كەشە پرەزيدەنت جانىنداعى ورتالىق كوممۋنيكاتسيالار قىزمەتىندە اعىمداعى جىلدىڭ ۇبت قورىتىندىسىنا ارنالعان ءباسپاسوز ءماسليحاتى ءوتتى. وندا ءبىلىم جانە عىلىم مينيسترلىگى, ءبىلىم جانە عىلىم سالاسىنداعى باقىلاۋ كوميتەتىنىڭ توراعاسى سايات ءنۇسىپوۆ ۇلتتىق تەستىلەۋدىڭ سوڭعى اقپاراتتارىمەن ءبولىستى.
ۇستىمىزدەگى جىلى مەكتەپتى 124 346 وقۋشى ءبىتىردى, ونىڭ 84 248-ءى قازاق تىلىندە وقيتىن وقۋشىلار بولسا, 40 098-ءى ورىس تىلىندە وقيتىندار. وسى جىلعى ۇبت-نىڭ ورتاشا بالى 2,6% ءوستى جانە 79,5 بالدى قۇرادى, دەي كەلە س.ءنۇسىپوۆ ۇبت ەنگىزىلگەلى بەرى العاش رەت قازاق تىلىندە وقيتىندار مەن ورىس تىلىندەگى بىتىرۋشىلەردىڭ ناتيجەلەرى تەڭەسكەندىگىن اتاپ ءوتتى.
سونىمەن قاتار, 4397 ۇمىتكەردىڭ 2205-ءى «التىن بەلگى» الىپ, جەڭىس مارەسىنەن كورىنگەن. بيىلعى جىلى تەستىلەۋدىڭ ەڭ جوعارى ۇپايى 125-ءتى يەلەنگەن بىتىرۋشىلەر سانى 5 بولسا, 100-دەن جوعارى جيناعاندار سانى 14 420 بولىپتى. مىڭنان وزعان تۇلەكتەردى اتاپ وتەر بولساق, ولار گۇلناز ەردوسوۆا, ريانا مۋستافينا, سىمبات سامات, لاۋرا ابدازيموۆا, اناستاسيا ياكوۆلەۆا, دەدى كوميتەت توراعاسى.
ال جوعارى وقۋ ورنىنا ءتۇسۋ ءۇشىن 50 بالدىق شەكتى دەڭگەيدەن وتكەن تۇلەكتەر سانى الدىڭعى جىلمەن سالىستىرعاندا 5 پايىزعا ارتقاندىعىن ايتقان س.ءنۇسىپوۆ رەسپۋبليكالىق اپەللياتسيالىق كوميسسياعا تۇلەكتەردەن 347 ارىزدىڭ 131-ءى قاناعاتتاندىرىلعاندىعىن كولدەنەڭ تارتتى.
بۇل ورايدا, ول وسى جىلداعى ۇبت قورىتىندىسىنىڭ وتكەن جىلمەن سالىستىرعاندا العا جىلجىعاندىعى, ول جۇيەنى جەتىلدىرۋ جۇمىستارىنىڭ ارقاسىندا بولعانىن اتاپ كورسەتتى. بىرقاتار سەبەپتەرگە بايلانىستى وزگەرتىلگەن ۇبت جۇيەسى, ايتار بولساق – اتتەستات باعاسىن باعامداۋ, شالعاي ايماقتاردا قوسىمشا بەكەتتەردىڭ اشىلۋى, ايماقتاردىڭ تەستكە دايىندىعىن باعالاۋدىڭ جاڭا ادىستەرىن قولدانۋ سەكىلدى وزگەرىستەر بيىلعى تەستىلەۋدىڭ وڭ ناتيجەسىنە قول جەتكىزۋگە سەپ بولدى, دەدى ول.
سونىمەن قاتار, ۇبت تاپسىراتىن تۇلەكتەرگە ارناپ 535 مىڭ دايىندىق تەست سۇراقتارى جانە 172 560 ادىستەمەلىك قۇرالدار شىعارىلىپ, تەستىلەۋ وتكىزىلىپتى. بەسىنشى ءپان رەتىندە از تاڭدالاتىن دۇنيەجۇزى تاريحى 27% , حيميا ءپانى 21%, اعىلشىن ءتىلى 20%, قازاق جانە ورىس ادەبيەتتەرى 7-8% جاڭارتىلدى, دەدى ءوز سوزىندە س.ءنۇسىپوۆ.
ونىڭ ايتۋى بويىنشا ءۇستىمىزدەگى جىلدىڭ تەستىلەۋ بارىسىن ءجىتى باقىلاپ, تۇلەكتەر ءۇشىن پسيحولوگيالىق جاعداي جاساۋعا اتالعان مينيسترلىك تاراپىنان 2 مىڭ ازامات باس-اياعى 165 بەكەتتە قىزمەت اتقارعان. ال مۇمكىندىگى شەكتەۋلى بالالار ءۇشىن ارنايى كابينەتتەر جاساقتالىپ, ولاردى مەديتسينا قىزمەتكەرلەرى قاداعالاعان. ايتا كەتەرلىگى, تەست ناتيجەسىن جاريالاۋ ءۇشىن ارنايى اقپاراتتىق تەحنولوگيالار قولدانىلعان ەكەن. بۇل ءادىس بىتىرۋشىلەردىڭ پسيحولوگيالىق احۋالىن جەڭىلدەتۋگە سەپتىگىن تيگىزگەن.
ەلميرا ماتىباەۆا,
«ەگەمەن قازاقستان».