مەديتسينادا ولقىلىققا ورىن جوق

ەلىمىزدىڭ مەديتسينا سالاسىنىڭ جەتىستىك­تەرى جوق ەمەس, الايدا كەمشىلىكتەر دە بارىن ايتتى. ناۋقاستارعا مەملەكەتتىك كەپىلدىك بەرگەن قىزمەتتەردى اقىلى نەگىزدە الۋى نەمەسە بىرنەشە اي بويى كەزەك كۇتۋدى ۇسىنۋ سىندى جونسىزدىكتەرگە جول بەرمەۋدى تاپسىرعان قاسىم-جومارت توقاەۆ بيۋدجەتتىڭ مۇمكىندىگى مەن مىندەتتەمەسىن ەسكەرە وتىرىپ, مەديتسينالىق كومەكتىڭ بىرىڭعاي بازالىق توپتاماسىن جاساۋ قاجەتتىگىن اتادى. ارينە, مۇنداي ماڭىزدى وزگەرىستەردى تسيفرلاندىرۋسىز ءساتتى جۇزەگە اسىرۋ مۇمكىن ەمەس.

شىنىندا دا, قازىرگى ۋاقىتتا جۇمىس ىستەپ تۇرعان بىرنەشە ونداعان ءارتۇرلى باع­دارلاما مەن دەرەك بازاسىنىڭ ورنىنا بىرىڭعاي مەملەكەتتىك مەديتسينالىق اقپاراتتىق جۇيەنى قۇراتىن ۋاقىت كەلدى. ول مەملەكەتتىك تاپسىرىستاردى الاتىن بارلىق دەنساۋلىق ساقتاۋ ۇيىمى ءۇشىن, ولاردىڭ مەنشىك نىسانىنا قاراماستان, دەرەكتەردىڭ تۇپكىلىكتى باقىلاۋىن جانە وبەكتيۆتىلىگىن قامتاماسىز ەتۋگە ءتيىس. پرەزيدەنت ۇكى­مەتكە بۇل وزەكتى ماسەلەنى جەدەل شەشۋ­دى جانە جۇمىس بارىسىن بايانداۋدى تاپسىردى.

وتاندىق دەنساۋلىق ساقتاۋدى دامىتۋ ءۇشىن مەملەكەتتىك-جەكەمەنشىك ارىپتەستىك تەتىگى ارقىلى رەسۋرستاردى بەلسەندى تارتۋ قاجەت.

«وكىنىشتىسى, شەتەلدەردىڭ مەملەكەت-جەكەمەنشىك ارىپتەستىككە قاتىستى وزىق تاجىريبەلەرى ءالى دە زاڭنامامىزدا تولىق كورىنىس تاپقان جوق. مۇنىڭ ءبارى جوبالاردىڭ ءتيىمسىز بولۋىنا, بيۋدجەتكە تۇسەتىن سالماقتىڭ تىم ارتۋىنا اكەلىپ سوقتىرادى», دەگەن مەملەكەت باسشىسى تاسىلدەردى قايتا قاراۋ كەرەكتىگىن, ينۆەستيتسيا تارتۋ ءۇشىن ءتيىمدى تاريفتەر ۇسىنۋ, ۇكىمەت دەنساۋلىق ساقتاۋ جانە ءبىلىم بەرۋ سالالارىنا مەملەكەت-جەكەمەنشىك ارىپتەستىكتىڭ جەكە ستاندارتتارى مەن ەرەجەلەرىن ازىرلەۋ كەرەكتىگىن مىندەتتەدى.

ەلىمىزدە بىلىكتى مەديتسينا مامان­دارى­نىڭ تاپشىلىعى دا تاسادا قالمادى. بۇل ماسەلەنى شەشۋ ءۇشىن, ەڭ الدىمەن, مەديتسينا سالاسىنداعى ءبىلىم ساپاسىن با­رىنشا ارتتىرعان ءجون. سونىڭ ىشىندە گرانت قۇنىن رەتتەپ, ءتيىمدى تاراتۋ قاجەتتىگىنە نازار اۋداردى.

قوعامنىڭ سالاماتتىلىعىنا قاتىستى ماڭىزدى ماسەلەلەردى وتاندىق مەديتسينا سالاسى جاۋاپكەرشىلىكپەن شەشەدى دەپ سەنەمىن.

ايمان راقىشەۆا,

قوناەۆ قالالىق كوپسالالى اۋرۋحاناسىنىڭ ديرەكتورى

الماتى وبلىسى