جۋىردا شىمكەنتتەگى «دوستىق ۇيىندە» قالالىق قازاقستان حالقى اسسامبلەياسىنىڭ ۇيىتقى بولۋىمەن رەسپۋبليكالىق «مەكتەپكە جول» قايىرىمدىلىق اكتسياسى ءوتىپ, سونىڭ اياسىندا الەۋمەتتىك تۇرعىدان از قامتىلعان جانە كوپبالالى وتباسىنان شىققان 200-دەن اسا جەتكىنشەككە مەكتەپكە قاجەتتى وقۋ قۇرالى بەرىلدى.
شىمكەنت قالاسى قحا توراعاسىنىڭ ورىنباسارى, قالالىق وزبەك ەتنومادەني بىرلەستىگىنىڭ توراعاسى تاحيربەك نيشانباەۆ ءبىلىم كۇنى قارساڭىندا اتالعان اكتسيانىڭ ءوتىپ وتىرعانىنىڭ ماڭىزى زور ەكەنىن ايتتى.
«شىنى كەرەك, «ۇيدەگى كوڭىلدى بازارداعى نارىق بۇزادى» دەمەكشى, قازىر مەكتەپكە قاجەت وقۋ قۇرالدارىن ساتىپ الۋ – جاعدايى ورتا وتباسىلاردىڭ وزىنە قىمباتقا ءتۇسىپ وتىر. ونىڭ ۇستىنە ءدال وقۋ باستالاردا بارلىق اتا-انا بالاسىن مەكتەپكە دايىنداپ, بازار دەگەن قازانداي قايناپ جاتىر. سونداي كەزدە نارىق زاڭدىلىعىنا ساي, سۇرانىس ارتىپ, باعا دا وسەدى. سوندىقتان كەيبىر اتا-انالار بالالارىنا وقۋعا قاجەتتى دۇنيەلەردى تولىق ساتىپ اپەرە الماۋى مۇمكىن. قوعام بولعاننان كەيىن الەۋمەتتىك دەڭگەيى ءار ءتۇرلى ادام بولادى. مۇمكىندىگىنشە, جاعدايى تومەن ازاماتتارعا قوعام بولىپ كومەكتەسۋ – پارىز. مۇنداي اكتسيانىڭ جۇرتشىلىقتىڭ ءبىر-بىرىنە دەگەن جاناشىرلىعى مەن مەيىرىمدىلىك سەزىمىن وياتۋدا ماڭىزى ۇلكەن. بۇل رەتتە قازاق جەرىن مەكەن ەتكەن قانشاما دياسپورا وكىلدەرىنىڭ دە قايىرىمدىلىققا قوسىپ وتىرعان ۇلەسى مول. ويتكەنى ءبارىمىز دە ءبىر شاڭىراقتىڭ استىندا ءومىر ءسۇرىپ جاتقان قازاقستان دەيتىن الىپ مەملەكەتتىڭ ازاماتىمىز. سول ءۇشىن دە بالالاردىڭ جۇزىنە قۋانىش سىيلاۋ بارشامىزدىڭ مىندەتىمىز», دەدى ول.
ءوز كەزەگىندە بالالارىنا مەكتەپكە قاجەتتى وقۋ-قۇرالدارىن دايىنداپ بەرگەن قايىرىمدى جاندارعا العىسىن جاۋدىرعان, الايدا اتى-ءجونىن اتاۋدى ءجون ساناماعان كوپبالالى انانىڭ دا «مەكتەپكە جول» اكتسياسىنا ءدان ريزا ەكەنىن جۇزىنەن بايقادىق.
«وتباسىلىق تابىسىمىز كوپ ەمەس. بىراق جىل سايىن وسىنداي ىزگى جانداردىڭ ارقاسىندا بالالارىمىزدى ساباققا دايىنداۋدان ونشا قينالمايمىز. شىنىمدى ايتسام, قازىر مەكتەپ جاسىنداعى بالالارعا بار جاعداي جاسالىپ جاتىر. ەشقانداي اتا-انا دا, وقۋشى دا دالادا قالمايدى. ءبىر جاعىنان, بۇل قايىرىمدىلىق اكتسياسى ەشكىمدى ءبولىپ-جارىپ وتىرعان جوق. بارلىق بالانى تەڭ كورەدى. سونىڭ ءوزى كوڭىلگە – دەمەۋ. وسىندايدا ءوزىڭنىڭ مەملەكەتكە, قوعامعا كەرەك ەكەنىڭدى سەزىنەسىڭ. سوندىقتان بالالارىما «تۋعان ەلدەي ەل بولماس, تۋعان جەردەي جەر بولماس» دەگەن بابالار وسيەتىن ۇنەمى ۇعىندىرىپ وتىرامىن», دەدى ول.
قازاقستان حالقى اسسامبلەياسى «جومارت جان» ورتالىعىنىڭ جوسپارىنا سايكەس وتكەن «مەكتەپكە جول» اكتسياسىنا قالالىق سلاۆيان, كورەي, وزبەك, تۇرىك, ازەربايجان, گرۋزين, ۇيعىر, كۇردى, ەۆرەي, شەشەن-ينگۋش, تاتار-باشقۇرت, گرەك ەتنومادەني بىرلەستىكتەرى بەلسەنە قاتىسىپ, ىزگىلىكتى ءىس-شاراعا ءبىر كىسىدەي اتسالىستى. بۇعان قوسا, شىمكەنتتىك ەتنومادەني بىرلەستىكتەردىڭ بەلسەندىلەرى كوپبالالى وتباسىلاردىڭ بالالارىن قاجەتتى وقۋ قۇرالدارىمەن قامتۋدى ءالى دە جالعاستىرۋدى كوزدەپ وتىر.
شىمكەنت