سەنات دەپۋتاتى مۇرات قادىربەك ارىس قالاسى ءماسليحاتىنىڭ دەپۋتاتتارىمەن كەزدەستى. كەزدەسۋ كەزىندە قالانىڭ الەۋمەتتىك-ەكونوميكالىق دامۋى, سەنات جۇمىسىنىڭ وتكەن سەسسياداعى قورىتىندىلارى, ازاماتتاردىڭ ءال-اۋقاتىن جاقسارتۋ ءۇشىن قابىلدانعان زاڭداردىڭ ماڭىزى تالقىلاندى.
سونداي-اق سەناتور «مەگا-اگات» كولىك-لوگيستيكالىق ورتالىعىنىڭ قۇرىلىس بارىسىمەن تانىستى. پارلامەنت دەپۋتاتى كاسىپورىن ىسكە قوسىلعان كەزدە جۇزدەگەن جۇمىس ورنى اشىلاتىنىن جانە ەلدىڭ ەكسپورتتىق الەۋەتىن جاقسارتۋعا وڭ ىقپالىن تيگىزەتىنىن اتاپ ءوتتى.
مۇرات قادىربەك قارتتار مەن زەينەتكەرلەرگە الەۋمەتتىك قىزمەت كورسەتەتىن ورتالىققا دا ارنايى باردى. سونىمەن قاتار تۇلكىباس اۋداندىق ءماسليحاتىنىڭ دەپۋتاتتارىمەن كەزدەستى. ءىس-شاراعا قاتىسۋشىلار اۋىل شارۋاشىلىعى, جەر قاتىناستارى جانە اۋدان ورتالىعىن اباتتاندىرۋدى قارجىلاندىرۋ ماسەلەلەرىنە توقتالدى. سەناتور بارلىق ماسەلە الداعى ۋاقىتتا ءتيىستى مەملەكەتتىك ورگاندارمەن بىرگە قارالاتىنىن ايتىپ, وتكەن سەسسيادا پارلامەنت قابىلداعان زاڭداردىڭ نەگىزگى باسىمدىقتارىن اتاپ ءوتتى.
«قازىرگى تاڭدا قوعامدى الاڭداتقان ايەلدەر مەن بالالاردىڭ قۇقىقتارىن قورعاۋ, لۋدومانيا مەن بۋللينگكە قارسى كۇرەس سياقتى وزەكتى ماسەلەلەردىڭ الدىن الۋ ءۇشىن ارنايى زاڭدار قابىلداندى. وسى جانە باسقا دا نورمالار ەلىمىزدى دامىتۋعا, سونداي-اق ازاماتتاردىڭ ءومىر ءسۇرۋ ساپاسىن جاقسارتۋعا ىقپال ەتەدى دەپ سەنەمىز», دەدى مۇرات قادىربەك.
سەناتور تولە بي اۋداندىق ءماسليحاتىنىڭ اكتيۆىمەن جانە دەپۋتاتتارىمەن كەزدەسۋدە قوعامدىق باقىلاۋ, تۇرمىستىق زورلىق-زومبىلىققا قارسى كۇرەس, ماسس-مەديا جانە مەملەكەتتىك ساتىپ الۋ تۋرالى زاڭدارعا كەڭىنەن توقتالىپ ءوتتى. جيىندا پالاتانىڭ قاراۋىنا كەلىپ تۇسكەن زاڭدار شەشىم قابىلداۋ الدىندا ءماسليحات دەپۋتاتتارىمەن, ساراپشىلارمەن بىرگە جان-جاقتى تالقىلانىپ, زەردەلەنەتىنى دە ءسوز بولدى.