وقىتۋعا نىسانالى گرانتتار مەن كۆوتالاردى ەنگىزۋ وڭىرلەردىڭ دامۋىن ىنتالاندىرۋ جانە تالانتتاردى ساقتاۋ ءۇشىن ماڭىزدى قادام سانالادى. بۇل ۇلكەن قالالارداعى تۇرعىندار سانىن ازايتىپ قانا قويماي, ادام رەسۋرستارىن بۇكىل ەل بويىنشا بىركەلكى بولۋگە مۇمكىندىك بەرەدى.
ەلىمىزدە شەتەلدىك جوعارى وقۋ ورىندارى فيليالدارىنىڭ اشىلۋى «بولاشاق» باعدارلاماسىنىڭ وزگەرۋىنە دە ىقپال ەتۋى مۇمكىن. ستۋدەنتتەردى شەتەلگە جىبەرۋدىڭ ورنىنا, ساپالى ءبىلىمدى الدەقايدا ارزان باعاعا الۋعا جاعداي جاساپ, ىشكى رەسۋرستاردى ءتيىمدى پايدالانۋعا بولادى. مىسالى, قازاقستانداعى شەتەلدىك جوعارى وقۋ ورىندارىنىڭ فيليالدارىندا وقۋ شەتەلگە قاراعاندا ارزان بولىپ, سول ءبىلىم دەڭگەيىن قامتاماسىز ەتە الادى. بۇل مامانداردى ەلىمىزدە دايارلاۋ ءۇشىن جاعداي جاسايدى. سونداي-اق «بولاشاق» باعدارلاماسىنىڭ رەسۋرستارىن PhD جانە پوستدوكتورانتۋرا باعدارلامالارى بويىنشا عىلىمي كادرلاردى دايارلاۋعا باعىتتايدى.
پرەزيدەنت وسىعان قوسا قولدانبالى عىلىمنىڭ دامۋى تۋرالى ايتتى, مۇندا شەتەلدىك جوعارى وقۋ ورىندارىنىڭ فيليالدارى ماڭىزدى ءرول اتقارادى. ۋنيۆەرسيتەتتەردىڭ تەك وقىتۋمەن اينالىسىپ قانا قويماي, عىلىمدى دامىتىپ, عىلىمي-زەرتتەۋ ورتالىقتارىن اشىپ, عىلىمي جوبالاردى تارتۋى ماڭىزدى. ينتەرناتسيونالداندىرۋدىڭ تاعى ءبىر ماڭىزدى اسپەكتىسى – ساپالى ءبىلىم ەكسپورتىنىڭ قۇرالى رەتىندە قىزمەت ەتەتىن وتاندىق جوعارى وقۋ ورىندارىنىڭ فيليالدارىن شەتەلدەردە اشۋ. م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ وزبەكستانداعى فيليالى جانە ءال-فارابي اتىنداعى قازاق ۇلتتىق ۋنيۆەرسيتەتى فيليالىنىڭ رەسەيدە اشىلۋى ەلىمىزدىڭ ءبىلىم بەرۋ ساپاسىن وزگە ەلدەردە دە مويىندايدى دەگەندى بىلدىرەدى.
وسىلايشا, شەتەلدىك جوعارى وقۋ ورىندارىنىڭ فيليالىن اشىپ, جوعارى ءبىلىم بەرۋ سالاسىندا حالىقارالىق قوعامداستىقتى دامىتۋ وڭىرلەر مەن جالپى ەلدەردىڭ الەۋمەتتىك-ەكونوميكالىق دامۋىنا, جوعارى ءبىلىم بەرۋ ساپاسىن ارتتىرۋعا, عىلىمي قىزمەتى مەن ەلىمىزدىڭ حالىقارالىق ارەناداعى ۇستانىمىن نىعايتۋعا ىقپال ەتەدى.
قۋانىش ەرعاليەۆ,
نازارباەۆ ۋنيۆەرسيتەتىنىڭ پروفەسسورى