ەل ۇكىمەتى كاسىپكەرلىك قوعامداستىقپەن بىرلەسىپ, شاعىن جانە ورتا بيزنەستى قولداۋ اياسىن كەڭەيتۋگە كىرىستى. بۇل تۋرالى پرەمەر-مينيستر ولجاس بەكتەنوۆ مەملەكەت باسشىسى قاسىم-جومارت توقاەۆ توراعالىق ەتكەن ۇكىمەتتىڭ كەڭەيتىلگەن وتىرىسىندا مالىمدەدى, دەپ جازادى Egemen.kz.
پرەمەر-ءمينيستردىڭ ايتۋىنشا, الداعى كەزەڭدە ينفراقۇرىلىمدى جاڭعىرتۋ مەن ءىرى ونەركاسىپتىك جوبالاردى ىسكە اسىرۋ نەگىزگى باسىمدىق رەتىندە ساقتالادى. سونىمەن قاتار ميكرو جانە شاعىن بيزنەستى قولداۋعا ايرىقشا ءمان بەرىلەدى.
«ەكونوميكالىق تۇراقتىلىقتى قامتاماسىز ەتۋ تۋرالى تاپسىرماڭىزعا سايكەس, ميكرو جانە شاعىن بيزنەس سۋبەكتىلەرىنە ارنالعان قارجىلىق, قارجىلىق ەمەس جانە ينفراقۇرىلىمدىق قولداۋ شارالارىن ءبىر جۇيەگە كەلتىرەتىن «ىسكەر ايماق» باعدارلاماسى بەكىتىلدى», دەدى ولجاس بەكتەنوۆ.
«ىسكەر ايماق» شاعىن كاسىپكەرلىكتى قولدايدى
وتىرىستا قولدانىستاعى قۇرالداردىڭ شاعىن جانە ورتا بيزنەستىڭ بارلىق الەۋەتىن اشۋعا جەتكىلىكسىز ەكەنى دە ايتىلدى. وسىعان بايلانىستى ۇكىمەت بيزنەس قاۋىمداستىقپەن بىرلەسىپ, قوسىمشا قارجىلىق جانە رەتتەۋشىلىك شارالاردى ازىرلەپ جاتىر. سونىڭ ىشىندە نەگىزگى باعىتتاردىڭ ءبىرى رەتىندە شاعىن جانە ورتا كاسىپورىنداردى زاماناۋي جابدىقتارمەن قايتا جاراقتاندىرۋ باعدارلاماسى اتالدى.
اتالعان باستاما «بايتەرەك» حولدينگى ارقىلى ىسكە اسپاق. ارنايى باعدارلاما كاسىپكەرلەرگە 10 كۇن ىشىندە قوسىمشا كەپىلسىز, جەڭىلدىكتى نەسيە ەسەبىنەن زاماناۋي ستانوكتار ساتىپ الۋعا مۇمكىندىك بەرەدى. بۇل ءوز كەزەگىندە بيزنەستىڭ باسەكەگە قابىلەتتىلىگىن ارتتىرىپ, توزعان ماتەريالدىق-تەحنيكالىق بازانى جاڭارتۋعا جول اشادى.
«بايتەرەك» – ەكونوميكالىق ورنىقتى دامۋدىڭ درايۆەرى
سونداي-اق مەملەكەت باسشىسىنىڭ ۇلتتىق قۇرىلتاي وتىرىسىندا ايتقان ۇستانىمىن ەسكەرە وتىرىپ, جاڭا سالىق كودەكسىندەگى وزگەرىستەردىڭ بىرقالىپتى ەنگىزىلۋىنە باسىمدىق بەرىلەدى. ۇكىمەت سالىقتىق رەتتەۋدى جەتىلدىرۋگە قاتىستى بيزنەس وكىلدەرىنىڭ سىندارلى ۇسىنىستارىن نازاردا ۇستايتىنىن جەتكىزدى. بۇعان دەيىن 2026 جىلدىڭ 1 قاڭتارىنا دەيىن بارلىق سالىقتىق تەكسەرۋدى توقتاتۋ تۋرالى شەشىم قابىلدانعان. سونىمەن قاتار بيىل ميكرو جانە شاعىن بيزنەسكە جول بەرىلگەن زاڭبۇزۋشىلىقتار ءۇشىن جاۋاپكەرشىلىك شارالارى قولدانىلمايدى.
رەسمي دەرەكتەرگە سۇيەنسەك, 2025 جىلدىڭ قورىتىندىسى بويىنشا ەلدە جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانى 5 پايىزعا ءوسىپ, 2,2 ملن كاسىپورىننان استى. بۇل سەكتوردا جۇمىسپەن قامتىلعاندار سانى 3,9 پايىزعا ارتىپ, 4,5 ملن ادامعا جەتكەن. اتالعان كورسەتكىش جالپى جۇمىسپەن قامتىلعانداردىڭ شامامەن 46 پايىزىنا, ال ەكونوميكالىق بەلسەندى حالىقتىڭ جارتىسىنا جۋىعىنا تەڭ.
شاعىن جانە ورتا بيزنەس قولداۋدان كەندە ەمەس
شاعىن جانە ورتا بيزنەستىڭ جالپى ىشكى ونىمدەگى ۇلەسى 40,5 پايىزدى قۇراپ, وندىرىلگەن ءونىم كولەمى شامامەن 73 ترلن تەڭگەگە جەتكەن. ۇكىمەت بۇل كورسەتكىشتەردى ودان ءارى ارتتىرۋ ءۇشىن قولداۋ شارالارى جۇيەلى تۇردە جالعاسا بەرەتىنىن اتاپ ءوتتى.