2024-2025 وقۋ جىلىنا ارنالعان مەملەكەتتىك ءبىلىم بەرۋ تاپسىرىسىنا سايكەس 129 تالاپكەر بيىل اشىلعان قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنە گرانتقا ءتۇستى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ەسكە سالا كەتەيىك, بىلتىر م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ «سۋ شارۋاشىلىعى جانە تابيعاتقا ۇيلەستىرۋ» ينستيتۋتىنا تۇسكەن 67 تالاپكەرگە عانا گرانت بەرىلگەن ەدى.
ايتا كەتەرلىگى, قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى بيىل مەملەكەت باسشىسىنىڭ تاپسىرماسى اياسىندا قۇرىلدى. ءبىلىم ورداسىندا «سۋ شارۋاشىلىعى جانە مەليوراتسيا», «گەودەزيا جانە كارتوگرافيا», «سۋ شارۋاشىلىعىنداعى گيدروتەحنيكالىق قۇرىلىس», «سۋمەن قامتاماسىز ەتۋدىڭ ينجەنەرلىك جەلىلەرى», «سۋ شارۋاشىلىعىنداعى يننوۆاتسيالىق تەحنولوگيالار» جانە تاعى دا باسقا ءبىلىم بەرۋ باعدارلامالارى اشىلادى.
«ۋنيۆەرسيتەتتە اقىلى بولىمدە وقۋعا قۇجات قابىلداۋ جالعاسىپ جاتىر. بۇدان بولەك, جوعارى وقۋ ورنىنىڭ ماتەريالدىق-تەحنيكالىق بازاسىن جابدىقتاۋ جانە پروفەسسور-وقىتۋشىلار قۇرامىن تۇرعىن ۇيمەن قامتاماسىز ەتۋ جۇمىسى جۇرگىزىلۋدە», دەدى قر سريم عىلىم جانە يننوۆاتسيالار دەپارتامەنتىنىڭ ديرەكتورى ءمۇسلىم جيەنباەۆ.