رەسەيدىڭ استراحان وڭىرىندە تۇراتىن قازاق قىزى ادەلينا ايسانعاليەۆا وسى ماقساتىنا جەتۋدى كوزدەيدى
استراحان – رەسەيدەگى قازاق ەڭ كوپ قونىستانعان ءوڭىر. ۇزاق جىل بانك سالاسىندا, سونىمەن بىرگە, استراحاندىق قازاقتاردىڭ ۇلتتىق سالت-ءداستۇرى, انا ءتىلى سەكىلدى ۇلتتىق قۇندىلىقتارىنان اجىراماۋىنا بار جان-تانىمەن قىزمەت ەتىپ جۇرگەن ۇلتجاندى ازامات, «جولداستىق» قازاق ءتىلى مەن مادەنيەتى قوعامىنىڭ قۇرمەتتى توراعاسى بولعان نيكيتا ىسقاقوۆتىڭ پىكىرىنشە, مۇندا 160 مىڭعا جۋىق قانداسىمىز مەكەندەيدى. «ءبىز ءوز اتامەكەنىمىزدە تۇرىپ جاتىرمىز», دەيتىن قانداستارىمىز اسىرەسە, كراسنىي يار, ۆولودار, قارابايلى اۋداندارىندا كوپ قونىستانعان. اعا بۋىن وكىلدەرى قازاق تىلىندە ەركىن سويلەيدى. ال جاستار جاعى شورقاقتاۋ. دەگەنمەن, جاس بۋىننىڭ اراسىندا ۇلتتىق قۇندىلىقتاردى ساناعا توقۋعا ۇمتىلىس بايقالادى.
مۇنداعى قازاق جاستارىنىڭ كوبى استراحانداعى جوعارى جانە ارناۋلى ورتا وقۋ ورىندارىندا ءبىلىم الىپ ءجۇر. سونداي جاستاردىڭ ءبىر توبى, ماسەلەن, اسلان وتەعاليەۆ پەن ماديات قۇسپانوۆ استراحانداعى مۋزىكا ۋچيليششەسىندە ءبىلىم الىپ جۇرگەن بولاشاق مۋزىكانتتار. ەكەۋى دە استراحانعا اۋداننان كەلىپتى. ال ادەلينا ايسانعاليەۆانىڭ اتا-اناسى استراحان قالاسىنىڭ بايىرعى تۇرعىندارى سانالادى. قازىر قارىنداسىمىز استراحان مەملەكەتتىك ۋنيۆەرسيتەتىنىڭ 3-كۋرسىندا وقيدى. «بولاشاق ماماندىعىم – پسيحولوگ-الەۋمەتتىك پەداگوگ», دەگەن ادەلينا قازاق ءتىلىن جەتىك بىلمەيتىنىن جاسىرمادى. ويتكەنى, ول ورىس مەكتەبىندە ورتا ءبىلىم الىپتى.
– قازاق حالقىنىڭ ءبىر پەرزەنتى بولعاندىقتان, انا ءتىلىمدى ۇيرەنگىم كەلەدى. قازاقستاندا تۇراتىن زامانداس-قۇربىلارىممەن الەۋمەتتىك جەلىلەردە ءجيى بايلانىسىپ تۇرامىن. ينتەرنەتتە قازاقستاندىق دوستارىم كوپ. ولار ماعان قازاقشا ۇيرەتۋ ءۇشىن الەۋمەتتىك جەلىلەر ارقىلى انا تىلىمدە حابارلاما جولدايدى. مەن, ارينە, قازاقشا تۇسىنەمىن, وقي الامىن. بىراق ازىرگە جازا المايمىن. سول سەبەپتەن, قازاقستاندىق دوستارىمنىڭ الەۋمەتتىك جەلىلەر ارقىلى جولداعان حابارلامالارىنا ورىسشا جاۋاپ قايتارىپ ءجۇرمىن, – دەيدى قارىنداسىمىز ادەلينا ايسانعاليەۆا.
استراحان قازاقتارى قازاقستاننان قانداستارى كەلسە, بالاشا قۋانادى. قازاقستاننان كەلگەن قوناقتاردىڭ جانىنان قالمايدى. ءسويلەسۋگە, رەسپۋبليكا ەكونوميكاسى, دامۋى, استانانىڭ وركەندەۋى تۋرالى بىلگىسى كەلىپ تۇرادى. استراحانداعى قازاق ستۋدەنتتەرى ادەلينا, اسلان مەن ماديات تا – سولاردىڭ قاتارىندا قازاقستانعا ەرەكشە قىزىعۋشىلىق تانىتاتىنىن بايقادىق. اسىرەسە, ادەلينا باتىس قازاقستان وبلىسىنداعى «اقجايىق» بي ءانسامبلىنىڭ ءبيشى قىزدارىمەن جاقىن تانىسىپ, دوستاسقانىنا كۋا بولدىق.
– بولاشاقتا قازاقستاننىڭ بارلىق قالاسىن ارالاعىم كەلەدى. اسىرەسە, استانا مەن الماتى ەرەكشە قىزىقتىرادى, – دەيدى ادەلينا بىزبەن اڭگىمەلەسكەن ساتىندە. – اتاجۇرتتىڭ كورىكتى جەرلەرىندە بولسام دەيمىن. ازىرگە قازاقستان جايلى دەرەكتەردى ينتەرنەت رەسۋرستارىنان ءبىلىپ وتىرامىز. تەلەديداردان ەل جەتىستىكتەرى جايلى دەرەكتى, اقپاراتتىق حابارلار بەرىلسە, ۇزبەي كورۋگە تىرىسامىن. الەم ەلدەرى قازاقستاننىڭ كەلەشەگىنە قىزىعۋشىلىق تانىتىپ وتىرعاندا, ءبىز نەگە قىزىقپاۋىمىز كەرەك؟ ازىرگە ستۋدەنتپىن عوي. جوعارى وقۋ ورنىن بىتىرگەسىن قازاقستانعا بارعىم كەلەدى. سول ەلدىڭ ەكونوميكاسىن وركەندەتۋگە ۇلەسىمدى قوسۋدى ارمانداپ ءجۇرمىن. بالكىم, استانادا, نە الماتىدا بولا ما, الدە اتىراۋ مەن اقتاۋ قالاسىنىڭ بىرىندە جۇمىس جاساۋدى ماقسات ەتىپ وتىرمىن.
ءيا, رەسەيدىڭ استراحان وڭىرىندە جۇرەگى قازاق ەلى دەپ سوققان وسىنداي ىنىلەرىمىز-قارىنداستارىمىز بار. ولاردىڭ ەل مەن جەرگە دەگەن ساعىنىشى, ارمان-ماقساتى كوز جانارىنان بايقالىپ تۇرادى. اسىرەسە, ادەلينا ايسانعاليەۆانىڭ انا ءتىلىن مەڭگەرسەم, قازاق ەلىنىڭ وركەندەۋىنە ۇلەسىمدى قوسسام دەگەنى قۇر ارمان ەمەس ەكەنىنە رياسىز سەندىم. ويتكەنى, باتىل دا العىر قارىنداسىمىز «ەڭ باستى ارمانىم – قازاقستان ەكونوميكاسىن وركەندەتۋگە ۇلەس قوسۋ. كوزدەگەن ماقساتىما مىندەتتى تۇردە قول جەتكىزەمىن», دەگەندى سەنىمدى ايتتى.
جولداسبەك شوپەعۇل,
«ەگەمەن قازاقستان».
اتىراۋ–استراحان–اتىراۋ.
سۋرەتتە: استراحانداعى قازاق ستۋدەنتتەرى – ماديات قۇسپانوۆ, ادەلينا ايسانعاليەۆا جانە اسلان وتەعاليەۆ.