بيىل الماتىدا جەمقورلىقتىڭ كۋاگەرى بولعان 6 ازاماتقا 4 ملن 486 مىڭ تەڭگە سوماسىندا سىياقى بەرىلگەن, دەپ حابارلايدى Egemen.kz قر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنە سىلتەمە جاساپ.
«جەمقورلىق تۋرالى حابارلاعان ادامعا بەرىلەتىن سىياقىنىڭ كولەمى ءارتۇرلى. پارا نەمەسە كەلتىرىلگەن زالال سوماسى 1 مىڭ ايلىق ەسەپتىك كورسەتكىشتەن (3 ملن. 692 مىڭ تەڭگە) اسپايتىن بولسا 30-دان 100 ايلىق ەسەپتىك كورسەتكىشكە دەيىن سىياقى (110 760 تەڭگەدەن 369 200 تەڭگەگە دەيىن) بەرىلەدى. كورسەتىلگەن سومادان جوعارى بولسا –پارانىڭ 10%-ىنا تەڭ بولادى, بىراق 4 مىڭ ايلىق ەسەپتىك كورسەتكىشتەن اسپاۋى قاجەت (14 ملن. 760 مىڭ تەڭگە)», دەلىنگەن دەپارتامەنتتىڭ حابارلاماسىندا.
سىياقىنىڭ ەڭ كوبى - 3 ملن. 745 مىڭ, پارا سوماسىنىڭ ون پايىزىنا تەڭ بولعان.
دەپارتامەنتتىڭ ايتۋىنشا سىبايلاس جەمقورلىقتىڭ, پارا بەرۋدىڭ كۋاسى بولعان ازاماتتار «ە-ءوتىنىش» اقپاراتتىق جۇيەسى ارقىلى ءوتىنىش قالدىرۋلارىنا بولادى نەمەسە سىبايلاس جەمقورلىققا قارسى قىزمەتتىڭ 1424 Call-ورتالىعىنا حابارلاسا الادى.