تامىزدىڭ سوڭى قاشان دا قاربالاسقا تولى. اتا-انا مەكتەپكە باراتىن بالاسىنىڭ كەرەك-جاراعىن تۇگەندەسە, قالا بيلىگىنە ءبىلىم بەرۋ ۇيىمدارىن جاڭا وقۋ جىلىنا دايىنداۋ, وقۋشىلاردى تاسۋ, تاماقتاندىرۋ, حالىقتىڭ الەۋمەتتىك وسال توپتارىنا ء(حاوت) قارايلاسۋ سىندى كەشەندى ماسەلەلەردى رەتتەۋگە تۋرا كەلەدى. وڭىرلىك كوممۋنيكاتسيالار قىزمەتىنىڭ الاڭىندا الماتى اكىمىنىڭ ورىنباسارى اسەم ءنۇسىپوۆا جاڭا وقۋ جىلىنىڭ باستالۋىنا قاتىستى جىلداعىداي باق تاراپىنان تۋىندايتىن بارلىق ساۋالعا جاۋاپ بەردى.
پارتاعا 308 519 وقۋشى وتىرادى
بيىل الماتىدا 1-سىنىپقا 27 490 بالا باراتىنى بەلگىلى بولىپ وتىر, بىراق قابىلداۋ 31 تامىزعا دەيىن جالعاساتىندىقتان, جاڭادان مەكتەپ تابالدىرىعىن اتتايتىندار سانى 28 مىڭنان اسادى بولادى دەگەن بولجام بار.
الماتىدا جاڭا وقۋ جىلىنا دايىندىق اياقتالىپ كەلەدى. بيىل 308 519 وقۋشى جاڭا وقۋ جىلىن باستايدى, بۇل وتكەن جىلمەن سالىستىرعاندا 8 مىڭعا كوپ.
«كەيىنگى 3 جىلدا العاش رەت ءبىرىنشى سىنىپ وقۋشىلارى سانىنىڭ تومەندەگەنى بايقالدى, وتكەن جىلمەن سالىستىرعاندا 4 مىڭ بالاعا از. جالپى, 30 8519 بالا مەكتەپ پارتاسىنا وتىرادى», دەدى اسەم ءنۇسىپوۆا.
سونىمەن بالالار مەكتەپتەن تۇگەل تابىلۋى ءۇشىن 1 تامىزدا جىل سايىنعى «مەكتەپكە جول» رەسپۋبليكالىق اكتسياسى باستالىپ, 55 مىڭ تەڭگە كولەمىندە 12 684 مۇقتاج بالا قارجىلاي كومەك الدى. مۇقتاج وتباسىنان شىققان وقۋشىلارعا قولۇشىن بەرۋدى كوزدەيتىن بۇل باستاما «جالپىعا بىردەي ءبىلىم بەرۋ» قورىنىڭ, دەمەۋشىلەر مەن مەتسەناتتاردىڭ, بيۋدجەت قاراجاتى ەسەبىنەن جۇزەگە اسادى.
وسى ورايدا الماتى قالاسى اكىمىنىڭ ورىنباسارى بيىل جەرگىلىكتى بيۋدجەتتەن «جالپىعا بىردەي ءبىلىم بەرۋ قورىنا» 1,6 ملرد تەڭگە بولىنگەنىن, مەكتەپ فورماسى, سپورتتىق كيىمدەر مەن كەڭسە تاۋارلارىن ساتىپ الۋعا 697 ملن تەڭگە قاراستىرىلعانىن اتاپ ءوتتى.
«مەكتەپ اۆتوبۋسى» جوباسى جالعاسادى
سونىمەن قاتار جاڭا وقۋ جىلىندا بىلتىر 30 مەملەكەتتىك مەكتەپتەن باستاۋ العان «مەكتەپ اۆتوبۋسى» جوباسىن جۇزەگە اسىرۋ جالعاسادى.
«2023 جىلى 100 اۆتوبۋس ساتىپ الىنىپ, 8 مىڭنان استام بالانى تاسىعان ەدى. بيىل 6 مىڭنان استام بالانى قامتيتىن 23 مەكتەپكە تاعى 100 اۆتوبۋس ساتىپ الۋ جوسپارلانىپ جاتىر. وسىلايشا, جاڭا وقۋ جىلىندا 14 مىڭنان استام بالانى 200 اۆتوبۋسپەن تاسىمالداۋ ۇيىمداستىرىلادى. بۇعان بارلىعى 2,5 ملرد تەڭگە ءبولىندى», دەدى ءا.ءنۇسىپوۆا.
جالپى, مەگاپوليستەگى مەكتەپ اۆتوبۋستارى جاڭا وقۋ جىلىندا 14 مىڭنان استام بالانى تاسىمالدايدى «مەكتەپ اۆتوبۋسى» جوباسى الماتىدا كەڭەيە تۇسپەك. الماتى اكىمىنىڭ ورىنباسارى اسەم ءنۇسىپوۆا جاڭا وقۋ جىلىندا 200 اۆتوبۋس كۇندەلىكتى 14 مىڭنان استام وقۋشىنى تاسىمالدايتىنىن ايتادى. بۇل جوبا بىلتىر باستالعان. ول كەزدە 6,1 ملرد تەڭگەگە جوعارىداعى 100 اۆتوبۋس ساتىپ الىنسا, بيىل 6 مىڭنان استام بالانى قامتيتىن 23 مەكتەپكە تاعى 100 اۆتوبۋس ساتىپ الىنىپ جاتىر. «بۇل – بالالاردىڭ قاۋىپسىزدىگىن ارتتىرۋعا جانە جول كەپتەلىسىن ازايتۋعا باعىتتالعان ماڭىزدى جوبا», دەپ اتاپ ءوتتى ءا.ءنۇسىپوۆا. ءبىر سوزبەن ايتقاندا, بالالاردى مەكتەپكە تاسۋعا 2,5 ملرد تەڭگە ءبولىندى.
مەتسەناتتار 5010 بالاعا كومەك كورسەتتى
اڭگىمە بالا, ونىڭ كەلەشەگى مەن ءبىلىمى بولىپ تۇرعاندا, وقۋشىلاردى دۇرىس تاماقتاندىرۋ ماسەلەسىنەن اتتاپ وتە المايمىز.
«بيىل ءحاوت ساناتىنداعى 1-4-سىنىپتار مەن 5-11-سىنىپ بالالارىن تەگىن تاماقپەن قامتاماسىز ەتۋ ءۇشىن جەرگىلىكتى بيۋدجەتتە 16,5 ملرد تەڭگە قاراستىرىلعان. 133 مىڭنان استام وقۋشىنى قامتۋ جوسپارلانعان. وقۋشىلاردىڭ كۇندەلىكتى تاماعىنىڭ باعاسى ورتا ەسەپپەن – 840 تەڭگە, بۇل – ەلىمىزدەگى ەڭ جوعارى كورسەتكىش», دەيدى قالا اكىمىنىڭ ورىنباسارى.
ءبىلىم باسقارماسىنىڭ مالىمەتىنشە, الماتىدا بارلىعى 337 مەكتەپ بار, ونىڭ 215-ءى مەملەكەتتىك جانە 122-ءسى جەكەمەنشىك. وتكەن وقۋ جىلىندا ولاردا 336 486 بالا ءبىلىم الدى. بۇگىنگى تاڭدا مەگاپوليستە مەكتەپ فورماسىن, اياقكيىمدى, سپورتتىق كيىمدى, كەڭسە تاۋارلارىن ساتىپ الۋعا 55 مىڭ تەڭگەدەن 12 684 مۇقتاج بالا قارجىلاي كومەك العان.
سونىمەن قاتار دەمەۋشىلەر مەن مەتسەناتتار تاراپىنان كومەك كورسەتۋ بويىنشا جۇمىستار جۇرگىزىلىپ جاتىر. 1 تامىزدا ءحاوت ساناتىنداعى بالالاردى مەكتەپ فورماسىمەن جانە كەرەك-جاراقتارىمەن قامتاماسىز ەتۋ بويىنشا ءداستۇرلى جىل سايىنعى «مەكتەپكە جول» رەسپۋبليكالىق اكتسياسى باستالدى. ناۋقان 30 قىركۇيەككە دەيىن جالعاسادى.وسىلايشا, دەمەۋشىلەر مەن مەتسەناتتار ەسەبىنەن جالپى سوماسى 275 ملن تەڭگەگە 5010 بالاعا كومەك كورسەتىلىپ وتىر. سول سياقتى الماتىدا 133 مىڭنان استام وقۋشى جاڭا وقۋ جىلىندا تەگىن تاماقتاناتىنىن ايرىقشا اتاپ وتكەن ءجون. ول ءۇشىن جەرگىلىكتى بيۋدجەتتەن 16,5 ملرد تەڭگە بولىنگەن.
«حالىقتىڭ الەۋمەتتىك وسال توپتارىنان شىققان بالالار تەگىن تاماقتاندىرىلىپ, بۇل ورايدا 1-11-سىنىپ وقۋشىلارى تۇگەل قامتىلادى», دەيدى ءا.ءنۇسىپوۆا.
قالا اكىمىنىڭ ورىنباسارى مەكتەپتە تەڭشەلگەن تاماق بەرۋ ماسەلەسى بەزبەنگە سالىنىپ, ءوسىپ كەلە جاتقان جەتكىنشەكتەردىڭ دەنساۋلىعىنا پايدالىلىعى قاپەردە ۇستالعانى ۇمىت قالماعانىن اتاپ ءوتتى.
قۇرىلىس جۇمىسى قارقىن الدى
الماتىدا جىل سوڭىنا دەيىن 32,8 مىڭ ورنى بار 20 جاڭا مەكتەپ پايدالانۋعا بەرىلمەك. بۇل تۋرالى الماتى قالاسى ءبىلىم باسقارماسىنىڭ باسشىسى سايران سايفەدەنوۆ مالىمدەپ, «جايلى مەكتەپ» ۇلتتىق جوباسىن ىسكە اسىرۋ ماقساتىندا قالادا 36,8 مىڭ ورىنعا شاقتالعان 22 مەكتەپ سالۋ جوسپارلانعانىن اتادى.
بيىل جىل سوڭىنا دەيىن 32,8 مىڭ ورىندىق 20 مەكتەپتىڭ قۇرىلىسىن اياقتاپ, پايدالانۋعا بەرۋ جوسپارلانسا, 4 مىڭ ورىنعا ەسەپتەلگەن قالعان ەكى مەكتەپ 2025 جىلى اياقتالىپ, اشىلادى.
«Samruk-Kazyna Construction» اق ارقىلى جۇرگىزىلىپ جاتقان 23 100 ورىندىق 13 مەكتەپتىڭ قۇرىلىسىنا ەرەكشە نازار اۋدارىلادى. ولاردىڭ ىشىندە 2024 جىلدىڭ 1 قىركۇيەگىنە دەيىن «Dial-Stroy» شاعىن اۋدانىندا 600 ورىندىق مەكتەپ پايدالانۋعا بەرىلەدى. 2024 جىلدىڭ قازان ايىندا «تەرەكتى» شاعىن اۋدانىندا 2 مىڭ ورىندىق مەكتەپ اشۋ كوزدەلىنىپ وتىر», دەدى باسقارما باسشىسى.
الداعى قاراشادا 4 500 ورىندىق ءۇش مەكتەپ: روزىباكيەۆ –لەۆيتان كوشەسى بويىنداعى مەكتەپ, رايىمبەك داڭعىلى بويىنداعى «نۇرلى دالا» تك اۋدانىنداعى جانە اقبۇلاق شاعىن اۋدانىنداعى №154 مەكتەپ قۇرىلىستارى اياقتالادى دەپ كۇتىلىپ وتىر.
جىلدىڭ سوڭىنا دەيىن 15 مىڭ ورىندىق 8 مەكتەپتىڭ قۇرىلىسىن اياقتاۋ جوسپارلانعان. ولاردىڭ اراسىندا «قاراسۋ», «سامعاۋ», «شۇعىلا», «قۇرامىس» شاعىن اۋداندارى, سونىمەن قاتار ەگىزباەۆ, سابدەنوۆ كوشەلەرىندەگى جانە باسقالارى بار.
سونداي-اق 11 700 ورىنعا ەسەپتەلگەن 8 مەكتەپ قۇرىلىسىن جەكە ينۆەستورلار جۇرگىزىپ جاتىر. بۇگىنگى تاڭدا «شۇعىلا» شاعىن اۋدانىندا 1 200 ورىندىق ءبىر مەكتەپتىڭ قۇرىلىسى اياقتالدى. «العاباس» شاعىن اۋدانىندا 2 مىڭ ورىندىق مەكتەپ سالۋ مەملەكەتتىك جەكەشە ارىپتەستىك شەڭبەرىندە جوسپارلانسا, بۇل جوبا بويىنشا جۇمىستار الداعى قازان ايىندا باستالادى. قۇرىلىس 2025 جىلدىڭ جەلتوقسانىندا اياقتالۋعا ءتيىس.
اعىمداعى جوندەۋ اياسىندا, بيىل 180 مەملەكەتتىك مەكتەپكە جوندەۋ جۇمىستارىن جاساۋ جوسپارلانعان. بيىلعى 19 تامىزداعى مالىمەت بويىنشا 169 مەكتەپتە جوندەۋ جۇمىستارى اياقتالىپ, قالعان 11 مەكتەپتە جوندەۋ جۇمىستارىن 25 تامىزعا دەيىن ءبىتىرۋ مەجەلەنگەن.
ۇدەدەن شىقپاعان ۇش نىسان
«قازىرگى تاڭدا قالاداعى 13 مەملەكەتتىك مەكتەپتە كۇردەلى جوندەۋ جۇمىستارى جۇرگىزىلىپ جاتىر. ونىڭ ىشىندە 4 مەكتەپتە جوندەۋ جۇمىستارى اياقتالدى, ال قالعاندارىندا 2025 جىلى اياقتاۋ جوسپارلانعان. وكىنىشكە قاراي, ءۇش پروبلەمالىق نىسان بار, بۇلاردا جۇمىستار كەشىكتىرىلىپ, جوندەۋ جۇمىستارى جوسپارلانعان مەرزىم ۇدەسىنەن شىعا المايتىنى كورىنىپ وتىر. ولاردىڭ ىشىندە 2023 جىلدىڭ اقپان ايىندا باستالعان №9 مەكتەپ جانە 2023 جىلدىڭ قىركۇيەگىندە قايتا جوندەۋ جۇمىستارى باستالعان №59 مەكتەپ بار», دەپ اتاپ ءوتتى س.سايفەدەنوۆ.
سونداي-اق جەرگىلىكتى بيۋدجەت ەسەبىنەن ارقايسىسى 550 ورىندىق ەكى مەكتەپتىڭ قۇرىلىسى جۇرگىزىلىپ جاتىر. ولاردىڭ ءبىرىن بيىلعى قىركۇيەكتىڭ سوڭىنا قاراي «سايالى-2» شاعىن اۋدانىندا اياقتاۋ جوسپارلانسا, ەكىنشى مەكتەپ «زەردەلى» شاعىن اۋدانىندا بوي كوتەرەدى.
الماتى