ەلىمىزدە مەيرامحاناعا كەلگەن قوناقتاردان تاپسىرىس بەرىلگەن تاعام قۇنىنان بولەك, داياشىنىڭ قىزمەتى ءۇشىن 10 پايىزدىق قوسىمشا اقى الۋعا ەندى زاڭ جۇزىندە تىيىم سالىنادى. ساۋدا جانە ينتەگراتسيا ءمينيسترى ارمان شاققاليەۆتىڭ ايتۋىنشا قازان ايىندا ىشكى ساۋدا ەرەجەسىنە وزگەرىس ەنگىزۋ جوسپارلانىپ وتىر.
سەناتتىڭ جالپى وتىرىسىنان كەيىنگى ءباسپاسوز ءماسليحاتىندا تىلشىلەردىڭ ساۋالىنا جاۋاپ بەرگەن مينيستر وسى ەرەجەلەردى پىسىقتاپ جاتقاندارىن ايتتى.
«بۇل ماسەلە قوعامدا كوپتەن تالقىلانىپ كەلەدى. قازىر ءدامحانالاردا وسى اقىنى چەككە قوسىپ جازىپ بەرەتىن بولعان. ساۋدا ەرەجەسىنە وزگەرىس ەنگىزىلگەننەن كەيىن بۇل الىم زاڭسىز بولىپ سانالادى. مەيرامحانا قىزمەتىن الۋشىلار ءبىر قىزمەتكە ەكى رەت اقى تولەۋگە مىندەتتى ەمەس, دەدى مينيستر.