قاشاننان بەرى ۇلتتىق قۇندىلىقتاردىڭ التىن بەسىگى ىسپەتتى ۇلىتاۋ وبلىسىندا بىلتىرعى وقۋ جىلىنان بەرى بىرىڭعاي ورىس تىلىندە ءبىلىم بەرەتىن بىردە-ءبىر مەكتەپ قالعان جوق. ايماقتا جىل ساناپ بالالارىن قازاق مەكتەبىندە وقىتۋعا دەگەن ۇمتىلىس قارقىن الىپ كەلەدى.
– بيىل وبلىس بويىنشا 4 270 بالا مەكتەپ تابالدىرىعىن العاش رەت اتتادى. سونىڭ 3 468-ءى – قازاق, قالعان – 802-ءسى ورىس سىنىپتارىنا باردى, – دەيدى وبلىستىق ءبىلىم باسقارماسى باسشىسىنىڭ ورىنباسارى م.تورەبەكوۆ.
ساتباەۆ قالاسىنداعى №14 مەكتەپتە وتكەن جىلى العاش رەت قازاق سىنىبى اشىلعان ەدى. قاي نارسەنى بولسا دا باستاۋ قيىن ەمەس پە؟ سول سىنىپقا نەبارى 6 وقۋشى جينالعان ەدى. قازىر ولار ەكىنشى سىنىپتا وقىپ ءجۇر. ءبىر قىزىعى, سول التاۋدىڭ ەكەۋى – وزگە ۇلت وكىلدەرى بولاتىن. ال بيىلعى جاعداي قالاي بولدى ەكەن؟
– بيىل مەكتەبىمىزدە 2 قازاق, 2 ورىس ءتىلدى 4 ءبىرىنشى سىنىپ اشىلدى. قازاق سىنىپتارىنا – 39, ورىسشاعا – 57 بالا جينالدى. ءبىزدى بالالارىن قازاقشا وقىتقىسى كەلەتىن اتا-انالار قاتارىنىڭ مولايا تۇسكەنى قۋانتادى, –دەيدى مەكتەپ ديرەكتورى فاريدا سىزدىقوۆا.
ارينە, بۇل قۋانىشتى جاعداي. دەگەنمەن ساتباەۆ قالاسى بويىنشا بيىلعى ورىس مەكتەبىنىڭ تابالدىرىعىن العاش اتتاعان 320 بالانىڭ 114-ءنىڭ قازاق بالاسى ەكەنىن بىلگەندە كوڭىل جابىرقاپ-اق قالادى. دەمەك ۇلتتىق سانا سىلكىنىسىن كۇشەيتە تۇسپەسە بولمايدى-اۋ...
ۇلىتاۋ وبلىسى