قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ استاناعا الەمدىك جانە ءداستۇرلى دىندەر ليدەرلەرىنىڭ V سەزىنە قاتىسۋ ءۇشىن كەلگەن بۇۇ وركەنيەتتەر اليانسىنىڭ جوعارى وكىلى ناسير ابد ءال-ءازيز ان-ناسەرمەن كەزدەستى, دەپ حابارلادى قر ءسىم-ءىنىڭ ءباسپاسوز قىزمەتى.
تاراپتار قازاقستان مەن بۇۇ-نىڭ دىنارالىق جانە ەتنوسارالىق ۇنقاتىسۋدى ىلگەرىلەتۋ بويىنشا بىرلەسكەن كۇش-جىگەرى ماسەلەسىن تالقىلادى. ە.ىدىرىسوۆ اتاپ وتكەندەي, قازاقستان ءارى قاراي دا وركەنيەتتەر اراسىنداعى ءوزارا تۇسىنىستىكتى نىعايتۋعا ۇلەس قوسىپ, مادەنيەتارالىق, ەتنوسارالىق جانە دىنارالىق قاراما-قايشىلىقتاردى ەڭسەرۋ بويىنشا الەمدىك قوعامداستىق تاراپىنان جيناقتالعان وزىق تاجىريبەلەردى پايدالانۋ نيەتىندە.
«ءبىز ءوزىمىزدىڭ ىشكى بايلىعىمىز – ۇلتارالىق جانە كونفەسسياارالىق كەلىسىمنىڭ قازاقستاندىق مودەلىن پايدالانا وتىرىپ, باتىس پەن شىعىس اراسىندا مودەراتور ءرولىن اتقارا الار ەدىك. ءسىزدىڭ سەزد جۇمىسىنا قاتىسۋىڭىز ايتارلىقتاي ماڭىزدى. ويتكەنى, بۇۇ قازىرگى زامانعى جاھاندىق قاۋىپ-قاتەرلەرگە قارسى حالىقارالىق كۇش-جىگەردى ۇيلەستىرۋگە دايىن ەكەنىن اتاپ كورسەتىپ وتىر», – دەپ مالىمدەدى مينيستر.
قازاقستاننىڭ الەمدىك دەڭگەيدە ۇنقاتىسۋ ورناتۋعا ناقتى ۇلەس قوسىپ وتىرعانىنىڭ ءبىر مىسالى رەتىندە ە.ىدىرىسوۆ ءبىزدىڭ ەلىمىزدىڭ باستاماسىمەن 2013-2022 جىلدار ارالىعى يۋنەسكو-نىڭ تۋى استىندا مادەنيەتتەردى جاقىنداستىرۋدىڭ حالىقارالىق ونجىلدىعى دەپ جاريالانعانىن اتاپ ءوتتى.
ءوز كەزەگىندە, ناسير ابد ءال-ءازيز ان-ناسەر قازاقستاننىڭ الەمدىك جانە ءداستۇرلى دىندەر سەزىن شاقىرۋ تۋرالى باستاماسىن جوعارى باعالادى. ونىڭ پىكىرىنشە, بۇل باستاما قازاقستاننىڭ كەلىسىم مەن تولەرانتتىلىقتى, حالىقتار اراسىنداعى قۇرمەت پەن دوستىقتى, مادەنيەتتەر مەن وركەنيەتتەردى ىلگەرىلەتۋ ماسەلەلەرىنە ۇلكەن ۇلەس قوسىپ وتىرعانىنىڭ ايعاعى بولىپ تابىلادى.
سىرتقى ساياسات ۆەدومستۆوسىنىڭ باسشىسى ورنىقتى دامۋ جانە باسقا دا وزەكتى ماسەلەلەر بويىنشا ءوزارا ءىس-قيمىلدى ءارى قاراي جالعاستىرۋعا دايىن ەكەنىن ءبىلدىردى. قازاقستاننىڭ الماتىدا بۇۇ-نىڭ وڭىرلىك حابىن قۇرۋ باستاماسىن قولدايتىنى مالىمدەلدى. «گەوساياسي جانە گەوگرافيالىق كوزقاراس تۇرعىسىنان قازاقستان بۇۇ-نىڭ ورتالىق ازيا مەن اۋعانستانداعى قىزمەتىن ۇيلەستىرۋدە اسا لايىقتى ورىن بولىپ تابىلادى», – دەپ اتاپ ءوتتى مينيستر. بۇۇ-نىڭ الماتىداعى حابى قازىرگى جاعدايلاردا, ياعني گۋمانيتارلىق كومەك پەن دامۋدىڭ ورتاق باعىتتىلىعى كەزەڭىندە ەرەكشە ساياسي ماڭىزعا يە بولادى, دەپ اتاپ كورسەتتى ە.ىدىرىسوۆ.
كەزدەسۋ كەزىندە, سونداي-اق, قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگى مارتەبەسىن الۋعا تاپسىرىسى تالقىلاندى. «سايلانعان جاعدايدا ءبىز جاھاندىق جانە وڭىرلىك دەڭگەيدەگى كوكەيكەستى ماسەلەلەردى شەشۋگە ايتارلىقتاي ۇلەس قوسامىز دەپ بىلەمىز», – دەپ سەندىردى سۇحباتتاسىن ە.ىدىرىسوۆ.