ەكسپورتتىق الەۋەتتىڭ بەس ءۇردىسى

ينستيتۋت ساراپشىلارى اتا­عان ءبىرىنشى ءۇردىس – شيكىزاتتىق ەكسپورتتىڭ ءوسىمى. ەل ەكونوميكاسى ءداستۇرلى ەكسپورتتىق تاۋارلارعا سۇيەنۋدى جالعاستىرىپ وتىر. 2024 جىلدىڭ العاشقى جارتىسىندا ەكسپورت مۇناي, ۋران, مىس كاتودتارى مەن رۋدالاردىڭ جەتكىزىلۋى ارقاسىندا 2,1%-عا ءوستى. الايدا وسى تاۋارلاردى ەسەپتەمەگەندە, ەكسپورت 14%-عا تومەندەدى, بۇل شيكىزات سەكتورىنا تاۋەلدىلىكتى ايقىندايدى.

ەكىنشى انىق كوزگە ۇرعان فاكتور – بيداي جەتكىزىلىمدەرىنىڭ كۇرت قىسقارۋى. وتاندىق فەرمەرلەر بيداي ەكسپورتىنىڭ ەكى ەسە قىسقارۋى سالدارىنان 533 ملن دوللار كولەمىندە ەكسپورتتىق تابىس جوعالتقان. اسىرەسە وزبەكستانعا جەتكىزىلىم – 33%-عا, اۋعانستانعا – 81%-عا, تۇرىكمەنستانعا 95%-عا قىسقاردى. بۇل جوعالتۋلار رەسەيلىك بيداي ەكسپورتىنىڭ ارتۋىمەن, بىزدەگى ءداستۇرلى نارىقتىڭ جاۋلاپ الىنۋىمەن بايلانىستى.

ءۇشىنشى ءۇردىس – دايىن اۋىل شارۋاشىلىعى ونىمدەرىنىڭ ەكسپورتى ءوستى. شيكىزاتتىق اۋىل شارۋاشىلىعى تاۋارلارى ەكسپورتىنىڭ تومەندەۋىنە قاراماستان, دايىن ءونىم ەكسپورتى 12%-عا, ال كولەمى 24%-عا ءوستى. 2014 جىلدان بەرى فيزيكالىق كولەم 4 ەسە ءوستى, بىراق ەكسپورتتىڭ 95%-دان استامى ءالى دە تمد ەلدەرىنە تيەسىلى. ەكسپورتتىق نارىقتاردى ءارتاراپتاندىرۋ اگروونەركاسىپتىك كەشەننىڭ ودان ءارى دامۋى ءۇشىن ماڭىزدى مىندەت بولىپ قالا بەرەدى.

ءتورتىنشى ءۇردىس – قىتايعا ەكسپورتتىڭ رەكوردتاردى جاڭار­تىپ جاتقانى.

2024 جىلدىڭ العاشقى جارتىسىندا قىتايعا ەكسپورت 7,3 ملرد دوللارعا جەتىپ, وتكەن جىلدىڭ سايكەس كەزەڭىمەن سالىستىرعاندا 17%-عا ءوستى. قىتاي ەلىمىزدەن مەتالدى (+60%), رۋدا (+18%), حيميالىق زاتتاردى (+157%), ازىق-ت ۇلىك ونىمدەرىن (+49%) بەلسەندى ساتىپ الىپ جاتىر.

بەسىنشى ءۇردىس – رەسەيگە شىعارىل­عان ەكسپورتتىڭ تومەن­دەۋى. بۇل ەلگە تاۋار تاسىمالى 20%-عا تومەندەپ, 4,3 ملرد دوللار بولدى. تومەندەۋدىڭ نەگىزگى سەبەپتەرى – رەەكسپورتتى باقىلاۋدىڭ كۇشەيۋى, اۆتوكولىكتەر مەن قىمبات مەتالل رۋدا جەتكىزىلىمدەرىنىڭ ازايۋى. بىلتىرعى رەكوردتىق كورسەتكىشتەردەن كەيىن رەسەيگە ەكسپورتتىڭ قىسقارۋى ساۋدا اعىمدارىنىڭ وزگەرۋىن, رەسەيلىك نارىقتاعى ءوسىپ كەلە جاتقان قيىندىقتى كورسەتەدى.