2024 جىلدىڭ 20 شىلدەسىندە «YDD CORPORATION» جاۋاپكەرشىلىگى شەكتەۋلى سەرىكتەستىگىنىڭ فەرروقورىتپا زاۋىتىندا قايعىلى وقيعا بولىپ, ءتورت ادام ومىردەن وتكەن ەدى. قاراعاندى قالاسىنىڭ اكىمشىلىك قۇقىقبۇزۋشىلىقتار جونىندەگى اۋدانارالىق سوتىندا وسى وقيعاعا قاتىستى ءىس قارالدى, دەپ حابارلايدى Egemen.kz اۋداندىق سوتتىڭ ءباسپاسوز قىزمەتىنە سىلتەمە جاساپ.
تەرگەۋ بارىسىندا زاۋىت وكىلدەرىنىڭ سەگىز ادام زارداپ شەككەن وقيعا ورنىنا قۇتقارۋشىلاردى وتكىزبەگەنى بەلگىلى بولعان. سەرىكتەستىكتىڭ سەنىمدى وكىلدەرى بولعان جاعداي تۋرالى اقپاراتتى دەر كەزىندە ايتپاي, تجد قىزمەتكەرلەرىن جارتى ساعاتتان استام ۋاقىت زاۋىت اۋماعىنا كىرگىزبەگەن.
«وسى فاكتى بويىنشا ءىس قوزعالىپ, سوتقا جولداندى. سوتتا سەرىكتەستىكتىڭ وكىلى تاعىلعان ايىپتى مويىندامادى, «YDD CORPORATION» جشس-ءنىڭ كىنالى ەكەندىگى ايعاقتارمەن راستالدى», دەپ مالىمدەدى قاراعاندى قالاسىنىڭ اكىمشىلىك قۇقىقبۇزۋشىلىقتار جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى.
سوتتا اتالعان سەرىكتەستىك اقبتك-ءنىڭ 462-بابىنىڭ 1-بولىگىمەن اكىمشىلىك جاۋاپكەرشىلىككە تارتىلىپ, وسى باپتىڭ سانكتسيا شەگىندە 200 اەك (738 400 تەڭگە) مولشەرىندە اكىمشىلىك ايىپپۇل تۇرىندەگى جازا تاعايىندالدى.
سوت قاۋلىسى زاڭدى كۇشىنە ەنگەن جوق.