كەزەك كۇتتىرمەيتىن ىستەر

جولداۋدا ءبىلىم ماسەلە­سىنە كەڭىنەن توقتالعان مەم­لەكەت باسشىسى كاسىپتىك-تەح­نيكالىق ءبىلىم اياسىن كەڭەيتۋ وزەكتىلىگى تۋرالى دا ناقتى ءسوز ەتتى. ەلىمىزدە ورتا تاپتى دامىتۋ جانە حالىقتىڭ الەۋمەتتىك احۋالىن جاقسارتۋ ءۇشىن مۇنىڭ ءبارى اسا ماڭىزدى.

«ۇستازدار – ۇلتتىق زيات­كەرلىك قۋاتى», دەدى پرەزيدەنت. كاسىپتىك-تەحنيكالىق جانە جو­عا­رى وقۋ ورىندارىندا سالا ما­ماندارىن دايارلاۋ ءىسىنىڭ ساپاسى ارتاتىن بولادى. مەملەكەت باسشىسى قاجەتتى دەڭگەيگە قول جەتكىزگەنشە ءبىلىم سالاسىنا رەفورمالار جۇرگىزىلە بەرەتىنىن ايتتى.

جولداۋدا ەلىمىزدىڭ ساياسي جانە الەۋمەت­تىك-ەكونوميكالىق دامۋ كەلەشە­گىن­ە دە توقتالدى. اسىرەسە ۇكىمەتكە تۇرعىنداردى جانە ەكونوميكانى قاجەتتى كولەمدە گازبەن قامتاماسىز ەتۋ­دى تاپسىرىپ, مۇناي-گاز-حيميا سالاسىن ودان ءارى دامىتۋدى مىندەتتەدى.

سونداي-اق ول كاسىپتىك ءبىلىم سالاسىنا رەفورما كەرەگىن ايتا كەلىپ: «بۇل – ەكونوميكانىڭ ءوسىمىن قامتاماسىز ەتۋ جانە ين­ۆەستيتسيالىق تارتىمدىلىعىن ارتتىرۋ ءۇشىن اسا قاجەت قادام. مەن 2025 جىلدى جۇمىسشى ماماندىقتارى جىلى دەپ جا­ريا­لايمىن. وسى ۋاقىت ىشىن­دە تەحنيكالىق جانە كاسىبي ءبى­لىم جۇيەسىن رەفورمالاۋ قا­جەت. سونداي-اق ءبىز جۇمىسشى ما­ماندىقتارىن دارىپتەۋ ارقى­لى قوعامدا ەڭبەكقور جانە ناعىز ما­مان بولۋ يدەياسىن ناسيحاتتايمىز», دەدى.

مەملەكەت باسشىسى بيىل ەلىمىزدە 12 مىڭ شاقىرىمعا جۋىق جول سالىنىپ جاتقانىن جانە تەمىرجول سالاسىندا رە­فورما جاساۋ ءۇشىن تاريف جۇيە­سى قايتا قارالاتىنىن ايتا كەلىپ: «ەلىمىز ەۋرازيا قۇر­لى­عىنىڭ ءدال ورتاسىندا ورنا­لاسقان. بۇل – بىزگە الەمدىك باسە­كە­دە زور مۇمكىندىك بەرەتىن ارتىق­شىلىق. سوندىقتان كولىك ين­فراقۇرىلىمىنا سالىنىپ جات­­قان ءاربىر ينۆەستيتسيا ءوزىن-ءوزى اقتايتىنى ءسوزسىز. ءبىز كەيىنگى ۇرپاققا جوعارى ساپالى اۆتو جانە تەمىرجولداردى قال­دى­رۋى­مىز كەرەك. سونداي-اق ءتيىم­دى جۇمىس ىستەيتىن اۋە حاب­تارىن, تەمىرجول بەكەتتەرى مەن تەڭىز پورتتارىن سالۋىمىز قا­جەت. بۇل رەتتە بىرقاتار كە­شەن­دى ماسەلەنى شەشكەن ءجون», دەدى.

سونىمەن جولداۋدى مۇقيات تىڭدا­دىق. ەندى وسىنداي وتە وزەكتى ماسەلەلەردىڭ ءبارىن كەزەڭ-كەزەڭىمەن جۇزەگە اسىرۋ قاجەت.

نۇرتورە ءجۇسىپ,

سەنات دەپۋتاتى