ءبىلىم سالاسىن جىگەرلەندىردى

مەملەكەت باسشىسى جولداۋىندا ورتا ءبىلىم ماسەلەلەرىنە ەرەكشە نازار اۋداردى. ۇلتتىق جوبا «جايلى مەكتەپ» اياسىندا 2025 جىلدىڭ سوڭىنا دەيىن 217 زاماناۋي مەكتەپ سالۋ جوسپارلانعان, ولار زاماناۋي تەحنولوگيالارمەن جانە جوعارى جىلدامدىقتى ينتەرنەتپەن جاب­دىقتالادى. بۇل – وقۋشىلار مەن مۇعا­لىمدەرگە قولايلى جاعداي جاسايدى. بۇكىل ەل بويىنشا 1 300 مەكتەپكە كۇردەلى جوندەۋ جۇرگىزىلىپ, مىڭداعان بالاعا ارنالعان وقۋ جاعدايى جاقساراتىنىنا سەنىمىمىز مول. سونىمەن قاتار پرەزيدەنت مۇعالىمدەردى قول­داۋ ماڭىزدىلىعىن اتاپ ءوتىپ, بيىل­عى وقۋ جىلىندا پەداگوگتەر مەن وقىتۋ­شىلاردىڭ جالاقىسى وسەتىنىن ايتتى. بۇل – ۇستازدىق قىزمەتتىڭ بەدەلىن ارتتىرۋعا جانە ءبىلىم بەرۋ سالاسىنا جاس مامانداردى تارتۋعا باعىتتالعان, ەلىمىزدىڭ بولاشاعى ءۇشىن وتە ماڭىزدى شەشىم. مەملەكەت باسشىسى ءبىلىم بەرۋ جۇيەسىندە زاماناۋي تەحنولوگيا­لاردى ەنگىزۋ, ءبىلىم مەكەمەلەرىنىڭ ينفراقۇرىلىمىن جاق­سارتۋ جانە پەداگوگتەردىڭ بىلىكتىلىگىن ارتتىرۋ قاجەتتىگىن اتاپ ءوتىپ, تەك بىرلەسكەن كۇش-جىگەر ارقىلى عانا ءبىز وسى ماڭىزدى سالادا ەلەۋلى جەتىستىكتەرگە جەتە الاتىنىمىزدى جەتكىزدى.

2023–2024 وقۋ جىلىندا 1 642 وقۋشى 31 حالىقارالىق وليمپيادالار مەن كونكۋرستارعا قاتىسىپ, 473 مەدال جەڭىپ الدى. ناقتىراق ايتساق, قانجىعامىزدا 58 التىن, 169 كۇمىس جانە 246 قولا, 51 گراموتا بار. ءبىلىم باسەكەلەرىنىڭ ىشىندە 7 بەدەلدى الەمدىك وليمپيادا ەرەكشە نازار اۋدارۋعا لايىق. بۇگىنگى كۇنى وقۋشىلار ەڭ اۋقىمدى «IMO», «IPhO», «IBO», «IOL», ء«ىسھو», «IGeO» التى حالىقارالىق وليمپيادالارعا قاتىسىپ 2 التىن, 9 كۇمىس, 11 قولا, 1 گراموتاعا يە بولدى.

سونداي-اق جولداۋدا تسيفرلاندىرۋ ماسەلەلەرىنە دە ۇلكەن ءمان بەرىلدى. پرەزيدەنت استانادا جاساندى ينتەللەكتىنىڭ ۇلتتىق ورتالىعىن قۇرۋ تۋرالى جاريالاپ, بۇل جاڭا بۋىن ماماندارىن دايارلاۋدا ماڭىزدى قادام بولاتىنىن اشىق ايتتى. بۇل باستامالار تسيفرلىق ينفراقۇرىلىمدى دامىتۋعا جانە ەل ازاماتتارىنا جاڭا مۇمكىندىكتەر جاساۋعا باعىتتالعان. ءبىز ءبىلىم بەرۋ جۇيەسىندە بەرىلگەن مۇمكىندىكتەردەن شابىت الىپ, وسى ماڭىزدى جوبالاردى جۇزەگە اسىرۋعا ءوز ۇلەسىمىزدى قوسۋعا دايىنبىز.

عاجدەمبەك تۇرسىنوۆ,

«دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى