استانادا «نۇر وتان» پارتياسىنىڭ قوعامدىق ساياسات ينستيتۋتى «SarapTime» cاراپشىلار كلۋبىمەن بىرلەسىپ, «ۇلت جوسپارى – «مەملەكەت قۇرىلىسىنىڭ ودان ارعى دامۋىنىڭ 100 ناقتى قادامىن ىسكە اسىرۋدىڭ قوعامدىق تەتىكتەرى» دەگەن تاقىرىپتاعى ەكىنشى وتىرىسىن وتكىزدى.
باسقوسۋعا «نۇر وتان» پارتياسى قوعامدىق ساياسات ينستيتۋتىنىڭ ديرەكتورى ساياسات نۇربەك, «التەرناتيۆا» وزەكتى زەرتتەۋلەر ورتالىعىنىڭ ديرەكتورى, ساياساتتانۋشى اندرەي چەبوتارەۆ, «اباي-اقپارات» قوعامدىق قورىنىڭ ۆيتسە-پرەزيدەنتى ايدوس سارىم, ماكروەكونوميكالىق زەرتتەۋلەر ورتالىعىنىڭ ديرەكتورى ولجاس قۇدايبەرگەنوۆ, «ستراتەگيا» قوعامدىق قورىنىڭ پرەزيدەنتى گۇلميرا ەلەۋوۆا, ساياساتتانۋشى ەرلان سايىروۆ جانە تاعى باسقالار قاتىستى. قازاقستان ازاماتتىق اليانسىنىڭ توراعاسى نۇرلان ەرىمبەتوۆ وتىرىستىڭ مودەراتورى بولدى.
مەملەكەت باسشىسى نۇرسۇلتان نازارباەۆ ۇسىنعان بەس ينستيتۋتتىق رەفورمانى جۇزەگە اسىرۋ ماقساتىندا بەلگىلەنگەن «100 ناقتى قادام» – ۇلت جوسپارىندا قاراستىرىلعان ورتاشا تاپتىڭ ۇلەسىن ارتتىرۋ, بىرىڭعاي ىشكى نارىقتى دامىتۋ, سىبايلاس جەمقورلىقپەن كۇرەس, جاڭا جۇمىس ورىندارىن قۇرۋ جانە بىرلىكتى نىعايتۋ ماسەلەلەرى ءسوز ەتىلگەن بۇل جيىندا ساراپشىلار ەل الدىنا قويىلىپ وتىرعان وسى اۋقىمدى مىندەتتەردى اتقارۋ ىسىنە قاتىستى ويلارىن جەتكىزدى.
ءبىرىنشى كەزەكتە ءسوز العان «نۇر وتان» پارتياسى قوعامدىق ساياسات ينستيتۋتىنىڭ ديرەكتورى ساياسات نۇربەك قازىرگى تاڭدا ەل الدىندا ماڭىزدى مىندەتتەر تۇرعانىن, ولاردى ەڭسەرۋدە «100 ناقتى قادام» – ۇلت جوسپارىنىڭ ماڭىزدىلىعىنا توقتالدى. ونىڭ ايتۋىنشا, بەس ينستيتۋتتىق رەفورمانىڭ ءوز دەڭگەيىندە جۇزەگە اسىرىلۋى ەلىمىزدىڭ جاڭا بەلەسكە كوتەرىلۋىنە تولىق مۇمكىندىك بەرەدى. پرەزيدەنت نۇرسۇلتان نازارباەۆ ءوزىنىڭ بەس ينستيتۋتتىق رەفورماسىندا اتاپ كورسەتكەندەي, مەملەكەتتىك ورگانداردىڭ ءمولدىرلىگى مەن ەسەپتىلىگىن, زاڭدار ۇستەمدىگىنىڭ كۇشەيتىلۋىن, ەكونوميكالىق ءوسىمدى قامتاماسىز ەتۋ, ەل بىرلىگىن نىعايتا ءتۇسۋ قازاقستاننىڭ بۇگىنگى جەتىستىگىن ودان ءارى ۇلعايتۋعا كەپىل بولا الادى, دەدى ول. بۇدان بولەك, ساياسات نۇربەك بۇگىندە حالىقارالىق ساراپشىلاردىڭ قازاقستاندا الەمدەگى وتە جوعارى ماقساتتى كوزدەگەن باعدارلامالاردىڭ ءبىرى باستاۋ الدى دەپ ەسەپتەيتىنىن جەتكىزدى. «نۇر وتان» پارتياسى قوعامدىق ساياسات ينستيتۋتى ديرەكتورىنىڭ سوزىنە قاراعاندا, ەلىمىزدىڭ مەيلىنشە جوعارى ناتيجەگە قول جەتكىزۋى ءۇشىن ازاماتتىق قوعام مەن مەملەكەتتىڭ ىنتا-جىگەرىن جۇمىلدىرۋدىڭ ماڭىزى زور. سونىمەن قاتار, ول «100 ناقتى قادام» بەس ينستيتۋتتىق رەفورمانى جۇزەگە اسىرۋدىڭ ناقتى الگوريتمى ەكەنىن, وسى باسىمدىقتارعا بايلانىستى «نۇر وتان» پارتياسىنىڭ 50 ۇسىنىس ازىرلەگەنىن اتاپ ءوتتى.
ال ماكروەكونوميكالىق زەرتتەۋلەر ورتالىعىنىڭ ديرەكتورى ولجاس قۇدايبەرگەنوۆ حالىقارالىق قارجى ينستيتۋتتارى ەكونوميكالىق پروبلەمالارى شەشىمىن تاپقان, ساياسي تۇراقتىلىق ورنىققان ەلدەرمەن بىرگە جۇمىس ىستەۋگە مۇددەلى ەكەنىن ايتا وتىرىپ, قازاقستاندا شەتەلدىكتەرگە كۇمان تۋدىراتىن جاعداياتتار, كەلەڭسىزدىكتەر جوق ەكەنىنە توقتالدى.
جيىن بارىسىندا ساراپشىلار ۇلت جوسپارى تالاپتارىن ورىنداۋدا ءتيىمدى قوعامدىق تەتىكتەر ءبىرىنشى كەزەكتە ازاماتتاردىڭ ءال-اۋقاتىن, مەملەكەت دامۋىن ودان ءارى ورىستەتۋگە باعىتتالعان كۇردەلى ينستيتۋتتىق وزگەرىستەردىڭ باستاۋشىسى رەتىندە حالىقتىڭ بيلىككە سەنىمىن كۇشەيتە تۇسەتىنىنە دە نازار اۋداردى.
سونىمەن قاتار, ساراپشىلار وتىرىستا مەملەكەتتىك قىزمەتكەرلەردىڭ كاسىبيلىگىن تۇبەگەيلى ارتتىرۋعا, سوت جۇيەسى مەن قۇقىق قورعاۋ ورگاندارىنىڭ جۇمىسىن مودەرنيزاتسيالاۋعا, ەل تۇتاستىعىن نىعايتۋعا, «اشىق ۇكىمەت» جۇمىسىنىڭ مەحانيزمدەرىن جەتىلدىرۋگە, مەملەكەتتىك اپپاراتتىڭ مولدىرلىگىنە, ەسەپتىلىگىنە, قوعامدىق باقىلاۋدى كۇشەيتۋگە جانە باسقا دا جاعدايلارعا قاتىستى ويلارىن ورتاعا سالدى.
جالپى, جيىنعا قاتىسۋشىلار پرەزيدەنت نۇرسۇلتان نازارباەۆ ۇسىنعان بەس ينستيتۋتتىق رەفورمانىڭ ارتىقشىلىقتارىن تالداي كەلىپ, وندا كورسەتىلگەن باستامالاردىڭ بارلىعى زامان تالابىنان تۋىنداپ وتىر دەگەن پىكىرگە كەلدى.
جولدىباي بازار,
«ەگەمەن قازاقستان».