ەلباسى نۇرسۇلتان نازارباەۆ سالمان بەن ابدەل ءازيز ءال ساۋدقا ونىڭ ساۋد ارابياسى كورولدىگى تاعىنا وتىرۋىنا بايلانىستى قۇتتىقتاۋ جەدەلحاتىن جولدادى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
نۇرسۇلتان نازارباەۆ كورولگە قازاقستان حالقىنىڭ جانە جەكە ءوزىنىڭ اتىنان شىنايى قۇتتىقتاۋى مەن ىزگى تىلەگىن جولدادى.
«ءسىزدىڭ باسشىلىعىڭىزبەن ساۋد ارابياسى كورولدىگى يسلام جاماعاتىنا قىزمەت ەتۋدى ماقسات تۇتقان ساياساتىن تابىستى جالعاستىراتىنىنا سەنىمدىمىن. كورولدىكتىڭ ءوز دامۋىندا جاڭا بەلەستەرگە كوتەرىلۋىنە ءجانە حالىقارالىق ارەناداعى ءرولىنىڭ ارتۋىنا تىلەكتەستىك ءبىلدىرەمىن», – دەلىنگەن جەدەلحاتتا.
مەملەكەت باسشىسى قازاقستان مەن ساۋد ارابياسى اراسىنداعى دوستىق جانە ارىپتەستىك قاتىناستار ەكى ەلدىڭ يگىلىگى جولىندا تەرەڭدەي بەرەدى دەپ ۇمىتتەنەتىنىن جەتكىزدى.
قازاقستان پرەزيدەنتى جەدەلحات سوڭىندا سالمان بەن ابدەل ءازيز ءال ساۋدقا دەنساۋلىق پەن اماندىق, بولاشاقتاعى يگى ىستەرىنە تابىس, ال دوستاس ساۋد ارابياسى حالقىنا بەرەكە-بىرلىك تىلەدى.