شىعىس قازاقستان وبلىسىنا قاراستى گلۋبوكوە اۋدانىندا ەكى وتباسى جوعالىپ كەتكەن. ولار درون ارقىلى تابىلدى, دەپ جازادى Egemen.kz.
ەر ادام جۇبايىمەن, قىز بالاسىمەن جانە دوستارىمەن بىرگە 30 تامىزدا قاراعوجى اۋىلىنا قاراي دەمالۋعا بارىپ, 1 قىركۇيەكتە ورالماق بولعان. الايدا مۇلدە حابار-وشارسىز كەتكەن. وقيعا تۋرالى ءتارتىپ ساقشىلارىنا جوعالعانداردىڭ جاقىندارى حابارلاعان.
اقپاراتتا: «وبلىستىق پوليتسيا دەپارتامەنتى اپپاراتىنىڭ قىزمەتكەرلەرى جانە قۇتقارۋشىلار بىرنەشە توپقا ءبولىنىپ, اۋماقتى بىرگە قارادى. سونىمەن قاتار ىزدەۋ جۇمىستارىنا درون پايدالانىلدى», دەلىنگەن.
ەكى وتباسى وزەن دەڭگەيىنىڭ كوتەرىلىپ كەتۋىنەن ءۇش كۇن بويى وزەننەن وتە الماي, ءبىر ورىندا قالىپ قويعان.
درون ارقىلى ولاردىڭ ورنالاسقان جەرى انىقتالعان.